هولع في العربيه خلاص

**m_hamdy1976** · 11-11-2008 12:28 AM

يا اهل الخبره عربيتي هتجنني بجد فيها حاجات غريبه جدا ومش عارف الحاجات دي عند اي حد ولا في عربيتي بس؟
اقصد بتحصل عادي يعني والا العربيه منحوسه لاقدر الله
اولا العربيه كل 10 ايام كده بتعمل حاجه غريبه وهي اني لما ادوس فرامل العربيه تبطل ( فرامل مع الدبرياج طبعا)
المكانيكي قاللي نضف الكربيرياتير بكلينر
اوك ؟ بقت كل اسبوع محتاجه تتنضف بكلينر ( هلاحق بنزين والا كلينر مش عارف )
طبعا انا مش عارف ده من ايه؟
ثانيا لما بدوس فرامل بسمع صوت هوا ؟
الراجل قالي ده يمكن صوت السيرفو .. طب تعرف تصلحوا ؟ قاللي لا اهي ماشيه ومفيش ضرر اوي منو وعايز بتاع سيرفو
ثالثا البوجيهات بييجي عليها هباب من بره مش من السن ؟
رابعا غيرتلها 6 سيور دينامو مقاسات مختلفه في العرض وبرضه ليها صوت وكل مروح لميكانيكي يقولي سير الدينامو لازم يتغير انا جايبها في شهر يوليو يعني بمعدل سير كل اسبوعين
برجاء حد يفيدني لحسن خلاص هتجنن ويمكن ابعها واجيب تكتك زيرو واهو اكيد مش هيتعبني كده

**KHALED AYMAN** · 11-11-2008 12:54 AM

هو عربيه حضرتك ايه و موديل كام؟؟؟؟؟؟؟؟؟؟
متعصبش نفسك يا عم ان شاء الله كل شىء هيتحل و هنا رجاله المنتدى كتيييييييييير و هيحلوهالك.

**ABDULLAH AHMED** · 11-11-2008 01:02 AM

انت بس هدي نفسك ولا تولع في العربية ولا حاجة

زي ما قلكwheals رجالة المنتدى حيحلو المشكلة دي

**m_hamdy1976** · 11-11-2008 11:54 AM

يا جماعه شكرا علي تعاطفكم معايا بس انا والله فعلا تعبت جدا
عربيتي كورسا 95

**Ahmad Allawy** · 11-11-2008 08:58 PM

طيب قولي بقي انت ساكن فين.. و هنشوف المواضيع دي ان شاء الله..
الصوت و الفرامل ده اكيد كده سيرفو..
كان حصل معايا الكلام ده ف العربية القديمة.. و غيرت الكاوتشة رجعت زي الفل..
و قولي بس.. و نشوفلك حد محترم متخصص اوبل.. يظبطهالك..
و اهدي كده و ربنا يوفق ان شاء الله..

**Lord of the flies** · 11-11-2008 09:09 PM

فى واحد بتاع سيرفو فى احمد سعيد عملى السيرفو ب85 جنية و علية ضمان لمدة سنة و هو شغال كويس الحمد لله

**farahat** · 11-11-2008 10:29 PM

صوت السير ده يا إما السير نفسه عايز يقصر شوية ، بمعنى إن المقاس إلي بيركب بيكون كبير و مش بيتشد كفاية ، يا إما الشداد بتاع سير الدينامو عايز يتغير (الكورسا فيها حاجة اسمها شداد سير دينامو عبارة عن سوستة كبيرة و جامدة بتركب على السير عشان تشده كل ما يرخي و دي تمنها استراد حوالي ١٠٠ - ١٥٠ جنيه ) ، و دي حاجة مش معتادة في العربيات العادية و واضح إن الميكانيكي بتاعك مش متخصص في اوبل .
كمان الهباب إلي على البوجيه ده مع التبطيلة معناه إن الخليط بتاع البنزين مش مضبوط ، و دي محتاجة تتزبط أو تنضف الرشاش أو تغيره (و ده سبب تاني يخليني أقول لك الميكانيكي بتاعك ده مش تمام لأن العربية دي مش كربراتير دي إنجكشن و على رشاش بس رشاش واحد بيحل محل الكربراتير )

الفرامل زي ما قال لك أحمد باشا علاوي دي مشكلة سيرفو و لازم يتحل يا إما تستحمل تمشي من غيره مش خطر ، بس أنا رأي دور على حد كويس يصلحه أحسن

تحياتي

**Ahmad Allawy** · 11-11-2008 10:37 PM

تسلم ايدك فرحات بك..
كلام وافي و تمام..

**محمد ابراهيم 1** · 11-11-2008 10:43 PM

الموضوع بسيط
كاوتشة السيرفو إتخرمت يا باشا والصنايعيه بيسموها الطاقيه وهى عباره عن كاوتشه على شكل حله صغيره وفيها خرم من النص واللى حصل عندك هو إنها إتقطعت
غيرها وإدعيلى