اتنصب على فى 1100 جنيه

**ali ashraf** · 18-04-2015 05:33 PM

طلعت من البنك و رحت الى التامينات و المعاشات لدفع رسوم و انا هناك دخل المكتب راجل فى حوالى السبعين و شكله مريض و يعرج يتوكأ على عصا و توجه الى احد الموظفين يطلب قرض على معاشه لأصابته بمرض سرطان البروستاتا و يحتاج عملية عاجلة بمعهد ناصر و التامين الصحى متكفل بمعظم العلاج و يتبقى 1100 جنية ( شوية مستلزمات للعملية) و الراجل قدم للموظف فى المكتب الاوراق الداله على كل شئ و كلها اوراق رسمية و من جهات رسيمة ( او هكذا خيل لى) و الموظف قال له انت سبق و اخذت قرض مينفعش يا حاج و أخذ الرجل جانبا و بدأ فى بكاء شديد .... و انا كنت جالس و فى جيبى اكثر من 20 الف جنية لسه ساحبهم من البنك , قلت فى سرى اديله 100 جنيه و انبنى ضميرى يعنى مستخسر تساعد الراجل اللى فى محنه و معاك مال هو اصلا مش مالك و لكن الله اعطاه لك ليرى تصرفك فيه....المهم اخذت الراجل على جنب خارج المكتب و اطلعت بنفسى على الاوراق و توكلت على الله و اديته ال1100 جنيه و كنت فرحان و قلت ده مال مستخلف و نجحت فى الامتحان ....أرجو الانتباه ان ده حصل داخل اروقة مكاتب حكومية يعنى مش فى الشارع.....المهم فات كام اسبوع و رحت اتابع المصلحة بتعتى لقيت الراجل العجوز بيعمل نفس الحكاية ....مش هقول لكم عملت ايه ... بس تخيلوا طلع فعلا مريض بالسرطان و اخذ العلاج المناسب و الحمد لله و بيسترزق من الموضوع ده.....مرة اخرى مش هقول لكم عملت ايه انما مش عارف بعد كده هاعمل ايه لو لقيت واحد محتاج مساعدة اشك الف مرة و غالبا لن اساعد احدا بعد الان حقيقى انا آسف و حزين طبعا مش علشان الفلوس لكن على زمن حتى فعل الخير فيه بقى صعب و لا حول و لا قوة الا بالله

**mk3** · 18-04-2015 05:40 PM

مش عارف اقولك ايه فى الموقف بتاع الراجل ..لكن ده ميهبطش عزمتك بعد كده واوعى تستسلم للشيطان انت بتساعد وتتصدق لله

**أبو آسر** · 18-04-2015 05:59 PM

متحزنش لأنك أخدت الأجر بالنية وتحريت صحة كلامه قدر استطاعتك أما هو فله العقاب الأخروي إن شاء الله

**mmtronic** · 18-04-2015 06:18 PM

إنما الاعمال بالنيات و لكل أمراء ما نوى

**Dr_Smart** · 18-04-2015 06:52 PM

طالما نيتك لله يبقى أبشر .. ان شاء الله ثوابك عظيم وربنا يتقبل منك

الحقيقه انا رأيي ان الاقربون أولى بالمعروف .. تجنبا لألاعيب النصابين دول

او الجمعيات الخيرية المعروفه بتعمل تحري اجتماعي للمحتاجين زي جمعية الاورمان على سبيل المثال بتساعد المرضى المحتاجين لعمليات او علاج مكلف بانها بتعملها على نفقتها دون اعطاء مبالغ مالية في ايد المحتاج

وربنا يتقبل منا ومنكم صالح العمل

**adel1212** · 18-04-2015 08:06 PM

اتنصب عليك ازاي يعنى
انت تاجر شااااااطر وكسبت كتيييييير من الموضوع ده لان السيناريو التاني كان اسواء بكتير و يا عالم الـ1100 دول كنت حتصرفهم فين لانهم مش رزقك وانت اودعتهم عند الذي لا تضيع ودائعة
يبقى اتنصب عليك ازاي و انت الكسبان
تحياتي لشخصك الكريم و امضي في طريقك و حاول دائما تزيد من الودائع و كله في حسابك مش حينقص و ان شاء الله يزيد اضعاف و اضعاف

**Abo_Mazen** · 18-04-2015 08:18 PM

عارف الحديث اللي النبي عليه الصلاة والسلام بيقول فيه ..أو كما قال......إن الله يقول يوم القيامه يابن آدم مرضت فلم تعودني ..فيقول العبد ..كيف تمرض وأنت الله ..فيقول الله ..أما علمت أن فلان مريض ..ألو كنت عدته لوجدتني عنده...إلى آخر الحديث...تفهم من الحديث ده إن المعامله هنا بينك وبين ربنا ..التجاره هنا بينك وبين الله ..إنت عملت اللي يرضي ربنا عنك ..ده أنا حتى كنت شايف إنك لما شفته ما تنفعلش ولا تضايق ..وكل اللي عليك تعمله وقتها إنك تفضحه وتحذر الناس منه ..واللي طلع من عندك عند الله ..إفتكر الكلام ده كويس ..تجارتك مع الله ..طيب هقولك على حاجه ..إفترض الراجل ده بعد ما خد منك الفلوس مات يوميها بليل وملحقش يصرف جنيه من الفلوس دي على نفسه ..يبقى كده خلاص ..ثواب الفلوس راح؟؟؟..إفرض وهو نازل من التأمينات حرامي بموتوسيكل عدي خطفها منه وجري ...يبقى كده خلاص ثواب الفلوس دي راح ..بلاش ..إفرض الراجل ده خد الفلوس دي ومكانش مريض وصرفها على المخدرات...يبقى كده خلاص ..ثوابها راح ؟؟؟..بالعكس ..ده وقتها يبقى هو بياخد الذنب مضاعف ..وإنت بتؤجر ..بس ركز ومتضيعش ثواب اللي عملته وخليك فاكر ..إنك بالفلوس دي ..إستثمارك كان مع الله

**afndina** · 18-04-2015 09:35 PM

المشاركة الأصلية كتبت بواسطة dr_smart

الجمعيات الخيرية المعروفه بتعمل تحري اجتماعي للمحتاجين زي جمعية الاورمان على سبيل المثال بتساعد المرضى المحتاجين لعمليات او علاج مكلف بانها بتعملها على نفقتها دون اعطاء مبالغ مالية في ايد المحتاج

هو دا
الجمعيات دي بتدرس الحالة كويس وبتعرف اذا كان فعلا محتاج ومحتاج اد ايه وبتابعه شهريا لو حالته تستلزم