حملة ضد المطبات غير المطابقة للمواصفات

**م.احمد زكريا** · 11-11-2008 11:29 AM

أكيد مفيش حد مننا إلا وإتفاجئ وهو ماشي في أمان الله بمطب صناعي رخم... ويا إما فرمل جامد أو خده وطار شوية في الهوا

أحيانا ربنا بيسترها وتعدي على خير وأحيانا لاقدر الله بيتسبب في مشكلة في العربية أو تؤدي لحوادث

أنا مش ضد وجود مطبات في الشوارع ...... بالعكس أنا مع وجود مطبات في أماكنها الصحيحة
عند المدارس او عبور المشاه او التقاطعات الخطيرة التي ليس بها إشارات

انما كل واحد حابب يعمل مطب بيعمله بشوية خرسانة

والادهى المطبات الي بتعملها الاحياء في الشوارع وتكون نسبة إرتفاعها لعرضها مش صحيح وبيترتب علية ان العربية تحك في المطب و يمكن تغير فيها علبة شكمان او تستعدل المصفحة وغيرها من البلاوي

طبعا غير المطبات الغير ملونة بلون عاكس وواضح وتتفاجئ بيها وانت ماشي ومفيش حتى قبلها علامات ارشادية ان في مطب

طبعا ده غير الحفر الي في الشوارع وبالوعات صرف الامطار المفتوحة في الانفاق ... يعني الغلطة بفورة

انا ادعو جميع الاعضاء للمشاركة بحملة ضد المطبات الغير مطابقة والحفر والبلوعات والمشاركة بصور ليها واماكنها ومدى خطورتها
وبكدة نعمل قاعدة بيانات بيها في مصر لحد ما ربنا يكرمنا والمشكلة دي تختفي من بلد الحضارة مصر

وشكرا

**Samir Elshahawy** · 11-11-2008 11:51 AM

طبعا موضوع مهم جدا و انا متشكر جدا لسرعة استجابتك دي ياباشمهندس أحمد و أنا عن نفسي اول المنضمين للحملة دي من كتر اللي شوفته من المطبات و مستعد للمشاركة بأي حاجة ضد المطبات الغير مطابقة للمواصفات و الموضوعة بدون فائدة

**MedaSam** · 11-11-2008 12:31 PM

I am IN sure

There are two bumps at the most right lane towards Hyper One; at night you can not see them, they are very high to the extend I feel I make a horse jump with my car over them :D

**tamohsen** · 11-11-2008 12:57 PM

بالعكس
ياريت اللي يلاقي طرق مفيهاش مطبات يبلغ عنها
علشان نحاول نمشي فيها

اصل لو هانبلغ عن المطبات يبقي محتاجين 100 ورقه نكتب فيها

حضرتك انا من بيتي لشغلي رايح جاي
بعدي علي 22 مطب صناعي
ده غير الحفر الطبيعيه

**romancey** · 11-11-2008 01:13 PM

عندك حق يا tamohsen المطبات كتيرة أوووى والحفر زيها وسعات امر
انا معاك والمفروض الحكومة تنفذ المطبات دى بموصفات معينة علشان مضرش حد
بس هتعمل اية بأة احنا فى مصر يا انسى الموضوع دة

**tamera** · 11-11-2008 01:19 PM

فعلا المرة الوحيدة اللي شفت فيها مطب بمواصفات قياسية كان في مدخل مدينة 6 اكتوبر عرضه حوالي 2 متر وواخد الارتفاع تدريجي على هذا العرض و متخطط بلون فوسفوري..:)
انما مطبات غير قياسية زي ماقال الاخوة مش هانخلص لان اصلا الشوارع غير قياسية..
بس ممكن نبدأ برضه بالمطبات ذات التأثير المدمر

**wesam_salom** · 11-11-2008 01:20 PM

هههههههههههه
نبلغ عن المطبات
انا ممكن ابلغ عن العربيات اسهل
ده عدد المطبات اكتر من عدد العربيات

**ibrahimsaad** · 11-11-2008 05:53 PM

المشاركة الأصلية كتبت بواسطة mobitek

هههههههههههه
نبلغ عن المطبات
انا ممكن ابلغ عن العربيات اسهل
ده عدد المطبات اكتر من عدد العربيات

هههههههههههههههههههههه

والله كلامك صحيح الواحد يبيع العربيه اسهل من الكلام ده

دا كل مترين مطب صناعى عندنا لدرجه ان كل واحد عامل مطب قدام بيته

انا شايف ان الواحد يرجع للعصور الوسطى احسن ويجيب حمار وخلاص بدل العربيه ومشاكلها