الموضوع: الدوكو طلع وحش

عربيتي (دايو نوبيرا) كانت فبريكة برة و جوة ماهدا الجنب اليمين كام مرشوش من برة. باقي العربية كانت كلها حكات وشكلها مبهدل فقررت اظبطها سمكرة ودوكو و أرشها كلها ماعدا السقف علشان يرجع شكلها نضيف.
الدوكو الجديد طالع زي الزفت، الصنايعي تقريبا علي قده شوية.

اللون (أخضر فاتح) مش طالع مظبوط (الفرق باين مع السقف) وكمان بعد الرش بكام يوم لقيت كذا حتة في العربية مبقعة (فيها لطش كدا) صفرا كأنك مسحت حاجة صفرا فيها. لكن اللطش دي تحت الورنيش، مش عارف ايه اللي ممكن يكون عمل فيها كدا. هو كمان كان شغال بمعجون أحمر مش الرمادي اللي بشوفه في كل حتة.
ممكن يكون هو المعجون اللي مبقعها كدة؟؟

بتاع الدوكو بيقوللي نلقط الكذا حتة دول (كبوت، باب، رفرف، والشنطة) ونديهم وش ورنيش تاني وكدة مش هايبان أي حاجة.

من ساعتها وأنا مقفول من العربية وندمان اني رشيتها اصلا.

عايز رأيكم ونصايحكم بقا:
اروحله يلقط الحتت دي؟
انا بفكر اشوف صنايعي نضيف نصنفر العربية كلها ونرشها وش تاني على نضافة، ايه رأبكم ويكلف كام؟ (مش محتاجة معجون او اي حاجة يادوب تتصنفر وتترش تاني)
ولو حد يعرف ايه اللي ممكن يكون السبب ياريت يقوللي ، ولو يعرف صنايعي كويس في عين شمس، المطرية، الزيتون، أو مصر الجديدة.

شكرا.

المشاركة الأصلية كتبت بواسطة kaza

اغلب الظن ان الصنايعي رش بدون ما يعمل بطانة وبالتالي اماكن المعجون لونها غير وامتصت الدهان
الحل بانك تصنفر الحتت دي كويس بصنفرة 320 وبعدين ترش بطانة قريبة من اللون الاصلي وبعدة الرش والورنيش وهتلاقي العربية رجعت زي الفل وما تتقفلش منها ابدا

يعني تتلقط زي ماهو بيقول؟
صنفرة وتترش لوحدها؟ ولا الكبوت مثلا يترش كله ولا البقع بس؟
هو في شوية بوية باقية من الرشة اللي فاتت هتكفي لو هنرش البقع بس.