سيرفو الفرامل

**MEAMY1980** · 21-04-2015 01:41 AM

السلام عليكم
كنت بظبط الفرامل عند الميكانيكي لان فرامل القدم واليد ضعفت وكنت بسمع صوت صفارة عند الضغط على الفرامل المهم الميكانيكي فك العجل الخلفي وخلي الصنايعي اللي معاه يكارك على فرامل القدم وكان معاه مفك وبقي يطلع زيت الفرامل من عند الطنابير وعمل نفس الموضوع في العجل الأمامي من غير ما يفك العجل وقالي أن ده اخر رجلاش لفرامل اليد ولو ضعفت تاني لازم اغير تيل خلفي.
وبعد ما خلص وطلعت اجرب الفرامل لقيت الفرامل ظبطت لاكن بسمع صوت تنفيس هوا بالضغط على فرامل القدم وزيت الباكم زاد في القربة بتاعته ولما سألته الميكانيكي عن صوت تنفيس الهواء قالي ان السرفو باظ ولازم يتغير وزيادة الزيت ده شئ طبيعي مع العلم انه نزل زيت كتير على الأرض وكمان الزيت بقى عامل زي الميه بدون اي لزوجة.
أرجو من خبراء المنتدى يفهموني ايه اللي حصل وخطورة المشي بالعربية على هذه الحالة وسعر السرفو كام مع العلم بأن عربيتي ابيزا 2002 موتور 1400 بتاع الجولف 4 واسف على الاطالة

**aymanshebl** · 21-04-2015 08:21 AM

متابع

**mohammad isdf** · 21-04-2015 09:31 AM

بص يا سيدى
انا من الناس اللى كانوا هيبيعونى هدومى عشان الفرامل

السيرفو لما بيبوظ الفرامل بتحجر

وصوت الهواء ده طبيعى

الزيت عندك لازم يتغير كل سنة أول لو انت لاقيته اتحلل وبقى محروق لأن ده معناه انه هيكون هوا فى دورة الفرامل كل شوية

الفرامل لو بقت قريبة من الأرض وطرية مع الدوس زيادة عن اللزوم وكل شوية تحتاج تاخد هوا يبقى كده فى ماستر بايظ أو اتنين سواء كان عمومى أو الفرعى اللى فى الكاوتش الخلفى.

السيرفوا عندك سليم ودواسة الفرامل لو مرفوعة وحلوة وبتقفش معاك بسرعه يبقى مفيش أى مشاكل ولو سايبه وبتقرب للأرض كل شوية لحد ما بتلاقيها على الأرض ومفيش فرامل يبقى مشكلة مساتر

**Abo_Mazen** · 21-04-2015 01:34 PM

المشاركة الأصلية كتبت بواسطة mohammad isdf

بص يا سيدى
انا من الناس اللى كانوا هيبيعونى هدومى عشان الفرامل

السيرفو لما بيبوظ الفرامل بتحجر

وصوت الهواء ده طبيعى

الزيت عندك لازم يتغير كل سنة أول لو انت لاقيته اتحلل وبقى محروق لأن ده معناه انه هيكون هوا فى دورة الفرامل كل شوية

الفرامل لو بقت قريبة من الأرض وطرية مع الدوس زيادة عن اللزوم وكل شوية تحتاج تاخد هوا يبقى كده فى ماستر بايظ أو اتنين سواء كان عمومى أو الفرعى اللى فى الكاوتش الخلفى.

السيرفوا عندك سليم ودواسة الفرامل لو مرفوعة وحلوة وبتقفش معاك بسرعه يبقى مفيش أى مشاكل ولو سايبه وبتقرب للأرض كل شوية لحد ما بتلاقيها على الأرض ومفيش فرامل يبقى مشكلة مساتر

بس بصراحه..أنا لو مكانه مش هستريح لصوت تنفيس مع دواسة الفرامل ..دي فرامل يا سيد مش هزار ..أكيد صوت التنفيس ده مش صح وخصوصا إنه مكانش موجود الأول ..أنا بتكلم عن نفسي بصراحه ..ما أنا ممكن آجي أضرب على دواسة الفرامل ألاقيها مسافره معايا لغاية الأرض ومفيش فرامل .التنفيس ده يقلق

**MEAMY1980** · 21-04-2015 02:01 PM

طيب اروح لسيد عبده الميكانيكى اللى فى جسر السويس ولا اروح لواحد بتاع فرامل بس انا ساكن فى عين شمس ومعرفش حد بتاع فرامل كويس وشكرا على الاستجابة وسرعة الرد

**mohammad isdf** · 21-04-2015 02:23 PM

طبعا صوت الهوا ليه حدود

يعنى بتعمل فسسسسسسسسس وتنزل جامد يبقى فيه مشكلة

لكن فسس كده بسيطة ده طبيعى والفرامل معاك ماسكه نفسها خلاص

**MEAMY1980** · 21-04-2015 02:38 PM

معلش انا نسيت انى اقول ان فى صوت تصفير عند الضغط على الفرامل وده كان موجود من الاول قبل ما اروح للميكانيكى وماوال الصوت موجود بالرغم من ان الفرامل كويسة بس انا مقلق منها لا تعملها معايا وانا بجرى بالعربية فيا ريت النصيحة حد يوصفلى مكان كويس يكشف عليها ويطمنى وشكرا

**Abo_Mazen** · 21-04-2015 03:27 PM

يا سيدي ا لفاضل ..أي صوت مكانش موجود وبعدين بقي موجود يقلق ..صوت الصفارة كان موجود وما زال ..ماشي ..لكن صوت التنفيس ده جديد ..يبقى الكلام على صوت التنفيس مش الصفارة