الموضوع: اضطرابات النوم - النوم الفاجئ ....الحمد لله

الاخوة الكرام ....السلام عليكم و رحمة الله و بركاته
من فترة دخلت على المنتدى أسأل على النوم المفاجئ و أسبابه و لم أتلقى اى ردود....المشكلة ببساطة انى كنت بنام و انا قاعد فى الشغل ...فى النادى ....فى البيت....بدون اى مقدملت و فجأة الاقى نفسى نايم....و كانت مشكلة سيئة جدا بالنسبة لى من حيث الإحراج فى العمل او من اقابلهم فى اماكن مختلفة.روحت عملت تحاليل دم و صورة دم و تحاليل تانية كتير على اساس اكتشف السبب وجدت ان هناك دهون على الكبد لكن الدكتور قاللى مش هى السبب. طب ايه السبب؟ المهم بالصدفة سمعت عن دكتور تخصص اضطرابات النوم ..حاولت اوصله ماعرفتش . و بعدين بالصدفة برضه سمعت عن دكتورة برضه بتعالج اضطرابات النوم.....المهم روحت كشفت عندها قالت لى لازم تيجى تنام ليلة فى معمل النوم عندنا ( تكلفة الليلة 1500 جنيه !!!!) و التقرير اللى بيطلع من المعمل هو اللى هايوضح سبب النوم المفاجئ عندك....ماشى المهم نوصل لحل....روحت فعلا معمل النوم الموجود فى نفس العمارة الموجود فيها العيادة و كان هناك 2 فنيين واحد قاس الضغط و الوزن و الطول و قعد يسأل شوية اسئلة و التانى على مدى 45 دقيقة بيوصل اسلاك فى الراس و الودان و الصدر و الرجلين و اليد و قام موصل الاسلاك ببوكس فى الحيطة و البوكس ده متصل بكميوتر ده غير الكاميرا اللى بتصورك فى الغرفة....و يلا يا عم الحاج نام ....انام ازاى يا بنى بعد الاسلاك دى كلها....المهم حاولت انام لكن ماقدرتش....تانى يوم الصبح باقول للفنى انا مانمتش و خايف التقرير اللى يطلع يكون مش سليم لانى ببساطة مانمتش....قاللى لا يا استاذ انت نمت اكتر من 3 ساعات....المهم مشيت و انا مش مقتنع و حاسس ان الموضوع مش هو .....بعدها ب10 ايام اتصلت بى سكرتيرة الدكتورة و قالت لى تعالى قابل الدكتورة التقرير بتاعك خلص...روحت قابلت الدكتورة و قبل ما تتكلم شرحت لها وجهة نظرى و انى متشكك فى نتيجة التقرير لانى من وجهة نظرى مانمتش فى هذه الليلة.....المهم الست كان بالها طويل و قالت لى انت نمت اكتر من 3 ساعات و السبب فى المشكلة عندى هو ( التوقف الانسدادى للتنفس اثناء النوم )....انا حاسس انى طولت هاحاول اختصر .....طيب ايه العلاج ....العلاج جهاز اسمه اوتو سيباب ( تم شراءه ب 9000 جنيه ) و هو عبارة عن جهاز تنفس يتم استخدامه اثناء النوم و يعمل على دفع الهوا الى الجسم بضغط معين حتى لا يحدث توقف عن التنفس اثناء النوم....طبعا استخدام الجهاز فى الاول شئ سئ جدا و رخم و محبط ....لكن بعد استخدام 10 ايام....الحمدلله ....لم يعد هناك نوم مفاجئ
طبعا فى تفاصيل كتير عن مراحل النوم و هى 4 مراحل و انى دايما لم اكن اتجاوز المرحلة التانية....حبيت اقول التجربة دى يمكن تكون مفيدة لاى انسان.....ربنا يشفى كل مريض يارب....اسف للاطالة

المشاركة الأصلية كتبت بواسطة د.هشام

طبعا
اللي عندك من الوزن الزائد
الجهاز علاج مؤقت لغاية ما الوزن يقل أن شاء الله

شكرا جدا لرد سيادتك
يا ريت تبعتلى رقم موبايل سيادتك على الخاص ضرورى