الموضوع: ايهم افضل سوزوكي سويفت ام دايهاتسو شاريد ام اكسيل (تسعينات )

أنا هكلمك على أساس الوضع في إسكندرية
السويفت والإكسيل مفيش أي مشكله في قطع غيارهم
الشاريد ..هتتعب في حاجات عشان تجيبها ..ولسه في مشاركه لواحد هنا مش لاقي قاعدة موتور أماميه للشاريد بتاعة صديق ليه وأهو في القاهرة كمان مش في إسكندرية

بالنسبة للسويفت موديل 93 و 94 كانت ياباني ومن 95 لغاية 99 كانت مصري ..يعني أحمد مرعي هو اللي مجمعها ..السويفت من أول ما نزلت لغاية ما إنتهى الشكل القديم اللي هو كان آخره 99 كانت مكيفه فقط بدون باور ولا أي أوبشن تاني

الإكسيل كانت 94 و 95 كوري ..ومن 96 لغاية 98 كانت مصري..ودي كانت آخرها 98 ..يعني غبور هو اللي مجمعها

الإكسيل نزلت من أولها لأخرها بفئتين ..كامله ..ودي كانت بمحرك 1500 سي سي وتكييف وباور وشنطه تفتح من الداخل وغطا تانك يفتح من الداخل وإزاز كهربا وسنتر وسبويلر ..أصل السبويلر أيامها كان يعتبر أوبشن برضه..ومساند رأس مصمته ..يعني متنجده زي الكرسي ..ونزلت فاضيه ..يعني لا تكييف ولا باور ولا أسبويلر ولا مساند رأس متنجده ..كانت مساند الرأس بتاعتها عامله زي مساند الرأس بتاعة الماروتي .. وكانت بمحرك 1300 سي سي

بالنسبه للشاريد ..أنا مش حاططها في المقارنه أصلا عشان موضوع قطع غيارها ده عموما وخصوصا في إسكندرية

بالنسبه بقى للبنزين ...الإكسيل من أولها لآخرها كاربراتير ..السويفت من أولها لغاية آخر الشكل القديم اللي كان آخره 99 مش متأكد بصراحه كانت كربراتير كهربا ..يعني رشاش واحد ولا كانت كربراتير عادي ..لكن عموما هما الإثنين يمشوا معاك بنزين 80


شوف إنت بقى وفكر

اعتقد اكسل افضل --لان السويفت موتورها بيسخن وكمان الميكانيكيا مش كلهم بيشتغلو فيها واعاده بيع الاكسل اسرع بكتير

المشاركة الأصلية كتبت بواسطة mif

متشكر جدا على تعاون حضرتك
هو رد وافي جدا

بس لو انت بتختار حتختار ايه او رتبهم بالافضلية ؟

مع إستبعاد الشاريد ..يبقى هختار اللي هتيجي في سكتي الأول وتكون حالتها كويسه ..سواء إكسيل كامله أو إكسيل فاضيه أو سويفت ..وخلي بالك مش هيبقى شاغلني قوي السويفت ياباني ولا مصري والإكسيل كوري ولا مصري ..لإن كل حاجه ليها سعرها ..يبقى اللي هييجي في سكتي الأول وحالته كويسه وسعره كويس ..هخلص فيه ..في حاجات كده فرصه ..ما تضعيهاش