الموضوع: Check List عند الاستلام

أولا ألف مبروك مقدما و ربنا يتمم الإستلام على خير
أي عربية جديدة و انت بتستلمها بتبص على كل حاجة فيها خصوصا أن أحنا في مصر بلد الجمال و العجائب

المهم علشان منطولش عليك
تأخد معاك اسطوانة أغاني علشان تشغل الكاسيت و تجربة ( ياريت تكون أصلية ) أو من نوعية نظيفة
و تجرب التكييف - و تجرب الأضواء جميعا و تتأكد أن كلها تعمل بطريقة صحيحة
تجرب الكراسي و ترجعها لورا و تقدمها لقدام ( الكرسيين الأماميين )
و تبص على الصاج الخارجي كله و يجب أن يكون عديم التجريح أو الخربشة
العربية بييجي معاها آريال للراديو منفصل تتأكد من وجوده
الكتالوج كمان و كتالوج مشغل الأسطوانات و كتيب الوسائد الهوائية
تتأكد من وجود كيس من العدة بجانب الأستبن
و تتأكد من الأستبن و تراجع على على الكاوتش كله كويس
و تتأكد من العداد ميكونش عامل عدد كيلومترات كبير و يستحسن تحت 50 و ميزدش عن 75

بالنسبة للعربية المفروض أنها في فترة تليين لمسافة 1000 كم الأولى لذلك يجب مراعاة الأتي

عدم تزيد السرعة عن 100 و يفضل 90
عدم تزويد عداد RPM عن 3000 بأي حال من الأحوال
السير على سرعات مختلفة و على غيارات مختلفة متناسبة مع السرعة
عدم تشغيل التكييف أول ألف كم و الدنيا صاقعة أساسا

لا تضع بنزين أقل من 92 فيها و الفرق ما بينه و بين 95 مش السما و الأرض لذلك 92 مناسب جدا
في الأخر ربنا يباركلك في العربية و يعطيك خيرها و يكفيك شرها

انت حاجز من امتى يا amrcd1 ؟؟؟؟؟
وربنا يوفقك وتستلمها وابقى خللى بالك واعمل شيك على كل كبيره وصغيره والكاسيت والنور اللى جوه واللى بره والشنطه والمحرك وصوته اذا كان عالى او واطى والمساحات شغاله كويس ولا لا ؟ وكل زرار لقزاز العربيه كلله وزراير المرايا والمالتى فانكشن ؟ وحاول تلاقى خدشه فى العربيه ؟
بس والف مليون مبروووك ياباشا

المشاركة الأصلية كتبت بواسطة minasamirus

احب اضيف حاجة مهمة مش الصاج الخارجي بس لا الداخلي كمان لان في العربية الي كانت موجودة في الصحراوي للعرض كان تقفيل الصاج الداخلي زفتتتت اوي اوي يعني تلاقي شفة الكبوت والشنطة معوجة و الحوض واخد بنط مش صح و حاجة غريبة جدا واضح زي ماقلت ان العربية دي بالذات معيوبة فقالوا يبهدلوها في العرض فياريت تاخد معاك واحد بيقلب عربيات يعني تاجر او ميكانيكي او حتي سمكري اعتبر نفسك رايح تشتري عربية مستعملة يعني وتكشف علي كل حاجة فيها لو تعرف ترفعها في بنزينة يبقي قشطة لان بعد ماشفت العربية دي بالذات مش هافوتلهم حاجة

العربية دى سألت عليها و قالوا أتباعت يا معلم

و ربنا يستر علينا

او ممكن عملو عليها تخفيض الفين او تلاته عشان يمشو سوقها
ودا المتبع فى سوق السيارات