السائق المصري مستحيل يعترف بغلطه

**kar!m** · 27-04-2015 03:48 PM

السلام عليكم و رحمة الله

من كام يوم و أنا مسافر من القاهرة للزقازيق على الطريق الصحراوي و في الحته اللي بين الكارتتين و دي عادة الناس بتجري فيها بسرعة و أنا شايف في المرايه من بعيد سواق ميكروباص بيجري جامد و بياخد غرز بغباوة .. المهم أنا واخد يميني و ماشي على 110 تقريبا و أبص الاقي السواق ده بياخد غرزة من ورايا و مره واحده قام خبط في عربيتي في الاكصدام و سمعت صوت الخبطة .. و دخلني في الرمله و عدلت نفسي بصعوبة و رجعت على الطريق تاني و طبعا هو جري بسرعة وكمل في طريقه .. و أنا من تجارب سابقة كتير و من نصايح سابقة لأصدقاء في الشرطة قالوا لي انك في المواقف دي مش هتاخد حاجه و لو الموضوع مش مستاهل خلاص كبر دماغك فا مشيت في طريقي عادي و سبته يسبقني بكتير.

شوف بأه العقلية بتاعة سائق الميكروباص المصري .. الراجل لما لقاني ولا قلبت نور ولا شتمته ولا جريت وراه .. عقله أقنعه انه أكيد مش هو اللي غلطان .. لقيته هدى لحد ما جيت جنبه لقيته بيكلمني قمت فاتح الازاز اليمين .. لقيته بيقول لي ينفع كده و انت ماشي على اليمين بطىء و لولا اني مش طايقه كنت ضحكت لأن كلامه مش راكب على بعضه .. بس برضه بالخبرة في الحياه .. المرجع أصلا في التفكير بينك و بينه مختلف فا مش هتوصل معاه لحاجه.

المهم أنا بصيت له كده و قلت له "هو مين اللي غلطان يا اسطى أنا ولا أنت" .. بص لي كده شويه و بعدين قال لي "لأ أنا اللي غلطان" .. و سابني و مشي.

ربنا يتوب علينا .. و دي صورة الخبطة

**Omar Sarray** · 27-04-2015 03:53 PM

نعمل ايه طيب مش تحاسب شويه ربنا كريم جت سلميه فى داهيه العربيات المهم انت كويس وبخير الحمدلله

**Abo_Mazen** · 27-04-2015 04:11 PM

كنت ماشي في طريق إتجاهين ..هو طريق جانبي مش رئيسي ..وكان فيه عربيه جايه من قدام ..انا واخد يميني ..وهو واخد يمينه ..لغاية هنا وعادي ..هو في ناحيته كوم رمل بتاع عمارة بتتبنى ...طبعا كوم الرمل سادد الناحيه بتاعته ..لقيته قام جاي عايز يعدي من الناحيه بتاعتي اللي أنا ماشي فيها ..قمت أنا ماسك فرامل على آخر وقت..لإنه طبعا بقى وشي في وشه عدل ..مع إني ماشي في طريقي عادي وهو اللي كاسر على الجنب بتاعي ..المهم ببصله وهو بيعدي من جنبي ..بيقولي وطبعا بجنحره وشكله غبي كده ..بيقولي إيه ..روح روح اللي يسهلك روح ..أنا طبعا واقف مش فاهم ..هو فيه إيه ..هو فين بيودي على مين

**hugan** · 27-04-2015 04:15 PM

الحمد لله انك ماتقلبتش
سواقين الميكروباص والدبابه والنقل واتوبيسات 26
ومعاهم العيال اللي بتقضي اي طرق غرز وتقليب نور بعربياتهم الملاكي
شويه بقر راكبين عرببيات

**hugan** · 27-04-2015 04:33 PM

المشاركة الأصلية كتبت بواسطة m_m_sh_a

زود عليهم التاكتك لو سمحت ..متنساش التكاتك ..دي ياما ضربت عربيات وطبقت إجناب وخلعت إكصدامات

التكاتك
ياسلام خليهم علي جنب لو حدهم

**kar!m** · 27-04-2015 06:58 PM

المشاركة الأصلية كتبت بواسطة m_m_sh_a

كنت ماشي في طريق إتجاهين ..هو طريق جانبي مش رئيسي ..وكان فيه عربيه جايه من قدام ..انا واخد يميني ..وهو واخد يمينه ..لغاية هنا وعادي ..هو في ناحيته كوم رمل بتاع عمارة بتتبنى ...طبعا كوم الرمل سادد الناحيه بتاعته ..لقيته قام جاي عايز يعدي من الناحيه بتاعتي اللي أنا ماشي فيها ..قمت أنا ماسك فرامل على آخر وقت..لإنه طبعا بقى وشي في وشه عدل ..مع إني ماشي في طريقي عادي وهو اللي كاسر على الجنب بتاعي ..المهم ببصله وهو بيعدي من جنبي ..بيقولي وطبعا بجنحره وشكله غبي كده ..بيقولي إيه ..روح روح اللي يسهلك روح ..أنا طبعا واقف مش فاهم ..هو فيه إيه ..هو فين بيودي على مين

حصل معايا نفس الموقف بس الشارع مكنش رايح جاي .. كان اتجاه واحد أصلا و شارع رئيسي كمان .. و لما لقيت سواق النص نقل قدامي مره واحده كسرت يمين جامد طلع راسه من الشباك و شتمني و تف عليه كمان !!! .. و ربنا أنا ما كنت كلمته أصلا.

**Dr\Mohamed** · 27-04-2015 07:13 PM

المشاركة الأصلية كتبت بواسطة kar!m

المهم أنا بصيت له كده و قلت له "هو مين اللي غلطان يا اسطى أنا ولا أنت" .. بص لي كده شويه و بعدين قال لي "لأ أنا اللي غلطان" .. و سابني و مشي.

ما شاء الله على أخلاق حضرتك بصراحة أنا شايف إن إللي بالأخلاق والتفكير والعقلية دي يرفع من صورة أي حد ملتحي وكمان أي حد مسلم

ربنا يبارك في حضرتك ويجعلي نصيب من الأخلاق العالية دي

**mif** · 27-04-2015 07:15 PM

الدنيا كلها ابيض و اسود
انا فاكر في مرة سواق اتوبيس 50 راكب و كان الطريق ضيق جدا حارة رايح و حارة جاي . ابويا كان سايق و الاقيه جاي من ورا صاروخ بس ما لحقش يعديي بكامل الاتوبيس و فوجئ بعربية جامبو طايرة فى وشه قام رامي علينا بغباء رهيب و كمان كان بيهدي علشان الطريق بيلف . طبعا ابويا فرمل جامد و العربية كانت خلاص حتقع من على جرف تنزل ارض زراعية بس ربنا ستر .
طبعا تصرفات مريضة و ربنا يستر على الناس كلها.

-

الموضوع: السائق المصري مستحيل يعترف بغلطه

LinkBack

أدوات الموضوع

عرض

السائق المصري مستحيل يعترف بغلطه - انشر الموضوع فى :

-

-

-

-

-

المواضيع المتشابهه

ورشة اصلاح السائق المصري

اصلاح السائق المصري

سيكولوجيا السائق المصري

ورشة اصلاح السائق المصري

عمرو موسي يعترف: طلبت تصدير الغاز المصري لإسرائيل لأدعم موقف المفاوضين العرب

الكلمات الدلالية لهذا الموضوع

المفضلات

المفضلات

ضوابط المشاركة