النترا 2011 على مشارف الـ 120.000 كم
بصراحة مش عارف الموضوع ده هايهم حد ولا لأ لكن حبيت اشارككم بتجربتى مع الالنترا بعد طول غياب عن المشاركة (اخر مشاركاتى كانت تقييمى للعربية بعد 5000 كم) عربيتى موديل 2011 اشتريتها ف يناير يعنى معايا بقالها اربع سنين وكام شهر، باختصار الحفاظ على قيمة العربيات دى والكورى بوجه عام يكمن فى كلمة سر واحدة فقط: الصيانة، انا عارف ان ناس كتير (ودى ثقافتنا كمصريين) بتكبر ف موضوع الصيانة وناس شايفة ان التوكيل حرامية وبياخدو فلوس كتير ع الفاضى، لكن احب اقولكم لوجه الله حافظ على قيمة ومستوى عربيتك وامشى على الكاتالوج اللى عملوه اللى صنعوها حتى لو هاتدفع زيادة ف التوكيل او فى اى مركز خدمة (وهما منتشرين جدا ف كل حتة) .. عن نفسى الحمد لله وبسم الله ما شاء الله لا قوة الا بالله من ساعة ماشتريتها وانا فى ميعاد الصيانة (كل 10000 مش كل 5000 لأن ده اختراع مصرى مالوس اساس) اروح اغير كل اللى بيقول عليه الكاتالوج، كاوتش الفابريكة غيرته على سبعين الف وناوى اغير كل 50000 (خلال اسبوع بإذن الله) الحاجة الوحيدة اللى ما التزمتش بيها البطارية، البربريز عندى كان اتكسر فى مظاهرة وخبطولى الباب الخلفى ومش راضى اعمله علشان محدش يفك الكسوة الداخلية ويقطع الغلاف بتاع الباب من جوة، طبعا بالمسافة دى العربية اتخبطت كتير وفيها تجاريح لكن الحمد لله مقدور عليها ، الخلاصة ان بمعدل الاستهلاك ده السلبيات اللى ظهرت ان دواسة البنزين بقت اتقل ومش بالحساسية بتاعت البداية، بقيت احس احيانا بحركة جامدة فى نقل الفتيس من سرعة اعلى لسرعة اقل او من الاول للتانى الصبح (العربية اوتوماتيك) كأنه بيهبد، برضه الفتيس فى حالة الريفرس R مابيتجيبش للحركة للخلف الا بعد حوالى 2- 3 ثانية ولو على مطلع بترجع لورا، بخلاف ده بسم الله ما شاء الله العربية ممتازة وماندمتش لحظة على اختيارها سواء فى الثبات على السرعات المعقولة (يعنى معاك لحد 160) - التكييف- العفشة (صحيح مابقتش ف نعومة الاول لكنها عامة جميلة) والحمد لله على كل شئ.. ولو اقدر اخدم اى حد عنده استفسار انا بحتفظ بـ record لكل حاجة عملتها ف العربية بالاسعار
تحياتى