هل اوتو سمير ريان ضحكوا عليا؟!!! اشتريت عربية

السلام عليكم ورحمة الله

الحمد لله اشتريت عربية سوزوكي من اوتو سمير ريان ربنا يباركلي فيها...
بس هل اتضحك عليا؟؟ فيه حاجات حصلت بتحسسني ان فيه حاجة مش طبيعية:

1. العربية جت من المخزن واتغسلت وبيتهيألي هيا الوحيدة اللي مكنش عليها لوجو أوتو سمير ريان عليها وحطوه عليها وهيا بتتغسل.

2. مسؤول المبيعات خلاني أخلص مع الخزنة قبل ما أشوف العربية واستعجلني كمان لما جيت أتفرج عليها فرحت خلصت ومضيت إقرار السيارة علطول.

3. ببص في عداد الكيلوميترات لقيت العربية عاملة 105 كيلو (في حين أني ببص في إقرار الإستلام لقيت الموظف كاتبلي 50 بس!!)

4. قاعد بقى في العربية بعد الموظف ما سلمني وخلاص بتفرج في الكتالوج لقيت جواه إقرار استلام سيارة باسم شخص آخر ومن معرض آخر (حجازي موتورز) وتاريخ البيع لها قبل عشرة أيام!!!

-- رجعت للموظف وقلتله على العداد قالي لا دا عادي أصلها ممكن ميبقاش فيه تريلات تجيبها فحد بيجبها من أكتوبر سايقها!! قلت وماله

-- قلتله طيب إقرار الإستلام ده ايه أنا حاسس أن العربية دي فيها حاجة واتباعت قبل كده ورجعت؟!! قالي لا يا فندم ده نسيناه هنا.. احنا بناخد عربيات من حجازي موتورز واسم المشتري ده اسم الموظف بتاعنا... قلتله خلاص أنا هحتفظ بيه قالي لا مينفعش ده لازم يرجع الحركة عندنا ومرضاش وبعته بسرعة لمكان الحركة...!!! الجو كان حر جدا اتخنقت صراحة قلته خلاص متشكر ومشى!!

5. خامس مشكلة بقى أني كنت بطلت العربية بعد ما استلمتها .. حاولت أدورها كتير مفيش فايدة... موظف معدي قلتله يدورهالي حاول فيها كتير على ما دورها وقالي أصلها كانت شرقانة!! (قلت مابدهاش أمشي من هنا)..... رحت العباسية بجيب حاجة من هناك ورجعت للعربية بدورها غلبتني على ما داارت (مع اني كنت مفولها من جمب المعرض)

س1: هل أنا اللي شكاك وهما فعلا بيشتروا من بره ولا الحكاية متطمنش؟
س2: هل أكمل مشي بيها عادي لحد صيانة الألف والتوكيل يشوفهالي؟
س3: المفروض أعمل ايه؟ أبدلها ولا أتوكل على الله وأرخص

(علما بأني قرأت موضوع أحد الأعضاء عن تليين السيارة الجديدة وأن كل ما أخلص الألف كيلو الأولي تليين كل ما كان أحسن للعربية... فسافرت مسافة 150 كيلو)... وشكرا

نوع العربيه
اي موديل من سوزوكي

أعتقد بالمنظر دا العربيه فيها مشاكل . مش طبيعى ابدا ان عربيه زيرو تزهق فى الدواره

هوه في حد بيدفع الفلوس اقبل ميستلم العربية ويعمل تشيك كامل عليها وبعد كل اللي حصل ده قدامك وافقت تستلم ومشيت للاسف حتي لو حبيت ترجع العربية للمعرض مش هيرضي عشان انت مضيت علي ورقة استلام للعربية وانك رجعت كل حاجة فيها والعربية مفهاش اي حاجة حاول تروح لاي ميكانيكي نضيف يكشفلك عليها من كل حاجة عشان تبقي عارف العربية فيها ايه بالظبط ولو طلع فيها حاجة كبيرة ارجع لمعرض وافضحهم هوه ده الحل وان شاء الله ميكونش فيها حاجة

مع احترامي العربيه شكلها كانت مع زبون و رجع في كلامه بعد ما قلبوه في مبلغ محترم و بيعيدوا بيعها

اقتباس:

---

المشاركة الأصلية كتبت بواسطة hany63

مع احترامي العربيه شكلها كانت مع زبون و رجع في كلامه بعد ما قلبوه في مبلغ محترم و بيعيدوا بيعها

---

في الغالب دا اللى حصل

بس فى حتة صغيرة كدا كان ممكن تعملها و تمسكها عليهم

انك لما تلاقي ايصال استلام باسم شخص اخر داخل السيارة مستحيل تطلب من الموظف الاحتفاظ بالوصل لان دا كدا لو العربية لا قدر الله فيها اي حاجة بيدينهم فكان ممكن انك فى صمت تام تصور اى حاجة انت شوفتها زي ايصال استلام للعربية باسم شخص اخر و كمان تعمل فيديو بالموبايل تبين فيه كل تفاصيل الاستلام و انك بتكلم الموظف و تجيب وشه فى الفديو و فوجئت ان العداد 105 كم مش 50 كم و لما بطلتها وجيت تدور غابت معاك فى الدوارة .... و بكدا لو فيه اى غش لا قدر الله بتكون عملية البيع باطلة على ما اعتقد .

هو بصراحة متزعلش منى انت اللى غلطان كان لازم متستلمش غير لما تكون مطمن للعربية معلش اللى حصل حصل انت ممكن تروح لحجازى موتورز و حاول تعرف قصة العربية ديه ايه لو رضيوا يقولوا فيها ايه بس واضح ان حد فعلا استلم العربية و بعدين البيعة ماتمتش لسبب ما حاول تعرف من حجازى موتورز و فكروه باسم اللى استلم العربية لو انت فاكروه انما سمير ريان كويس و راجل فى السوق وليه اسمه مش هيغامر على سمعته بعربية واحدة هو ما شاء الله مش محتاج الشغل بتاع النصب ده و بالتوفيق

حكاية إن العربيه زيرو وتغيب في الدوارة ..حصلت ..حصلت مرتين ..مره مع واحده كانت بنت راجل كبيييييير قوي من خير أجناد الأرض زي ما بيقولوا عليهم ..وكانت طبعا فضيحه ..والعربيه إتبدلت في يوميها ..بعد طبعا تليفونات وتهديدات للسيلز اللي في الصاله إن دي فيها خراب بيت لكل السيلز ..طبعا مفيهاش خراب بيت للوكيل ..هو خراب البيت للغلابه بس من السيلز ..وحصلت مره تانيه مع مواطن عادي جدا ..كان شغال محامي ..وكانت العربيه مكملتش معاه عشرة أيام على بعض ..وهو ساعتها طنش والمشكله إتحلت لوحدها ..أما بقى حكاية إن هي ماشيه 100 كيلو زياده ..فأنا كنت قريت مشاركه هنا لواحد كان شغال سيلز في توكيل سيارات كبير ..وبعدين على كلامه.. هو ساب الشغلانه دي أصلا ...وكان بيحكي بقى أسرارها ومداخلها ومخارجها وحواراتها ..المهم كان فيما قال ..والعهده على من قال ..إن العربيات الزيرو لما كانت بتيجي من المينا وتنزل عندهم في ساحات التخزين قبل ما تروح المعارض ..بيقول كنا بناخد العربيات دي نروح بيها مشاوير خاصه صغيره ..زي مثلا ..حد يروح يجيبلنا غدا ..على أساس إن ساحات التخزين دي في الغالب بتبقى في أماكن بعيده نسبيا عن العمران ..وكان بيقول إن كان ممكن حد ياخدها يروح يجيب بيها سجاير ..بس المهم إن العداد بتاع العربيه دي ما يعدش كتير ..يعني تقدر تقول كانوا بيستخدموها زي بسكلته كده يروح يقضي بيها مصالح صغيره صغيره كده وهو في شغله ..فحكاية العداد دي سواء عند سمير ريان أو عند غيره ممكن تلاقيها عادي ...أما بقى حكاية الإقرار اللي حضرتك لقيته بإسم واحد تاني .. فدي طبعا زي الزملاء ما قالوا ..وارد جدا إنها تكون إتباعت لحد ..وحصل مشكلة ..أيا كانت المشكلة دي ..فالبيعه مكملتش ..فرجع في كلامه ..ممكن يكون الشخص ده جه برضه يدور العربيه ما دارتش معاه قام لاطش معاهم وخد فلوسه وخلع ..ممكن كان عايز يعمل حوار بلطجه كده وكان عايز يبقى فلوس على نفسه فهما وقفوا البيعة ..كده يعني ..عموما ..عموما ..حضرت إستلمت ومضيت ومشيت ..كل حواراتك دلوقتي مع التوكيل ..العربيه زيرو ..ومعتقدش إن هيكون فيها مشكلة كبيره أصلا ..عشان كده خليك على صيانة الألف أو ممكن تروح في أي وقت التوكيل وتقولهم على المشكلة دي ..على أساس إنها مشكلة لا تحتمل التأخير ..بس هي العربيه نوعها سوزوكي إيه ؟؟؟؟

الموضوع مش مريح بالمرة انا لازم نتابع الموضوع ده هينتهى على ايه و بعد التحرى و البحث من الاخ صاحب المشكلة مطلوب منه يبلغنا هل معرض اوتو سمير ريان يوضع فى القائمة السوداء

الموقف دى يخلينا نتأكد من كل شئ قبل شراء اى منتج مش بس عربياا

لو مش مستريح ليها حقوق المستهلك انك تبدل او ترجع في 14 يوم

اكتر حاجة انت غلطان فيها ازاى العربية تدور بصعوبة وانت فى المعرض وتخدها وتمشى لو العربية لسة بتغيب 4فى الدوارة ارجع لسمير ريان وحاول تغيرها

اقتباس:

---

المشاركة الأصلية كتبت بواسطة ram2020

لو مش مستريح ليها حقوق المستهلك انك تبدل او ترجع في 14 يوم

---

بالظبط كده كلم حماية المستهلك من حقك ترجع اي حاجه خلال 14 يوم لو كان فيها اي مشكلة

:_Alshmokh08[1]::_Alshmokh08[1]::_Alshmokh08[1]::_Alshmokh08[1]: يا أستاذ مصباح رجع العربية

العربيه على ماا عتقد فيها مشاكل فى تخريزن والموتور لو انت شيكت قبل كل ده مكنش حصلك كده وانت ليه اشتريتها من سمير ريان

الاخ اللى كتب مشكلته بالنسبة لشراء سيارة جديدة وواضح ان ورائها مشاكل من سمير ريان....فوجئت فى اليوم السابع اليوم بالخبر ده و انا نقلته كوبى بست ..... """كرم بنك " الإمارات - دبى الوطنى"، "شركاء النجاح" من أكبر تجار السيارات فى السوق المصرى نظرا لمجهوداتهم فى التعاون مع البنك فى مجال تقسيط السيارات، وذلك بحضور قيادات البنك وكبار تجار السيارات، بالإضافة الى مجموعة من الصحفيين والإعلاميين لتغطية هذا الحدث الكبير.

واستطاعت شركة "اوتو سمير ريان " حصد المركز الأول لأعلى مبيعات للسيارات بالتقسيط من خلال بنك الامارات دبى الوطنى، وتسلم الجائزة المحاسب سمير ريان رئيس مجلس الإدارة، """" انتهى الكوبى بست.... الحقيقة الواحد مش قادر يصدق اى حاجة فى الاعلام اللى زى ما بيقولوا يعمل من الفسيخ شربات ...الحياة بالوضع ده بقت لا تحتمل الغش و التدليس على العملاء بيقى يكرموا :_Alshmokh08[1]::_Alshmokh08[1]::_Alshmokh08[1]::_Alshmokh08[1]::_Alshmokh08[1]::_Alshmokh08[1]::_Alshmokh08[1]:

واضح ان العربية كان فيها مشكلة و اتباعت قبل كده واللي اشتراها رجعها وطبعا كلام المندوب بتاع المعرض كله هجص عشان يبيعلك العربية و يخليك تمشي , لازم ترجعلهم و تعملهم مشكلة وتعرف ايه حكاية العربية اللي مش عايزه تدور دي

الضمير خلاص , انعدم عند معظم التجار و في سبيل انه يكسب جنيه زيادة ممكن يعملوا اي حاجه

انا محبش الوكلاء المعتمدين دلو تحس ان شايفين نفسهم وانهم هما الى فاهمين فى العربيات وناس مش فاهمه لواحد ياخد من التوكيل الرئيسى على الاقل اهون من دول