هل اوتو سمير ريان ضحكوا عليا؟!!! اشتريت عربية

**Msbah** · 28-04-2015 11:37 PM

السلام عليكم ورحمة الله

الحمد لله اشتريت عربية سوزوكي من اوتو سمير ريان ربنا يباركلي فيها...
بس هل اتضحك عليا؟؟ فيه حاجات حصلت بتحسسني ان فيه حاجة مش طبيعية:

1. العربية جت من المخزن واتغسلت وبيتهيألي هيا الوحيدة اللي مكنش عليها لوجو أوتو سمير ريان عليها وحطوه عليها وهيا بتتغسل.

2. مسؤول المبيعات خلاني أخلص مع الخزنة قبل ما أشوف العربية واستعجلني كمان لما جيت أتفرج عليها فرحت خلصت ومضيت إقرار السيارة علطول.

3. ببص في عداد الكيلوميترات لقيت العربية عاملة 105 كيلو (في حين أني ببص في إقرار الإستلام لقيت الموظف كاتبلي 50 بس!!)

4. قاعد بقى في العربية بعد الموظف ما سلمني وخلاص بتفرج في الكتالوج لقيت جواه إقرار استلام سيارة باسم شخص آخر ومن معرض آخر (حجازي موتورز) وتاريخ البيع لها قبل عشرة أيام!!!

-- رجعت للموظف وقلتله على العداد قالي لا دا عادي أصلها ممكن ميبقاش فيه تريلات تجيبها فحد بيجبها من أكتوبر سايقها!! قلت وماله

-- قلتله طيب إقرار الإستلام ده ايه أنا حاسس أن العربية دي فيها حاجة واتباعت قبل كده ورجعت؟!! قالي لا يا فندم ده نسيناه هنا.. احنا بناخد عربيات من حجازي موتورز واسم المشتري ده اسم الموظف بتاعنا... قلتله خلاص أنا هحتفظ بيه قالي لا مينفعش ده لازم يرجع الحركة عندنا ومرضاش وبعته بسرعة لمكان الحركة...!!! الجو كان حر جدا اتخنقت صراحة قلته خلاص متشكر ومشى!!

5. خامس مشكلة بقى أني كنت بطلت العربية بعد ما استلمتها .. حاولت أدورها كتير مفيش فايدة... موظف معدي قلتله يدورهالي حاول فيها كتير على ما دورها وقالي أصلها كانت شرقانة!! (قلت مابدهاش أمشي من هنا)..... رحت العباسية بجيب حاجة من هناك ورجعت للعربية بدورها غلبتني على ما داارت (مع اني كنت مفولها من جمب المعرض)

س1: هل أنا اللي شكاك وهما فعلا بيشتروا من بره ولا الحكاية متطمنش؟
س2: هل أكمل مشي بيها عادي لحد صيانة الألف والتوكيل يشوفهالي؟
س3: المفروض أعمل ايه؟ أبدلها ولا أتوكل على الله وأرخص

(علما بأني قرأت موضوع أحد الأعضاء عن تليين السيارة الجديدة وأن كل ما أخلص الألف كيلو الأولي تليين كل ما كان أحسن للعربية... فسافرت مسافة 150 كيلو)... وشكرا

**hugan** · 28-04-2015 11:40 PM

نوع العربيه
اي موديل من سوزوكي

**jojojojo** · 29-04-2015 12:11 AM

هوه في حد بيدفع الفلوس اقبل ميستلم العربية ويعمل تشيك كامل عليها وبعد كل اللي حصل ده قدامك وافقت تستلم ومشيت للاسف حتي لو حبيت ترجع العربية للمعرض مش هيرضي عشان انت مضيت علي ورقة استلام للعربية وانك رجعت كل حاجة فيها والعربية مفهاش اي حاجة حاول تروح لاي ميكانيكي نضيف يكشفلك عليها من كل حاجة عشان تبقي عارف العربية فيها ايه بالظبط ولو طلع فيها حاجة كبيرة ارجع لمعرض وافضحهم هوه ده الحل وان شاء الله ميكونش فيها حاجة

**hany63** · 29-04-2015 12:21 AM

مع احترامي العربيه شكلها كانت مع زبون و رجع في كلامه بعد ما قلبوه في مبلغ محترم و بيعيدوا بيعها

**mif** · 29-04-2015 08:26 AM

المشاركة الأصلية كتبت بواسطة hany63

مع احترامي العربيه شكلها كانت مع زبون و رجع في كلامه بعد ما قلبوه في مبلغ محترم و بيعيدوا بيعها

في الغالب دا اللى حصل

بس فى حتة صغيرة كدا كان ممكن تعملها و تمسكها عليهم

انك لما تلاقي ايصال استلام باسم شخص اخر داخل السيارة مستحيل تطلب من الموظف الاحتفاظ بالوصل لان دا كدا لو العربية لا قدر الله فيها اي حاجة بيدينهم فكان ممكن انك فى صمت تام تصور اى حاجة انت شوفتها زي ايصال استلام للعربية باسم شخص اخر و كمان تعمل فيديو بالموبايل تبين فيه كل تفاصيل الاستلام و انك بتكلم الموظف و تجيب وشه فى الفديو و فوجئت ان العداد 105 كم مش 50 كم و لما بطلتها وجيت تدور غابت معاك فى الدوارة .... و بكدا لو فيه اى غش لا قدر الله بتكون عملية البيع باطلة على ما اعتقد .

**aymanshebl** · 29-04-2015 09:25 AM

هو بصراحة متزعلش منى انت اللى غلطان كان لازم متستلمش غير لما تكون مطمن للعربية معلش اللى حصل حصل انت ممكن تروح لحجازى موتورز و حاول تعرف قصة العربية ديه ايه لو رضيوا يقولوا فيها ايه بس واضح ان حد فعلا استلم العربية و بعدين البيعة ماتمتش لسبب ما حاول تعرف من حجازى موتورز و فكروه باسم اللى استلم العربية لو انت فاكروه انما سمير ريان كويس و راجل فى السوق وليه اسمه مش هيغامر على سمعته بعربية واحدة هو ما شاء الله مش محتاج الشغل بتاع النصب ده و بالتوفيق

**Abo_Mazen** · 29-04-2015 09:32 AM

حكاية إن العربيه زيرو وتغيب في الدوارة ..حصلت ..حصلت مرتين ..مره مع واحده كانت بنت راجل كبيييييير قوي من خير أجناد الأرض زي ما بيقولوا عليهم ..وكانت طبعا فضيحه ..والعربيه إتبدلت في يوميها ..بعد طبعا تليفونات وتهديدات للسيلز اللي في الصاله إن دي فيها خراب بيت لكل السيلز ..طبعا مفيهاش خراب بيت للوكيل ..هو خراب البيت للغلابه بس من السيلز ..وحصلت مره تانيه مع مواطن عادي جدا ..كان شغال محامي ..وكانت العربيه مكملتش معاه عشرة أيام على بعض ..وهو ساعتها طنش والمشكله إتحلت لوحدها ..أما بقى حكاية إن هي ماشيه 100 كيلو زياده ..فأنا كنت قريت مشاركه هنا لواحد كان شغال سيلز في توكيل سيارات كبير ..وبعدين على كلامه.. هو ساب الشغلانه دي أصلا ...وكان بيحكي بقى أسرارها ومداخلها ومخارجها وحواراتها ..المهم كان فيما قال ..والعهده على من قال ..إن العربيات الزيرو لما كانت بتيجي من المينا وتنزل عندهم في ساحات التخزين قبل ما تروح المعارض ..بيقول كنا بناخد العربيات دي نروح بيها مشاوير خاصه صغيره ..زي مثلا ..حد يروح يجيبلنا غدا ..على أساس إن ساحات التخزين دي في الغالب بتبقى في أماكن بعيده نسبيا عن العمران ..وكان بيقول إن كان ممكن حد ياخدها يروح يجيب بيها سجاير ..بس المهم إن العداد بتاع العربيه دي ما يعدش كتير ..يعني تقدر تقول كانوا بيستخدموها زي بسكلته كده يروح يقضي بيها مصالح صغيره صغيره كده وهو في شغله ..فحكاية العداد دي سواء عند سمير ريان أو عند غيره ممكن تلاقيها عادي ...أما بقى حكاية الإقرار اللي حضرتك لقيته بإسم واحد تاني .. فدي طبعا زي الزملاء ما قالوا ..وارد جدا إنها تكون إتباعت لحد ..وحصل مشكلة ..أيا كانت المشكلة دي ..فالبيعه مكملتش ..فرجع في كلامه ..ممكن يكون الشخص ده جه برضه يدور العربيه ما دارتش معاه قام لاطش معاهم وخد فلوسه وخلع ..ممكن كان عايز يعمل حوار بلطجه كده وكان عايز يبقى فلوس على نفسه فهما وقفوا البيعة ..كده يعني ..عموما ..عموما ..حضرت إستلمت ومضيت ومشيت ..كل حواراتك دلوقتي مع التوكيل ..العربيه زيرو ..ومعتقدش إن هيكون فيها مشكلة كبيره أصلا ..عشان كده خليك على صيانة الألف أو ممكن تروح في أي وقت التوكيل وتقولهم على المشكلة دي ..على أساس إنها مشكلة لا تحتمل التأخير ..بس هي العربيه نوعها سوزوكي إيه ؟؟؟؟

**ali ashraf** · 29-04-2015 12:24 PM

الموضوع مش مريح بالمرة انا لازم نتابع الموضوع ده هينتهى على ايه و بعد التحرى و البحث من الاخ صاحب المشكلة مطلوب منه يبلغنا هل معرض اوتو سمير ريان يوضع فى القائمة السوداء