إتصالات مصر وأسوأ خدمة عملاء شفتها فى حياتى
الموضوع انى عندى يو اس بى مودم إتصالات من سنه ومشترك فى باقة منجز 25 جنيه فى الشهر وكالعادة كل شهر بشحن الباقة ب 25 جنيه عن طريق برنامج إتصالات على اللاب توب عندى فيه زر شحن الرصيد بكتب ال 14 رقم بتوع الكارت وبيتشحن ومن يومين شحنت كالمعتاد وفعلا اتبعتلى رسالة تفيد بانه تم شحن خطك بقيمة 25 جنيه
جيت بقى اشتغل على النت مش عايز يفتح ويحولنى لموقع اتصالات ومكتوب عليه عذرا رصيدك غير كافى....... ازاى وانا لسه من ثانية واحده شاحن
جربت ابعت رسالة ل 555 اشوف رصيدى يقولى عذرا هذه الخدمة غير متوفرة لنظامك............ طيب اتصلت على طول بخدمة العملاء اول مره رد عليا واحد وقولتله المشكلة بالتفصيل فضل لاطعنى لغاية لما ربنا اكرمه وبيقولى هبعتلك يا فندم رسالة تعرفك ازاى تشغل اليو اس بى مودم وكيفية اعدادها هو انا بس عايز اعرف هظبط فيها ايه ما انا بقالى سنه شغال بيها هى اول مره يعنى اخدته على قد عقله وقفلت ومستنى الرسالة واستنيت يومين ومفيش حاجة اتبعتتلى ..........
اتصلت بيهم تانى يقولى خدمة العملاء مشغوله الان برجاء الانتظار وعمال اسمع لاعلاناتهم لغاية ما حد يفضى مفيش واتقفلت المكالمه يعنى نص جنيه راحوا من غير ما استفيد بحاجة ماشى
اتصلت تالت وده اللى كان مستفز بجد حكيتله للمره المليون القصة بالتفصيل وفضل لاطعنى مده برده وفى الأخر يقولى طب ابعتلى الرقم المسلسل بتاع كارت الشحن ماشى بعت
والرد يقولى هو باين على السيستم عندنا انك شحنت الكارت ده على رقم تانى ازاى يا عم مش هقولك انى حطيت الخط الداتا فى موبايلى وشحنت انا بشحن من اللاب عن طريق البرنامج بتاع اتصالات بتاعكم يقولى لا يفندم ده اللى مكتوب عندنا عمال احاول واقنعه ازاى وهو راسه جزمة ومفيش فايده
طب والحل ........... يقولى اتصل بالرقم اللى بعتله وحاول تتفاهم معاه ويبعتلك الرصيد قيمة 25 .......... لو كان ينفع اشتم والمصحف لكنت هشتم يعنى هتصل بنفسى مثلا ما الرقم اللى شحنته هو رقمى هتصل بمين مش فاهم يقولى بس حاول تتفاهم معاه.......... قمة التخلف بجد شديت معاه فى المكالمه وقولتله انتوا اسواء خدمة شفتها فى حياتى يقولى لا يفندم احنا اسرع شبكة واحنا بنقول لحضرتك اللى مكتوب طيب هو ماشى مكتوب على السيستم بس ده غلط منكم حاول بقى تحل المشكلة بتاعتى مش تقنعنى بالكلام اللى مكتوب عندك وعلشان اثبت غبائهم بس ماهو لو انا فعلا على كلامهم لو شحنت خط تانى بالغلط طب ازاى اتبعتلى رسالة عندى وبيقولى تم شحن خطك بقيمة 25 جنيه
يقولى لا يا فندم ما انا شرحت لحضرتك ........... شرحت ايه وهببت ايه على دماغك وفى النهاية اللى يغيظ يقولك تؤمر بحاجة يا فندم .......... ما انا اتنيلت وامرت ومفيش حاجة اتحلت Etisalat Misr والنعمة لأفضحكم أكتر وأكتر ماهو انا لو فى دولة محترمه مكنتش هسمع الكلام ده وكان على الاقل هيتبعتلى قيمة الكارت اللى دفعته على الفاضى وتتحل المشكلة بدون وجع الدماغ دى