الموضوع ده كبير ومالهوش مقاييس وأنا حأحاول أفكر معاك واحدة واحدة:
- الرانجلر من أول سنة ١٩٨٧ لغاية تقريباً ١٩٩٦ كانت بتنزل بطراز اسمه yj
- الطراز ده يتميز بإنه الطراز الوحيد فى الرانجلر اللى فوانيسه الأمامية مربعة ومساحات الزجاج الأمامى تلاقيها واقفة قرب النص ( دى علامات مميزة جداً للـ yj)
- فيه منها ٢ باب شاسية قصير( ودى أمريكانى) وفيه منها ٢ باب شاسية طويل (زى بتاعة الجيش)
- العربيات دى فيه منها مواتير ٦ سلندر ٤١٠٠ ومواتير ٦ سلندر ٤٠٠٠.
- العربيات الجيب فيها ميزة ان رقم الشاسية نفس رقم الموتور( اخر اربع ارقام فى الشمال للشاسية هما نفسهم للموتور وده اللى بيتكتب فى الرخصة بتاعة العربية)
- لو لقيت واحدة ٢ باب شاسية قصير رقم الشاسية والموتور زى بعض يبقى انت حظك حلو إن إحتمال كبير تكون العربية متلعبش فيها.
- حتلاقى العربيات دى حاجة من دول :
١) عربية محترمة ومتحافظ عليها ومش معمول فيها اى تعديلات ( فى حدود ٣٥ - ٤٥ الف جنيه)
٢) عربية محترمة ومتحافظ عليها ومعمول فيها تعديلات زى الرفع والاكصدامات والسقف الفيبر ودى فى حدود من ٥٠ الى ٨٠ الف جنيه حسب الموديل والحالة.
٣) عربية مشغولة يعنى واحد اشترى شاسية قديم واشترى عربية متقطعة وركبها على الشاسية القديم ودى منصحكش بيها ودى كتير منها فى السوق .
- أهم حاجه ان كل حاجة تكون شغالة فى العربية زى مثلاً فتيس الغرز والعدادات اللى فى نص التابلوة
- الموديلات اللى بعد كده فى الرانجلر قليله قوى ونادرة جداً فى مصر (من ١٩٩٨ لغاية ٢٠٠٦)
أهم حاجه تكشف عليها كويس فى المرور وعند ميكانيكى بيفهم فى العربيات دى .
وتحت أمرك فى اى استفسار.
المفضلات