صيانة للالنترا 2009 واليكم اسعار قطع الغيار
السلام عليكم ورحمة الله وبركاته
أول مرة اعمل موضوع في قسم الهيونداي رغم ان العربية بقالها معايا اكتر من شهرين
المهم
ربنا وفقني واشتريت عربية النترا 2009 اوتو الفئة الاولي
كنت عملت صيانة اول ما اشتريتها واليكم التفاصيل
تغير جوز مساعدين امامي استيراد 400 جنيه
تغير طقم بيض مقصات ومسامير ميزان واتياش وجلب علبة الدريكسيون
تم ظبط حساسات الفتيس لان كان حساس السرعه مش شغال
اشتريت 2 فرده كاوتش امامي مقاس 195/65 ماركة كيوتو ب 650
طقم طاسات جديدة لان القديمة كانت متخربشة وعلشان أظبط شكل العربية 130 جنيه
ودي كانت الصيانه الاولي
اما الصيانه الحالية كانت الأساسية علشان أكون مطمن وعملت الاتي
تيل امامي كوري 120
تيل خلفي 110 جولد
تيل فرامل اليد وللاسف ملقتش غير الاصلي 370
فلتر هواء كوري 40
فلتر بنزين 130
طرمبة بنزين غيرتها لان كانت القديمة ضعيفه نسبيا ماركة بوش الماني 150
فلتر زيت فتيس 150
زيت فتيس موبيل 5*60 = 300
قميص للمروحة لانه كان فيه كسر بسيط وخوفت يزيد 200
مكثف للمروحه لان القديمة كان مش شغال 100
والمفأجاة ان المساعدين الاستيراد مكملوش ألف كيلو ولاقيت عليهم زيت للاسف وانصح الناس تخليها في الجديد في حاجة العفشة
جوز مساعدين امامي kyp 850 جنية وبصراحه سعرهم عالي مش عارف ده الطبيعي ولا ايه
كشف كمبيوتر 50 جنيه وطلعت العربية تمام ماعدا موضوع طرمبة البنزين وتم تغيرها
لعبت في دماغي اجيب الجنوط الاصلي بتاعة العربية ال16 علشان اتقل الباور شوية
وبصراحه الميكانيكي بتاعي راح الوكالة اكتر من مرة علشان يشفلي الموضوع ده
والمهم جبت اربع جنوط أصلي 16 بالكاوتش حالتة تقريبا 70 واخد الكاوتش بالجنوط بتاعتي بالطاسات الجديدة ودفعت 2000 فرق بس فرق جدا بصراحه
طقم صواميل جديدة علشان الشكل مع اكرامية لتركيب الكاوتش بالجنوط 50 جنيه
ترصيص وظبط زوايا وغسيل خارجي 85
تغير 2 لمبه فانوس شابوره 60 جنيه
تغير لمبه العالي في الفانوس الكبير ب25 جنيه
والحمدلله العربية تمام
لو حد محتاج أي سؤال تحت امره في أي حاجه