الموضوع: المزادات ..

المزادات ..

فكرت مرة ازاى بتتعمل المزادات .. هدفها إيه .. الفايدة منها ليك وللي عاملها إيه .. تعالى نتكلم شويه عنها ..
المزاد حكايته انه بتكون هناك جهة أو هيئه أو شركه قطاع عام أو خاص عنده مهمات مش محتاجها سواء جديدة أو مستعملة
عاوز يستفاد من المكان اللي مخزن فيه المهمات دى وكمان يستفاد من تمنها اللي يعتبر فلوس واقفة
فبيعمل الإجراءات التالية :
1. جرد وتصنيف لمحتويات المخزن عنده
2. تقدير تمن عادل يريد بيعها بيه
3. الإعلان عن جلسه للمزاد بميعاد محدد وبالأصناف الموجودة لديه
4. عقد الجلسة وقبول الأسعار المناسبة والقريبة من تقديره

ملحوظة : المزادات تخضع في مصر لقانون 98 في شأن تنظيم المناقصات والمزايدات .

طيب حضرتك ممكن تستفيد إيه ؟
هوة ده المهم من الموضوع
المزاد ممكن يكون كنز واترمى عليك وممكن العكس !!
يعنى لو فاهم في البضائع الموجودة قدامك وعارف سعرها وعارف مين بيحتاجها يبقى تمام ولو مش كده يبقى
اقرأ كويس عنوان المزاد وعدى من الشارع اللي ورآه !!
طيب مفيش حل انى أكون مش فاهم وعاوز اعمل شغل من الحكاية دى .. فيه طبعا .. انك تدور على اللي فاهم وتخليه يتمن البضاعة ويقدرها وياخد مقابل مادي
وبعد كده تشوف المشترى عن طريق أخر وبرضه بمقابل .
والأفضل في البداية المبالغ تكون بسيطة .. لأنه هناك نسبه مخاطرة حتى للمزايد القديم .. زى مثلا بعض أنواع البضاعة سعرها ينزل بعد انتهاء المزاد ودي محدش له يد فيها .

مش عارف كده أنا لخصت الموضوع ولا لاء عموما لو فيه استفسار ممكن أجاوب على حسب معلوماتي القليلة .