الموضوع: تجربتى مع الفيات سيينا و مشاكلها التى لا تعد ولا تحصى

فضلت سنتين بدافع عن فيات سيينا و حاببها جدا لكن علاقتى بيها كانت من بعيد لبعيدعربيه واسعةو شيك و تكييف و باور و ازاز كهربا و شنطة اد البحر و سعر مقبول و فى الفترة دى قررت اقرب اكتر و اشترى واحدة طبعا قررت على 1400 سى سى نظرا لقله المشاكل لكن المشاكل الى شوفتها كتير مابالكم بال1600 الى مشاكلها المفروض اكتر و شوفت عدد عربيات كتير جدا حوالى 8 عربيات كلهم فيهم عيوب مشتركة و عيوب لا تغفر لأى عربيه ولا حتى توك توك

عشان مبقاش قاسى فى حكمى هقول المميزات الاول
عربيه شكلها مقبول من الخارج تنفع شباب او كبار
صاجها حلو
صالونها مقبول جدا و الكنبه لو واحد 170 سم هيرتاح جدا فيها
التابلو سهل التعامل فيه و العدادات واضحه لكن فيها كارثه هشرحها بعدين
التكييف لو انت قاعد ادام جميل لو فى الكنبه متوسط
العزل كويس يعنى صوت الماتور مش بيعلى اوى
شنطتها كبيرة جدا لو فى سفر هترتاح
قطع الغيار مش غاليه اوى زى مابيتقال بس متوفرة

العيوب و دى عيوب كارثيه
عمرى ماكنت اتخيل كلمة السخونيه الى قولت هذكر كارثه فى العدادات بتاعتها دى هتوصل للدرجه دى فى كل العربيات الى شوفتها انا على طول بشوف فى اى عربيه مؤشر الحرارة اقل من النص حاجه بسيطة لكن دى مش فى النص بس دى دايما فوق النص حتى لو اتحركت خطوات اخر واحدة اخدتها من ميامى لوينجت و الاسكندرانيه عارفين ان دى مش مسافه احب اقول لحضراتكم ان مؤشر الحرارة كان قرب جدا من الخط الاحمر و على فكرة دة ولا عيب مروحة ولا وصلات ولا خراطيم الردياتير ولا المكنه ولا الترموستات لان فيه ناس اذكيه قالوا انها فيها ترموستات بتسخنها عشان الدول الساقعه كل ده اتغير ولا اى حاجه هيا من النهايه ليها استخدام معين لو عديته هتقلب بسخونيه لا حل له و ان كانت فيه حلول هتكون مؤقته لا تتعدى شهرين و دة كلام ناس من ملاكها و اكيد محدش هيطلع عيب فى حاجه بيمتلكها بمعنى اصح مش عادتنا كمصريين اننا نقلل فى حاجه بتاعتنا بس ده امر واقع و كل الميكانيكيه و متخصصين الردياتير كل مايشوفوها بيركزوا فى عداد الحرارة و يقولولى مالهاش حل يقعد معاك الا شهرين و ده ممكن تغير جوان او يأثر على المكنه و الحوض كله طبعا انا مش فاهم ولا كلمة لانى مش بفهم فى الميكانيكا بس الميكانيكى الى روحتله ده من النهايه بيفهم من اول سيات 133 لحد بورش كايين انا حاولت اقنع نفسى ان دى مشكله بسيطة و قولت برضه هشتريهل انا اتخنقت من اللف على عربيه لدرجه ان الميكانيكى اتحرج بسببى و ندالى واحد معاه سيينا نفس الموديل 2002 و ماشيه حوالى 85 الف كيلو يعنى حاله نادرة جدا و قالى انه جايبها من اقل من سنه و صرف على السخونيه بس 10 الاف جنيه و بيدور على اى عربيه تانيه لانه خايف يطلع بيها تتحرق و بيدور على اى عربيه تانيه فى حدود 25 الف لانه هيبيعها بالسعر ده رغم انها مش محتاجه جرام بويه زى مابيقولوا بس مش قادر يستحملها

تانى عيب
مفيش فيات سيينا شوفتها مفيهاش بارومه فى الاربع ابواب و الاربع ابواب بألفين جنيه و اخرهم سنتين تلاته و البارومه هتسرح فيها ده اذا مجيبتهمش فيها بارومه لدرجه ان الراجل فك الفرش بتاع الابواب شوفت مهذله جوه و عايز اقولكم على كارثه انا شوفت الابواب دى قبل ما اروح للميكانيكى حوالى ساعتين و سبحان الله نفس الاماكن الى شوفتها دى لما هوا ورهالى تانى بعد ما مسحها بقماشة مبلوله و نشفت شوفت العجب و الوان متغيرة و صدا رهيب

تالت عيب
مكنه السيينا غدارة بجد و اسئل اى ميكانيكى عليها ممكن تبقى صوتها واطى جدا و سحبها كويس و فجأه تلاقى نفسك محتاج عمرة لان لو مكنتها خفيفه مش هتحس

رابع عيب
العربيه و انت سايقها لو ناوى تبص وراك او فى المرايا او بتركن هتتخنق من اليوم الى ركبت فيه عربيات حتى لو راكب ريو جديدة او النترا الجديده رغم بومبيهاتهم الكتيرة بس دول حلوين جدا لكن دى فيها حاجه غلط يمكن محتاجه تعود او ده عيب منى و من ناس زيى

دى العيوب الى لاحظتها فى الفتره الاخيرة و ماخفى كان اعظم
يعنى لو تحت ايدى فيات سيينا ممكن تكون سبب فى انتحارى
و مش عايز حد من ملاكها يتضايق يمكن العربيه الى معاه موصلتش للحالات دى لانه ممكن يكون اول مالك ليها و مرتاح كدة
بس انا عرفت ليه الناس بتقول عليها الكلام ده كله بس عمر ماحد فهمنى ليه بيقولوا كدة
الحمد لله اننا فهمت بنفسى قبل ما اتدبس

طيب فين الميكانيكية اللى روحتلهم فى الاسكندرية علشان انا من اسكندرية وبندوخ لما نلاقى ميكانيكى فاهم وكويس