الموضوع: نسافر و لا نقعد في مصر!!!!!

المشاركة الأصلية كتبت بواسطة mahmoud naguib

هو بس خليني أقولك على شوية نقاط صغيرين من متابعتي لموضوعك ده والموضوع القديم

حضرتك مش حابة تتغربي وف نفس الوقت حابة تعملي فلوس للمستقبل !!
ومش حابة مستواكي يقل شوية عن هنا وف نفس الوقت عايزة مجتمع نضيف وراقي
حابة تغامري بس مش حابة تروحي مكان مش عارفاه !!

في متناقضات كتير عندك لآزم تحددي الأول أولوياتك وتعمليها
هنا هو بيشتغل ف بنك كويس وانتي سيبتي شغلك
العرض بتاع الكويت أفضل من هنا على حسب كلامك
غير انه انتي هنا لسة هتدوري على شغل !!

كونك لسة هتدوري ده ف حد ذاته دافع يخليكي تسافري لأنه لو دورتي بره هيبقى العرض برضه أفضل من هنا بكتير
يبقى هو يشتغل وانتي معاه هتعملوا فلوس كويسة

نقطة مهمة لآزم تاخدي بالك منها
حياتكم ف مصر مش هتطير !!
بمعنى انكم لو سافرتوا 5 سنين ورجعتوا مش هتحسوا بفرق اساسا !
ولو 15 أو 20 أو أكتر كمان !!

بعيدا عن ظروف البلد السيئة جدا واللي متطمنش أصلا لآزم تجربوا حاجة جديدة
عرض كويس وظروف حلوة وهتقدروا تعملوا حاجة وطول ما انتم مع بعض مش هتحسوا بغربة
المصريين ماليين الكويت والتواصل بقى بالاسكايب كأنك قاعدة مع العيلة هنا !!
وبالرغم من المميزات دي كلها انتي عايزة برضه كل حاجة ف وقت واحد وده مستحيل يحصل
انتم ربنا مديكم نعم كويسة بلاش تضيعوها وبالأخص فرصة السفر دي

حياة جديدة ناس تانية مكان أفضل عرض مغري مغامرة دي كلها دوافع تخليكي تسافري من غير تفكير أساسا !

استخيري ربنا وف السفر 7 فوائد زي ما بيقولوا وربنا يكتبلكم الخير

انت معاك حق ان انا مترددة فعلا بس الموضوع مش تناقض قد ما هي مخاوف من حاجة مجهولة بالنسبة لي. انا اكتشفت ان فعلا الواحد كل ما سنه بيكبر خوفه من المخاطرة بيزيد، يمكن بسبب المسئوليات و بسبب انه عنده حاجات بناها في سنين بيخاف يفقدها.

و الانسان بطبعه عايز كل حاجة :-) طبيعي ان انا مكونش عايزة انزل في مستوايا خصوصا لو مضطرة، انما اكيد حاتنازل عن حاجات تانية. كفاية البعد عن الاهل ده لازم يكون له تمن

I'm working in gulf area around. 8 years ago.
One year in Qatar. And the rest in saudi.
Just two month ago I started my work in kuwait
.What I can tell you about kuwait the it is very similar to Egypt
You will not feel home sick here

المشاركة الأصلية كتبت بواسطة borio1704

أنا عايش في جدة بقالي حوالي سنتين... وكنت زمان قوي عايش مع أهلي في الكويت في السبعينات والثمانينات.

بالنسبة للسن... مفيش أي مشكلة حتى لو سنكو كبير... أنا جاي السعودية هنا عندي 40 سنة.


عايز أوضح بعض الفروق بين العيشة في مصر والعيشة في دول الخليج..

1- دول الخليج منظمة وأحيائها مخططة كويس والتعامل الحكومي متقدم وكل حاجة بالإنترنت والكمبيوتر.. يعني التعامل اليومي أسهل بكتير.


2- مصاريف المعيشة اليومية أغلى بكتير من مصر... وتكاد تكون الضعف إذا ما كانش أكتر.. وهنا لمست إن حتى مواد البقالة اللي بنشتريها من السوبرماركت بضعف ثمن نفس البضاعة اللي في مصر... بس مع فارق الجودة.


3- مصاريف إيجار الشقة أعلى بكتير من مصر..
يعني مثلا.. في السعودية اللي تعتبر أرخص دولة في الخليج من ناحية الإيجار.. متوسط إيجار شقة غرفتين في حي مقبول حوالي 20 ألف ريال سنويا (في قطر حوالي 40 ألف ريال)... وأتوقع إن الكويت أعلى من السعودية.


4- مصاريف التعليم عالية جدا...
وطبعا.. غير مسموح لغير مواطني الدولة بدخول المدارس الحكومية إلا لفئات معينة.. وبالتالي مضطرين نروح للمدارس الإنترناشونال..
مدى السعر في السعودية 15 - 40 ألف ريال سنويا للطفل الواحد حسب مستوى المدرسة طبعا.

5- العلاج والمستشفيات
لو ما كانش عندكم تأمين صحي تابع للعمل.. فمصاريف العلاج جبارة... ده غير ثمن الأدوية (مفيش أدوية رخيصة.. ويفضل تاخدوا معاكو مؤن من مصر من الأدوية اللي بتستخدموها كتير).


6- المواصلات...
مفيش مواصلات عامة إلا فيما ندر... والاعتماد ممكن يكون على التاكسي.. وده غالي وما أنصحش بيه إلا في الشديد القوي.


7- نظام الكفيل
ما دام الشغل في بنك يبقى إن شاء الله مفيش مشاكل... لإن لو الكفالة على شخص كويتي.. فالموضوع معتمد بشكل أساسي على العلاقات الشخصية.


8- التعامل مع الكوايتة...
فعلا.. الكوايته معروف عنهم إنهم متعجرفين.. وعندهم شيء من العنصرية.. بس طبعا مش كلهم.


9- التعامل مع الجنسيات الأخرى
مجتمع دول الخليج بشكل عام مجتمع متعدد الجنسيات.. ولازم نتقبل إننا ممكن في أي وقت نتعامل مع هنود وباكستانيين وعرب وأمريكان وأوروبيين وغيرهم..
ده يمكن بيدي شيء من الاحترام في التعامل.


10 - التأقلم مع الجو والمناخ
جو الكويت معروف إنه جو متطرف... يعني في الشتا بارد جدا (زي جو مصر في الشتا وأبرد).. والصيف أكتر منطقة حارة في الكرة الأرضية (بدون مبالغة)... والحرارة "الرسمية" في الصيف 47-49 مئوية... وما بيقولوش إنها وصلت فوق الـ50 علشان ده معناه إن الناس تاخد أجازة رسمية طول الصيف ومحدش هيروح الشغل نهائيا.


11- أماكن الفسح
فيه أماكن كتير... والجناين والشواطئ موجودة ومتاحة وأغلبها مجاني.. والنوادي بردو موجودة.. ده غير المولات والسينمات (مفيش سينمات في السعودية) ... يعني حياة طبيعية جدا... بس في الشتا بس.


12- السيارة شيء حيوي وضروري جدا..
ويستحسن تشتروا عربية كويسة بتكييف محترم بمجرد صدور الإقامة.




وأخيرا... التأقلم على الحياة هناك مطلوب... وطبيعي إن الواحد هيفتقد أشياء بيحبها كان متعود عليها في مصر... بس فيه حاجات تانية ممكن تعوض شوية في الحياة خارج مصر.. بس بعد فترة تقدروا تعرفوا ناس جديدة وتكونوا صداقات بتهون كتير على الواحد.

حاليا .. جروبات المغتربين على الفيسبوك سهلت التعارف جدا.. وممكن جدا تتعرفوا على مصريين في الكويت عن طريق الجروبات دي.



وآخر نصيحة... حاولوا تستمتعوا بحياتكم .. وما تأجلوش كل حاجة لما ترجعوا مصر...

لأن فعليا وعن تجربة... الواحد بيتصدم صدمة كبيرة لما بيرجع مصر بعد الغربة من تصرفات الأهل اللي أحيانا بتتغير .. ده غير إعادة التأقلم على الحياة الصعبة في مصر مرة تانية.



...

انا من الحاجات اللي قالقاني موضوع الجو ده. يعني الصيف ال49 درجة ده كام شهر في السنه؟ و التكييفات بتخلي الدنيا مقبولة الفترة دي و لا ايه؟

انا موافقة حضرتك جدا ان الواحد لازم يحاول يستمتع بحياته و يمتع اولاده و مش بافهم خالص الناس اللي بتبقى مقرطة على نفسها و هي مقتدرة.

المشاركة الأصلية كتبت بواسطة omar101970

i'm working in gulf area around. 8 years ago.
One year in qatar. And the rest in saudi.
Just two month ago i started my work in kuwait
.what i can tell you about kuwait the it is very similar to egypt
you will not feel home sick here

و ده يعتبر مدح و لا ذم ;-)؟

المشاركة الأصلية كتبت بواسطة hh

و ده يعتبر مدح و لا ذم ;-)؟

I will reply in details once I come back home
Typing on phone cell is not simple for me