نسافر و لا نقعد في مصر!!!!!

hh · 06-05-2015 03:18 PM

كنت عملت موضوع من فترة عن شغل جاي لجوزي في الكويت. هو كان طلب منهم شوية تعديلات و هما بعتوا عرض جديد يعتبر كويس.

دلوقتي الموضوع دخل في الجد و الناس مستنية منه رد. رغم اننا كنا متحمسين و مستنين العرض ده انما بصراحة انا قلقانة قوي. فكرة تغيير حياتنا بالشكل ده و اننا نسيب كل حاجة نعرفها و متعودين عليها و نبتدي في مكان جديد و بلد غريبة علينا و منعرفش فيها حاجة تخوف بجد. خايفة منتأقلمش علي البلد او نكتشف ان الغربة اصعب ما احنا متصورين. بس في نفس الوقت نفسي بجد في بداية جديدة و نفسي نقدر نعيش في مكان انضف و احسن من مصر في كل حاجة و يبقي عندنا فرصة نكبر اكتر و نعمل حاجات كتير لمستقبلنا صعبة في مصر.

عايزة الناس اللي جربت السفر و الغربة تقولي رأيها خصوصا الناس اللي عاشت في بلد خليجي. ايه مميزات الحياه هناك و ايه العيوب، تنصحوني بايه كواحدة مش عارفة حاجة خالص عن الحياه في الخليج. الناس اللي جربت تعيش في الكويت بالذات انطباعاتكم ايه عن البلد و اهلها و الحياه فيها؟

انا بجد محتارة و محتاجة حد يفكر معايا بصوت عالي. يا ريت متبخلوش عليا بمشاركاتكم و ارائكم

**وليد 1** · 06-05-2015 03:37 PM

أولاً: للغربة ثَمنُها ...ويجب يكون عند حضرتك وزوجك الفاضل هذا الأستعداد

ثانياً: كل بلد فيها الحلو وفيها الوحش ...

ثالثاُ: بالنسبة للكويت هى بلد ( لتكوين مستقبل ) يعنى ممكن تفتقدى حاجات كتيرة جدا كنتى بتعمليها فى مصر

الناس هناك كويسين لكن عندهم زى ما بنقول كدة ( تعجرف حبتين )

طبعا مش كل الشعب الكويتى كدة ولا للتعميم ..وهناك نسبة كبيرة من المصريين

وفيه كوايتة متجوزين مصريات وناس زى الفل

حسب كلام حضرتك أن ربنا بعت لكم ( فرصة )

شكلكم لسة سنكم صغير ...إن ماكنتوش تتعبوا دلوقتى هتتعبوا أمتى ؟

أتوكلى على الله وربنا يوفقكم ويسدد خطاكم

hh · 06-05-2015 04:13 PM

لا احنا الحقيقة سننا مش صغير خالص :-D

انا و جوزي في منتصف التلاتينات و هو بيشتغل في بنك و انا مهندسة بس لسة سايبة الشغل من اسبوع و مستقرتش علي حاجة جديدة. الحمد لله وضعنا في مصر كويس و مستقر بس زي كل الناس اكيد بنسعي للاحسن.

انا باقول فرصة حلوة اولا لأنها بالنسبة للكارير بتاع جوزي هي خطوة كويسة جدا بنك كبير و position حلو و مرتب كويس. ثانيا لأننا كان نفسنا نطلع برة البلد بكل مشاكلها و قرفها اللي كلنا عارفينه طبعا.

الغربة ليها تمنها طبعا عشان كدة احنا مش مستعدين نعيش في مستوي اقل من اللي عايشين فيه في مصر. بالعكس المفروض اننا بنحسبها بناء علي مستوي اعلي شوية سواء في الحياه اليومية او مدارس الولاد و خلافه.

حضرتك بتقول لازم تبقوا مستعدين لتمن الغربة و ان الكويت بلد تحويش بس و حنفتقد حاجات كتير كنا بنعملها. ممكن توضح اكتر تقصد ايه هو التمن ده؟ و ايه الحاجات اللي شايفنا حنفتقدها في مصر؟

**Hobgoblin** · 06-05-2015 04:53 PM

بصي يا فندم...

أنا عايش برة مصر من فترة وأقدر أقول لك الفرصة كويسة جداً لأن شغل زوج حضرتك في بنك...ولو بنك كبير وله إسمه يعني هيكون فيه إستقرار.

مش هيكون فيه شغل مواقع أو مندوبين دعاية أو ما شابه وطبعاً دة شغل مرهق أكثر.

الكويت ماعرفش عنها حاجة غير سماعي والناس بتشكر. وقريبة من مصر يعني ممكن اجازات كثير.

إذا كان العرض مادياً مريح ويخليكم تعيشو كويس وتعلمو الاولاد كويس جداً يبقى السفر طبعاً.

بالتوفيق

**YahiaAshraf** · 06-05-2015 04:57 PM

نصيحه متسيبوش الفرصة دى وعلى اول طيارة عدل :)
انا عن نفسى مستنى اتخرج من الجامعة وهسافر على طول
مفيش مستقبل فى مصر ولو فكرنا نكون بلد محترمه هيبقى كمان يجى 100 سنه نكون انتقلنا الى رحمة الله

**swimmer25** · 06-05-2015 05:03 PM

على حسب الراتب وهل عاوزين تحوشوا منه لشراء شقة مثلا أو عربية ولا بس عشان تعيشوا بيه في مستوى أحسن..ده لتقديركم لأنكم أدري بالوضع الحالي ليكم والوضع المتوقع لما تسافروا بس دايما إحسبوا مصاريفكم في الخليج على أعلى تقديرات التكلفة مش أقل التقديرات

وعموما الحياة في الخليج مفهاش مشاكل غير إنك هتلاقي طعم الأكل متغير شوية عن مصر بس هتتأقلموا مع الوقت
والمصاريف بتزيد بحكم إن الحياة غالية لأن السعودية حاجة وباقي الخليج حاجة تانية من حيث تكلفة المعيشة
وكمان القلق اللي الواحد بيكون دايما فيه لو الأب والأم عايشين عشان هتبقوا عايزين دايما تطمنوا عليهم وخصوصا لو كانوا لوحدهم في مصر بعد ما تسافروا
ده غير طبعا إن مصاريف المدارس أعلى من مصر لو الولاد في مدارس خاصة عادية لغات في مصر ولكن هتلاقيها زي مصر تقريبا لو بنقارن المدارس إنترناشيونال
وتخلوا بالكم من التأمين الطبي الشامل لزوجك وليكم كلكم معاه مش بس له هو..أنا متبهدل بهدلة السنين بسبب الموضوع ده
غير كدا طبعا نظام ونضافة وإحترام

وأخيرا الإستخارة هي الأهم

hh · 06-05-2015 05:32 PM

انا متشكرة جدا لردودكم. طيب هي الحياه في الخليج اخبارها ايه؟ ايه اللي ممكن نفتقده في مصر -غير الاهل و الاصحاب طبعا- و ايه اللي حنلاقيه احسن؟

انا عارفة ان اسئلتي عامة قوي بس انا عايزة كل واحد يقوللي تجاربه :-)

**borio1704** · 06-05-2015 05:48 PM

أنا عايش في جدة بقالي حوالي سنتين... وكنت زمان قوي عايش مع أهلي في الكويت في السبعينات والثمانينات.

بالنسبة للسن... مفيش أي مشكلة حتى لو سنكو كبير... أنا جاي السعودية هنا عندي 40 سنة.

عايز أوضح بعض الفروق بين العيشة في مصر والعيشة في دول الخليج..

1- دول الخليج منظمة وأحيائها مخططة كويس والتعامل الحكومي متقدم وكل حاجة بالإنترنت والكمبيوتر.. يعني التعامل اليومي أسهل بكتير.

2- مصاريف المعيشة اليومية أغلى بكتير من مصر... وتكاد تكون الضعف إذا ما كانش أكتر.. وهنا لمست إن حتى مواد البقالة اللي بنشتريها من السوبرماركت بضعف ثمن نفس البضاعة اللي في مصر... بس مع فارق الجودة.

3- مصاريف إيجار الشقة أعلى بكتير من مصر..
يعني مثلا.. في السعودية اللي تعتبر أرخص دولة في الخليج من ناحية الإيجار.. متوسط إيجار شقة غرفتين في حي مقبول حوالي 20 ألف ريال سنويا (في قطر حوالي 40 ألف ريال)... وأتوقع إن الكويت أعلى من السعودية.

4- مصاريف التعليم عالية جدا...
وطبعا.. غير مسموح لغير مواطني الدولة بدخول المدارس الحكومية إلا لفئات معينة.. وبالتالي مضطرين نروح للمدارس الإنترناشونال..
مدى السعر في السعودية 15 - 40 ألف ريال سنويا للطفل الواحد حسب مستوى المدرسة طبعا.

5- العلاج والمستشفيات
لو ما كانش عندكم تأمين صحي تابع للعمل.. فمصاريف العلاج جبارة... ده غير ثمن الأدوية (مفيش أدوية رخيصة.. ويفضل تاخدوا معاكو مؤن من مصر من الأدوية اللي بتستخدموها كتير).

6- المواصلات...
مفيش مواصلات عامة إلا فيما ندر... والاعتماد ممكن يكون على التاكسي.. وده غالي وما أنصحش بيه إلا في الشديد القوي.

7- نظام الكفيل
ما دام الشغل في بنك يبقى إن شاء الله مفيش مشاكل... لإن لو الكفالة على شخص كويتي.. فالموضوع معتمد بشكل أساسي على العلاقات الشخصية.

8- التعامل مع الكوايتة...
فعلا.. الكوايته معروف عنهم إنهم متعجرفين.. وعندهم شيء من العنصرية.. بس طبعا مش كلهم.

9- التعامل مع الجنسيات الأخرى
مجتمع دول الخليج بشكل عام مجتمع متعدد الجنسيات.. ولازم نتقبل إننا ممكن في أي وقت نتعامل مع هنود وباكستانيين وعرب وأمريكان وأوروبيين وغيرهم..
ده يمكن بيدي شيء من الاحترام في التعامل.

10 - التأقلم مع الجو والمناخ
جو الكويت معروف إنه جو متطرف... يعني في الشتا بارد جدا (زي جو مصر في الشتا وأبرد).. والصيف أكتر منطقة حارة في الكرة الأرضية (بدون مبالغة)... والحرارة "الرسمية" في الصيف 47-49 مئوية... وما بيقولوش إنها وصلت فوق الـ50 علشان ده معناه إن الناس تاخد أجازة رسمية طول الصيف ومحدش هيروح الشغل نهائيا.

11- أماكن الفسح
فيه أماكن كتير... والجناين والشواطئ موجودة ومتاحة وأغلبها مجاني.. والنوادي بردو موجودة.. ده غير المولات والسينمات (مفيش سينمات في السعودية) ... يعني حياة طبيعية جدا... بس في الشتا بس.

12- السيارة شيء حيوي وضروري جدا..
ويستحسن تشتروا عربية كويسة بتكييف محترم بمجرد صدور الإقامة.

وأخيرا... التأقلم على الحياة هناك مطلوب... وطبيعي إن الواحد هيفتقد أشياء بيحبها كان متعود عليها في مصر... بس فيه حاجات تانية ممكن تعوض شوية في الحياة خارج مصر.. بس بعد فترة تقدروا تعرفوا ناس جديدة وتكونوا صداقات بتهون كتير على الواحد.

حاليا .. جروبات المغتربين على الفيسبوك سهلت التعارف جدا.. وممكن جدا تتعرفوا على مصريين في الكويت عن طريق الجروبات دي.

وآخر نصيحة... حاولوا تستمتعوا بحياتكم .. وما تأجلوش كل حاجة لما ترجعوا مصر...

لأن فعليا وعن تجربة... الواحد بيتصدم صدمة كبيرة لما بيرجع مصر بعد الغربة من تصرفات الأهل اللي أحيانا بتتغير .. ده غير إعادة التأقلم على الحياة الصعبة في مصر مرة تانية.

...