المشاركة الأصلية كتبت بواسطة sab3aawy
بعض المعلومات الفنية البسيطة التى ستساعدك على فهم السواقة بشكل افضل تتعلق بوظيفة كل اداه من الادوات اللى حواليكى
1- دواسة البنزين وظيفتها انها بتفتح او تقفل او توارب الباب اللى بيدخل منه الهواء والوقود للمحرك، فكل ما انت بتدوسى عليها انتى بتزودى قدرة المحرك على اعطاء طاقة والكلام ده بينعكس على ان المحرك دورانه بيزيد وصوته يعلى ويسحب العربية اسرع كل ما انتى تدوسى زيادة، لما بتشيلى رجلك من على دواسة البنزين بتمنعى الهواء والوقود على المحرك فيبدأ فى التباطوء
2- دواسة الدبرياج بتشتغل على مجموعة اسمها مجموعة فصل الحركة والمجموعة دى مكانها بين المحرك وبين صندوق التروس، فانتى لما بتدوسى على دواسة الدبرياج فناتى بتفصلى الموتور عن باقى اجزاء الجر فى العربية ، وده احنا بنحتاجه لعدة استخدامات، الأول هو تغيير نسب التخفيض(ألغيارات) لأن هذة العملية تستلزم فك ترس من تروس السرعات وتعشيق آخر وهذا لا يمكن عمله عندما يكون الموتور متصل بصندوق التروس حركيا، لأن سرعة دوران الموتور ستتسبب فى تخبيط اجزاء صندوق التروس عند اجراء النقلات لذلك لابد من فصل المحرك، نحتاج للدبرياج ايضا عند بداية الحركة بالسيارة، لأن بعد تدوير المحرك يكون لدينا الحالة الآتية، المحرك يدور، وصندوق التروس وباقى آلات الجر المتصلة بالعجلات متوقفة، لذلك لابد من ان نرتقى بسرعة آلات الجر تدريجيا حتى تصل الى سرعة المحرك، وهذا هو ما نفعله عند بداية الحركة، نفصل المحرك عن آلات الجر بواسطة الدبرياج، نضع عصا السرعات على الترس الاول، ثم نبدأ فى رفع القدم اليسرى عن الدبرياج تدريجا لكى تبدأ مجموعة فصل الحكة فى التلاقى تديريجا فتبدأ الات الجر فى الحركة تدريجا بواسطة الاحتكاك بين طرفى مجموعة الفصل(بعد فترة هتعرفى ان الطرفين دول اسمهم ديسك واسطوانة) حتى تصل سرعة آلات الجر الى سرعة دوران المحرك وهنا نرفع قدمنا تماما من على الدبرياج لاتمام الاتصال بين المحرك وآلات الجر، الاستخدام الثالث للدبرياج هو فصل المحرك عن آلات الجر فى حالة الفرملة حتى التوقف التام، حيث انه لو توقفت آلات الجر(بتوقف العجلات) تماما دون ان افصل عنها المحرك فهذا سيؤدى الى توقف المحرك(يبطل) حيث ان اتصال المحرك بآلات الجر التى وصلت سرعتها الى صفر سيجبرها الى ان تنخفض سرعته الى صفر وهو ما معناه ان المحرك هيبطل، لذلك اثناء الفرملة نقوم بفصل المحرك عن آلات الجر باستخدام الدبرياج (او نقل عصا السرعات الى الوضع المحايد"المور" والذى بدوره يفصل المحرك عن آلات الجر) ، متفرقش كتير ندوس الفرامل الأول وبعدين الدبرياش، او ندوس الدبرياج الأول وبعدين الفرامل، المهم ندوس الدبرياش قبل ما العربي تتوقف تماما علشان الموتور ميبطلش، وقبل رفع القدم عن الدبرياش اما اننا نمور علشان نفصل المحرك عن آلات الأجر من نقطة اخرى(من داخل صندوق التورس) بما يسمح لنا اننا نشيل رجلنا من على الدبرياش بدون توقف المحرك، او اننا نحط عصا السرعات على النقلة الأولى لو كنا ننوى معاودة الحركة
3- الفرامل: ودى مهما بلغت درجة تعقيدها فى السيارات الحديثة فكرتها الأساسية متفرقش عن فرامل البسكليتة اللى كنا بنركبها زمان، قبقابين كاوتش بيمسكو فى الاطار المعدنى بتاع العجلات علشان يكبح حركتها، وفرامل القدم بتشتغل على الأربعة عجلات ، كل عجلة عليها قبقابين(بنسميهم تيل فرامل) يمسكها ساعة لما نفرمل، وبالتالى هى مالهاش علاقة غير بالعجلات ، لاتتدخل فى عمل المحرك ولا تتدخل فى عمل صندوق التروس او آلات الجر الأخرى، لذلك اثناء استعمالى للفرامل التى توثر على العجلات فقط، لابد انى اشيل رجلى من على دواسة البنزين علشن الموتور يبطئ(علشان كدة اتصممت السيارات بحيث ان البنزين والفرامل بنفس القدم علشان مينفعش ادوس على الاتنين فى وقت واحد، وكذلك لما انا ادوس الفرامل بحتاج بقدمى الأخرى ادوس دبرياج علشان افصل الموتور عن العربية علشان اديها فرصة تقف بدون ما المحرك يبطل،، او ممكن انى ادوس دبرياش وانقل عصا السرعات على المور وبعدين اشيل رجلى من على الدبرياج تانى، هنا بيكون المتور مفصول عن آلات الجر والعجلات من جوة الفتيس وبالتالى مش مشكلة انى اشيل رجلى من على الدبرياش بعد ما امور حتى لو بفرمل
4- عصا السرعات: ودى ببساطة ليها 3 وظايف، الوظيفة الأولى هى اختيار نسبة التخفيض المناسبة لسرعة السيارة، يعنى الأولى والتانى...حتى الخامس، وده بيتم عن طريق مجموعة من التروس المختلفة الأقطار، نحصل على نسبة تحفيض مختلفة بتعشيق كل 2 منها مع بعض، يعنى مثلا فى السيارات العادية لما بنكون معشقين الأولانى كل 4 لفات بيلفهم الموتور ، عمود الخرج بتاع صندوق التورس بيلف قصادهم لفة واحدة، لما بنعشق التانى بتكون النسبة 2.5 الى 1، لما بنعشق التالت بتكون النسبة 1.5 الى 1 ، لما بنعشق الرابع بيتكون النسبة 1 الى 1 ، لما بنعشق الخامس عمود خرج صندوق التروس بيلف اسرع من المحرك، يعنى بتكون النسبة مثلا لفة وربع من عمود خرج صندوق التروس الى لفة واحدة من المحرك ،
وسبب وجود اكتر من نسبة تخفيض ووجود عصا السرعات ووجع القلب ده كله ان المحرك مبيقدرش يشتغل غير فى مدى محدود من السرعات اقل منها عزمه بيكون ضعيف جدا واكثر منها ممكن يتكسر، يعنى مثلا لو عملنا عربية مافيهاش غير رابع، لو جيت اطلع بيها من السكون الموتور هكيون عزمه ضعيف جدا انه يطلعها على نسبة التخفيض دى وبالتالى الموتور هيبطل والعربية مش هتطلع، ولو عملنا عربية مافيهاش غير أولانى بس، العربية هتطلع معانا زى الفل لكن على ما توصل ل 60 الموتور هيكون بيلف على 7000 لفة فى الدقيقة ويتكسر ، لذلك لابدا من نسب مختلفة تخلينى اقدر احصل على مرونة فى السرعات المختلفة من محرك غير مرن بطبيعة تصميمه
الاستخدام التانى لعصا السرعات هو وجود نقطة اخرى اقدر افصل منها المحرك عن آلات الجر (وضع المور) ، ولو النقلة دى مش موجودة كنت هلاقى ان انا من ساعة ما ادور العربية لحد ما ابطلها لازم اكون يا اما ماشى بيها يا اما دايس دبرياش، الفرق بين الدبرياش وبين وضع المور ان الدبرياج فقط هو اللى اقد اخرج بيه من وضع فصل الحركة الى وضع تعشيق الحركة، لأنه مصمم بحيث يعشق الحرك بشكل تدريجى لما بشيل رجلى من عليه ، لذلك انا لما بحرك العربية من السكون، يكون الفتيس على المور-يعنى الموتور مفصول من آلات الجر- بدوس دبراج وكدة بحقق نقطة فصل اخرى- يعنى الموتور ديلوقتى مفصول عن آلات الجر من حتتين، الدبرياج ووضع المور، وبعدين اعشق الأولانى، هنا انا لغيت فصل الحركة بتاع الفتيس بس لسه عندى بتاع الدبرياج، وبعدين ابتدى اشيل رجلى من على الدبرياج واحدة واحدة علشان ارفع سرعة آلات الجر تدريجيا لحا ما تجيب سرعة الموتور وتتحرك السيارة
فاضل حاجة واحدة احنا متكلمناش عليها، انا كل كلامى فى تحريك السيارة عن رفع القدم اليسرى من على الدبرياش، طب فين شوية البنزين اللى بنديهم بالفدم اليمنى علشان احرك السيارة، الفكرة كالآتى انا لما بشيل رجلى من على الدبرياج لحظة تحريك السيارة انا بحط حمل على المحرك فطبيعى ان الحمل ده يبطى سرعة المحرك(نشبهها لو عندنا عربية لعبة بالبطارية ، جينا وهى ماشية ورحنا حاطين اى حاجة تقيلة فوق منها، طبيعى ان هنلاقى سرعتها بطات ويمكن تقف خالص حسب التقل اللى حطيناه فوق منها، ما ينطبق على العربية اللعبة ينطبق على محرك السيارة وعلى أى آلة) ، فعلشان اعوض الحمل ده بفتح باب الوقود شوية بدواسة البنزين علشان خاطرالموتور يقبل الحمل وميبطلش منى، ممكن ادى البنزين قبل ما اشيل رجلى من على دواسة الدبرياش ،وممكن وانا بشيلها ، وممكن-بعد ما اتعود شوية على العربية-بدى بنزين عند اللحظة اللى بحسها وانا بشيل رجلى من على الدبرياج ان حصل التعشيق بين المحرك وآلات الجر، وممكن لو انا بتحرك بالراحة محتاجش ادى بنزين خالص ، وهكذا
ارجو ان شوية المعلومات دى تكون مفيدة