الموضوع: تجربتى مع زيت الشنبر

المشاركة الأصلية كتبت بواسطة pepo2011

ياباشا انا شايف انك تشوف ميكانيكي تاني وبدل المصاريف دي كلها تعمل نص عمرة او طقم شنبر طالما الموضوع بسيط ولسة في بدايتة
زيت الشمبر بيبقي حقنة مسكن لحد ماتعمل عمرة او تغير مكنة وانا اعرف ناس استخدمتة سنة بحالها لحد ماغير العربية جرب الابرو او موبيل

أخى العزيز ا / pepo2011 .. أنا قلت مسكن أوقف به نزيف الزيت لحد ما أبقى أدخل فى شغل الموتور ... بس حالة الموتور اللى عندى ما ينفعش فيه حاجه إسمها نص عمره ... فتحت الموتور يبقى تحت إيدك مبلغ محترم تقدر تلم بيه شغل العربية جربت النص عمره ده فى عربية 132 واتبهدلت فى الديون بسبب إن الموضوع فى بدايته كان مجرد 500 .. 600 جنيه بس كبيرها على كلام الميكانيكية دخلت فى 3500 جنيه وبرضوا عمره خلتنى بعت العربية وهى فى التليين ...
بشكر مشاركتك الغالية ونصيحتك محل إحترام وتقدير

المشاركة الأصلية كتبت بواسطة shake

من الافضل فتح الموتور وعمل طقم الشنبر

حبيبى الغالى .. زى ما قالت فتح موتور يعنى 5000 جنيه تحت ايديك تحت العجز والزيادة .. إدعولى ربنا يرزقنى واكمل سداد تمن العربية وبعدين أغير مكنه كامله بالفتيس حتى وإن كان الفتيس اللى عندى سليم
... بشكر نصيحتك الغاليه ومشاركتكم بتهون عليا اللى انا فيه

المشاركة الأصلية كتبت بواسطة hugan

ريح دماغك من العك بتاع الورش
سقط ماكينه وريح دماغك

إدعيلى أنى أسقط مكنه فعلاً وأنا بأيد رأيك أنه أحسن من عك الورش اللى فاهمه فى كل العربيات ... إتفضل يا فندم أيوه تحب تشرب إيه ... والبس يا معلم فاتوره بأد كده

المشاركة الأصلية كتبت بواسطة hema111

لا داعى للقلق ، كل اللى حضرتك ذكرته طبيعى جدا يحصل وده بسبب انه تمت اضافة عبوة كاملة من زيت الشمبر ولكن علشان تحصل على نتيجة أفضل من ذلك يتم أولا تغيير الزيت ووضع كمية أقل فى الموتور بمعنى لو ان العربية بتاخد 4 لتر فى المعدل الطبيعى هاتضع لها 3 لتر فقط ثم تبدأ بادارة الموتور وتترك العربية لحد ما تسخن يعنى حوالى 15 دقيقة ثم تبدأ باضافة نصف عبوة زيت الشمبر فقط وده بيكون والموتور شغال ثم تتحرك بالعربية لمدة 30 دقيقة وتشوف اداء العربية ولو محتاجة اضافة لزيت الشمبر ممكن تزود ولكن بحرص شديد وبكميات صغيرة جدا مش شرط انك تضيف العبوة بالكامل ممكن العربية تشتغل كويس جدا بنصف العبوة أو ثلاثة ارباع العبوة( بحيث ان مقاس الزيت لا يتعدى المكسيمم بأى حال من الاحوال ) و زيت الشمبر اللى انا جربته وكان ممتاز معايا كان عبارة عن عبوة بلاستيك شفافة تقريبا حجمها 355 مل ولون السائل اصفر زى عسل النحل من منتجات شركة أبرو...... كل ما ذكرته لك مبنى على تجربتى الشخصية مع هذا النوع من الزيوت ... وأتمنى لك التوفيق فى الاصلاح باذن الله

أخى العزيز / تقريباً ما ذكرته فى طريقة تغيير الزيت وإضافة زيت الشمبر تقريباً عملناها ما عدا إن الميكانيكى ضاف عبوة الزيت كلها وبعدين أنا خدت العربية مشوار محترم بعدها يعنى العربية كانت بتتصيّن فى فيصل وانا من شبرا اخدت بيها الدائرى بالليل وانا مروح علشان اشوف سحبها فى الطوالى ... والزيت أبرو .. والله أبرو
بشكر مشاركتك الغالية ونصيحتك محل تقدير واحترام

المشاركة الأصلية كتبت بواسطة m_m_sh_a

أهو شفت بقى ..آدي كمان رأي بيرجح الإبرو ..مع إختلاف طريقة وضع الزيت بس برضه ..الراجل بيقول الإبرو كويس ..بالنسبه للسادة الأعضاء اللي بينصحوا بفتح المكنه ..المكنه بطيخه مقفولة يا جماعة ...وياعالم لو فتحها هتفتح معاه في إيه ..والحل الأسلم إنه يسقط مكنه ..طبعا ده رايي ..ورأيكم برضه معتبر ..بس الراجل عايز يزق بالعربية شوية لغاية ما ياخد قرار في حكاية التسقيط أو التعمير ..وإحنا بنقترح عليه برضه

بشكر نصايحكم وإن شاء الله ممكن أبقى أحاول إنى أستشير ميكانيكى تانى فى إضافة الزيت من عدمه وخصوصا إنى عرفت من بعض المواضيع فى المنتدى إن فيه بعض الزيوت الخاصة بالمواتير بيكون فيها من مكونات زيت الشمبر يعنى ممكن ما تكونش محتاج إنك تضيف زيت شمبر لزيت الموتور .. ممكن أبقى أسأل فى الموضوع ده وخصوصاً إحنا داخلين على نار الصيف وسخونية المواتير ...

وانا مع رائ الأخ الكريم / m_m_sh_a .. إن المكنه بطيخه مقفوله لو فتحتها ... قابل يا معلم والحق سدها ... أنا بس بزق بيها شويه لحد ما ربنا يعدلها ... وبخصوص نوع زيت الشمبر زى ما قولت كان أبرو

المشاركة الأصلية كتبت بواسطة windofchange

ممكن تجيب زيت موتور ليكوي مولي لزوجة 15 50 وده يمشيك 10000 كم وهو زيت موتور ولكن بداخلة اضافة الشمبر ديه + تجيب اضافة شمبر تحطها عالزيت ده اسمها سيراتيك وديه تعمل 150 ج تقريبا وقبل ده كل تعمل غسيل للموتور فلاش من ليكوي مولي برضه دور عالفيس علي صفحة اسمها xpress shop ليكوي مولي بيبيعوا الزيت ويوصلوه للبيت



عن تجربة الزيت كان بينقص معايا ال عشرة الاف كم بينقص عند ال5000 كم وجبت اللي بقلك عليه فوق وكنت بمشي ال10000 كم الحمدلله وممكن فالمستقبل تقلل لزوجة الززيت شويه تجيب 10 40 وده يمشيك 10000 كم برضه وجواه اضافة شمبر ويحسن سحب المكنة معاك برضه عن الاولاني بس كل ده رهن الزيت الاولاني هيعمل معاك ايه وتابع المقاس دائما لحين ماتوصل ال10000 كم بيه ان شاء الله بس ممكن فالاول يمشيك اقصاه 5000 كم مثلا لحين مالمكنة تظبط عليه وقاعدة عامة لو الموتور بياخد 4 لتر زيت والاضافة زيت الشمبر او ايا يكن نص لتر يبقي تحط 3.5 لتر زيت موتور ونص لتر الاضافة يبقي كده 4 لتر بالتمام والكمال لان الزيت الزيادة يتحرق ويضرب لك جوانات

الأخ العزير / windofchange
مشاركة غالية منك ونصيحة ممتازة إنها بالصور كمان علشان أبقى عارف أنا هجيب ايه ... بس فيه سؤال أنا لو حطيت الزيت ده هيفضل فى المكنه أصلاً والا هيحصل أخواته اللى يتاكلوا كل 200 أو 300 كيلوا على حسب المشوار جوه البلد والا على الطرق السريعه متوسط ربع كيلوا لـ كيلوا وربع فهل الزيت ده هايكمل معايا شويه ويا ترى ثمنه كام بالإضافات اللى أنا هاجيبها معاها تدخل فى كام تقريبا علشان انت عارف ممكن أقع تحت وطئة النصب ... وهل ممكن أشتريه أنا من مكان معروف أرحله ألاقيه موجود هناك ... ومننساش أنا الموتور اللى عندى دايو ليجانزا 2000 سى سى مانيوال ومش بيدخن الدخنه المزعجه فى بعض العربيات الشبيهه بعربيات رش الناموس بس نقص الزيت فيه ملحوظ مع عدم وجود تسريب من أى جوانات أو أولسيهات يعنى تحت العربية دايما نظيف ما فيش بقع زيت والا حاجه ....
بشكرك على النصيحة الغالية وهاستنى ترد عليا علشان وانا رايح للميكانيكى ابقى عندى حل جديد ينفذهولى

المشاركة الأصلية كتبت بواسطة windofchange

بص يااسلام باشا السيراتك ب150 ج وفلاش الموتور ب40 ج والزيت ب280 تقريبا..وطبعا ممكن حالة موتورك تختلف عن اي موتور تاني وجدير بالذكر ) ان ليكوي مولي شركة شغالة من سنة 1920 وتخصصها زيوت موتور واضافات زيوت ومنتجات عناية بنظافة وجمال العربية...ممكن تجيبه من محل بمدينة نصر اسمه باور زون لكن انا مضمنش انك هتلاقي عنده كل حاجة https://www.facebook.com/pages/Power...&tab=page_info

حبيب قلبى الغالى / windofchange
أشكر إهتمامك وسرعة ردك عليا أنا بإذن الله هابقى أروح أسأل على الزيت ده والإضافات التانية وأتمنى بإذن الله يكون فيه فرق للأحسن فى أداء الموتور وتوفير أكالان الزيت