تجربتى مع زيت الشنبر

**إسلام أبو حامد** · 10-05-2015 04:37 AM

السلام عليكم ورحمة الله

إخوانى الإعزاء اللى زى حالاتى اللى خبرتهم على أدهم فى ميكانيكا السيارات ..
بدايةً إشتريت سيارة دايو ليجانزا موديل 99 مانيوال الحالة أساسيات ممتازه .. موتور فيه نسبة دخنه ملحوظه بعد العربية ما تسخن .. المهم على أد الفلوس اللى كانت معايا ونظافة العربية كأساسيات إشتريت العربية وانا عارف إن بعد سنه أو سنتين بالكتير ها غيره .. ابديت اعمل الصيانات الأولية بتاعت تغير بوجيهات وسير المجموعة والكشف على زيت الباور وخلافه .. نيجى بقى لزيت الموتور

تم تغيير الزيت القديم بزيت شيل الأصفر 20_50 وتغير الفلتر وتغيير جوان غطا التاكيهات مع غطاء الزيت وكلها حاجات أصلية GM المهم بعد ما عملت الشغلانه دى وكله تمام يا فندم هابتدى بقى أجرب الأداء .. مشوار والتانى بتاع 300 كيلو وإذ بالزيت نقص من الميكس لـ المنيمم وعلى فكرة طريقتى فى القيادة مثالية بمعنى إنى لا بحرق على الغيار والا بأمريك سواقة أواخر السبعينات .. المهم روحت لمركز صيانة أشوف الموضوع شاروا عليا بزيت بإضافة الشنبر

هو الحل لمنع نقص الزيت .. روحت جبت عبوة زيت شنبر ثمنها 20 جنيه عبوه لونها أخضر مرسوم عليها بستم وتم إضافة محتواياتها بعد إضافة مقدار كيلو من زيت شيل الأصفر لتعويض النقص وإدارة الموتور مدة 15 دقيقة للتسخين ومن ثَم إضافة زيت الشنبر العبوه 443 مللى زيت أشبه بالعسل الأبيض فى لونه ولزوجته وكشفنا على منسوب الزيت تانى كله تمام يا فندم .. خدت العربية علشان أجرب بقى واحس بالفرق وإذ بالصدمه صوت الموتور عالى فى الضغط على البنزين .. سحب العربية اتخنق عن الأول .. إستهلاك البنزين زاد عن الأول .. نقص الزيت وتأكله قل بنسبه كبيرة .. بس العربية بقت زفت فى كل حاجه .. فما كان منّى غير إنى فضيت الزيت كله تانى بالفلتر بعد ما مشيت بالعربية مسافة 240 كيلوا وظهرتلى كل المشاكل دى

وجبت شيل الأحمر اللى بيقولوا عليه 3000 وخسرت فى الموضوع ده 135×2 = 270 + 100 +20+85=475 جنيه وكله تحت مشورة مركز الخدمة مش أنا وبقيت ماشى بجركن زيت شيل الأحمر فى شنطة العربية كل ما الزيت ينقص أزود

فا نصيحة إياكم من اللجوء لزيت الشنبر لو الموضوع دخنه خفيفة مع نقص فى الزيت

لو العربية نوعاً ما حديثة إنما أنا معرفش لو العربية من مركات الفيات واللادا وغيرها من موديلات السبيعنات ممكن بينفع معاهم

الحل .. يا تغير الموتور لو لاحظت نقص فى الزيت بإستمرار أو تعمره ... أو تمشى بجركن زيت يكون زيت ثقيل نسبياً فى شنطة العربية وسيبك من موضوع ده زيت 10000 وده زيت 5000 والإشتغالات اللى بتحصل ساعة النغيير كله هايتاكل وينقص
سا محونى أطلت عليكم

**ahmed_moeaz** · 10-05-2015 08:10 AM

مش حل ابدا انك تفضل ماشى بجركن زيت وتزود منه ، انت اول حاجة تغير مركز الخدمة بتاعك ده وتشوف واحد محترم تانى يبص على الماتور ويشوف ايه اللى محتاجة ومتصبرش عليه اكتر من كده كل ما هتمشى بيها والماكينة خفيفة هتفتح معاك اكتر ف العمرة ياما تكون ناوى تسقط ماتور استيراد

**Abo_Mazen** · 10-05-2015 09:35 AM

الحاجات اللي حضرتك حكيت عليها دي بعد إضافة زيت الشنبر مع مصداقية حضرتك مبالغ فيها شوية .زيت الشنبر فعلا بيعمل معاك رعشة في المكنه بس وهي بارده بس .. ..كنت حاطه عندي في 128 ..كان بيخلي المكنه تبقى عامله زي غسالة الملابس القديمه من كتر الإهتزاز بتاعها وكنت الاقي العربيه كلها بتتهز ..أول ما تسخن ..خلالالالالاص ..تبقى كويسه وكله تمام ..بصراحه هو ضبط معايا الكبس بتاع الموتور ..حقيقي حسيت بفرق في السحب والكبس بتاع المكنه للأفضل وكنت ما شاء الله بحط بيها سرعات 140 على الطرق المفتوحه ده لو الريح معايا..وارد قوي يكون زيت الشنبر اللي حضرتك جبته غشيم قوي ووحش ..يعني نوعية تقيلة قوي ..أنا كنت جايب زيت شنبر إبروا ..كانت العبوه ب 13 جنيه في 2011..أكيد ممكن تكون وصلت ل 20 جنيه دلوقتي ..عموما هي لونها مش أخضر ..مش أخضر ..لإن حضرتك بتقول جبت زيت شنبر لون العبوه أخضر ..وأنا أشك في نوعية زيت الشنبر اللي حضرتك جبته..إنه ممكن يكون للمكن الديزل أصلا مش لمكن البنزين ..وفكك من التاجر اللي باعلك إنه قالك ده يمشي مع أي حاجه ..خليك في الإبرو ذو العبوه الصفراء وعن تجربة ..حضرتك ممكن تجرب زيت شنبر إبرو ..كويس ....المكنه بمجرد ما تسخن هيبقى ولا كأنك حاطط أيها زيوت شنابر ..طبعا كل الكلام ده على أساس إن حضرتك بتعمل إعدام مبكر للمكنة عشان حضرتك كده ناوي تسقط مكنه ..على فكره ..أنا ال 128 اللي كانت معايا كان الزيت بيقعد فيها لغاية 1000 كيلوا باشا ..ما ينقصش نقطه ..بعد الألف كيلوا يبدأ بقى ينقص ..الكلام ده على زيت مصر للبترول ..ده من غير زيت الشنبر..بعد كده بقيت أجيب زيت التعاون الجركن البرتقالي ..مكتوب عليه سوبريكس 10000..وعلبة زيت شنبر إبرو ..وإضرب ده مع ده ..ودوس وإكبس .كنت بنزله بعد 3000 كيلوا مش ناقص نقطه ..ولا كنت حاسس بإن المكنه خفيفة أصلا ..بإستثناء الرعشة بتاعة المكنه قبل ما تسخن ..على فكره ..الوضع الي أنا بقوله لحضرتك ده عرفته من ناس عملت كده وقعدت ماشيه بالعربيه خمس سنين ومحستش بمشكلة ..لكن في النهاية ..بيبقوا عارفين إن المكنه دي مش نافعه تاني ..

**pepo2011** · 10-05-2015 10:52 AM

ياباشا انا شايف انك تشوف ميكانيكي تاني وبدل المصاريف دي كلها تعمل نص عمرة او طقم شنبر طالما الموضوع بسيط ولسة في بدايتة
زيت الشمبر بيبقي حقنة مسكن لحد ماتعمل عمرة او تغير مكنة وانا اعرف ناس استخدمتة سنة بحالها لحد ماغير العربية جرب الابرو او موبيل

**shake** · 10-05-2015 11:18 AM

من الافضل فتح الموتور وعمل طقم الشنبر

**hugan** · 10-05-2015 11:53 AM

ريح دماغك من العك بتاع الورش
سقط ماكينه وريح دماغك

**Abo_Mazen** · 10-05-2015 09:10 PM

المشاركة الأصلية كتبت بواسطة hema111

لا داعى للقلق ، كل اللى حضرتك ذكرته طبيعى جدا يحصل وده بسبب انه تمت اضافة عبوة كاملة من زيت الشمبر ولكن علشان تحصل على نتيجة أفضل من ذلك يتم أولا تغيير الزيت ووضع كمية أقل فى الموتور بمعنى لو ان العربية بتاخد 4 لتر فى المعدل الطبيعى هاتضع لها 3 لتر فقط ثم تبدأ بادارة الموتور وتترك العربية لحد ما تسخن يعنى حوالى 15 دقيقة ثم تبدأ باضافة نصف عبوة زيت الشمبر فقط وده بيكون والموتور شغال ثم تتحرك بالعربية لمدة 30 دقيقة وتشوف اداء العربية ولو محتاجة اضافة لزيت الشمبر ممكن تزود ولكن بحرص شديد وبكميات صغيرة جدا مش شرط انك تضيف العبوة بالكامل ممكن العربية تشتغل كويس جدا بنصف العبوة أو ثلاثة ارباع العبوة( بحيث ان مقاس الزيت لا يتعدى المكسيمم بأى حال من الاحوال ) و زيت الشمبر اللى انا جربته وكان ممتاز معايا كان عبارة عن عبوة بلاستيك شفافة تقريبا حجمها 355 مل ولون السائل اصفر زى عسل النحل من منتجات شركة أبرو...... كل ما ذكرته لك مبنى على تجربتى الشخصية مع هذا النوع من الزيوت ... وأتمنى لك التوفيق فى الاصلاح باذن الله

أهو شفت بقى ..آدي كمان رأي بيرجح الإبرو ..مع إختلاف طريقة وضع الزيت بس برضه ..الراجل بيقول الإبرو كويس ..بالنسبه للسادة الأعضاء اللي بينصحوا بفتح المكنه ..المكنه بطيخه مقفولة يا جماعة ...وياعالم لو فتحها هتفتح معاه في إيه ..والحل الأسلم إنه يسقط مكنه ..طبعا ده رايي ..ورأيكم برضه معتبر ..بس الراجل عايز يزق بالعربية شوية لغاية ما ياخد قرار في حكاية التسقيط أو التعمير ..وإحنا بنقترح عليه برضه

**إسلام أبو حامد** · 11-05-2015 12:17 AM

المشاركة الأصلية كتبت بواسطة ahmed_moeaz

مش حل ابدا انك تفضل ماشى بجركن زيت وتزود منه ، انت اول حاجة تغير مركز الخدمة بتاعك ده وتشوف واحد محترم تانى يبص على الماتور ويشوف ايه اللى محتاجة ومتصبرش عليه اكتر من كده كل ما هتمشى بيها والماكينة خفيفة هتفتح معاك اكتر ف العمرة ياما تكون ناوى تسقط ماتور استيراد

الأخوة الأعزاء أشكر مروركم الغالى ومشاركتكم لى بأرائكم اللى أكيد بستفيد منها .... أ/ حمد .. أنا لجئت لموضوع الجركن اللى فى الشنطه ده لسد باب نقص الزيت وكمان أنا لسه جايب العربية وضلعتنى فى ثمنها ولسه عليا فلوس من تمنها علشان أفتح شغل فى الموتور .. بس نصيحتك محل تقدير واحترام أنا فعلاً ناوى فى المستقبل إنى أسقط موتور

**windofchange** · 11-05-2015 12:50 AM

ممكن تجيب زيت موتور ليكوي مولي لزوجة 15 50 وده يمشيك 10000 كم وهو زيت موتور ولكن بداخلة اضافة الشمبر ديه + تجيب اضافة شمبر تحطها عالزيت ده اسمها سيراتيك وديه تعمل 150 ج تقريبا وقبل ده كل تعمل غسيل للموتور فلاش من ليكوي مولي برضه دور عالفيس علي صفحة اسمها xpress shop ليكوي مولي بيبيعوا الزيت ويوصلوه للبيت

عن تجربة الزيت كان بينقص معايا ال عشرة الاف كم بينقص عند ال5000 كم وجبت اللي بقلك عليه فوق وكنت بمشي ال10000 كم الحمدلله وممكن فالمستقبل تقلل لزوجة الززيت شويه تجيب 10 40 وده يمشيك 10000 كم برضه وجواه اضافة شمبر ويحسن سحب المكنة معاك برضه عن الاولاني بس كل ده رهن الزيت الاولاني هيعمل معاك ايه وتابع المقاس دائما لحين ماتوصل ال10000 كم بيه ان شاء الله بس ممكن فالاول يمشيك اقصاه 5000 كم مثلا لحين مالمكنة تظبط عليه وقاعدة عامة لو الموتور بياخد 4 لتر زيت والاضافة زيت الشمبر او ايا يكن نص لتر يبقي تحط 3.5 لتر زيت موتور ونص لتر الاضافة يبقي كده 4 لتر بالتمام والكمال لان الزيت الزيادة يتحرق ويضرب لك جوانات

الموضوع: تجربتى مع زيت الشنبر

LinkBack

أدوات الموضوع

عرض

-

-

-

-

-

المواضيع المتشابهه

متى يتم تغيير طقم الشنبر للموتور ؟ وما هى الاعراض لما طقم الشنبر يبوظ ؟

متى يتم تغيير طقم الشنبر للموتور ؟ وما هى الاعراض لما طقم الشنبر يبوظ ؟

متى يتم تغيير طقم الشنبر للموتور ؟ وما هى الاعراض لما طقم الشنبر يبوظ ؟

ما بعد طقم الشنبر

حد جرب زيت الشنبر............؟

الكلمات الدلالية لهذا الموضوع

المفضلات

المفضلات

ضوابط المشاركة