مشكله مع التوكيل برجاء الافادة

**unixed** · 10-05-2015 11:56 AM

صديقى معاة ريو 2013 وعامله فقط 38000 كيلو وطبعا لسه فى الضمان وكان راجع من السفر وبعد ما وصل القاهرة وبدون اى مقدمات حس ان العربيه بتسقف منه جامد اضطر يقف وبطل العربيه وحاول يدورها تانى مرديتش تدور خالص فراح سيبها ودور على على ميكانيكى وبعد حوالى ساعه ونص جاب حد من مركز خدمه فى الزمالك بص على العربيه لقى العربيه مفيهاش ميه خالص وحاول يدورها دارت معاة وزود ميه وجرب العربيه لقاها ماشيه كويس ومفيش اى مشكله لحد موصل الفنى لكن للاسف قبل ميوصل بيته العربيه سقفت تانى راح راكنها وطبعا العربيه رجعت متدورش تانى .
تانى يوم جاب ونش ودا العربيه للتوكيل.
التوكيل بقى على اخر اليوم كدة قالو ان العربيه مفيهاش ميه وان غالبا العربيه عاوزة على الاقل جوان وتعالى امضى على موافقتك اننا نفك الموتور فى مقابل 1800 لحد مانشوف العربيه حصلها ايه بالظبط.رحنا التوكيل وبنسال يا سيدى الميه دة راحت فين يعنى المشكله اساسها ايه احنا عاوزين نعرف اساس المشكله عشان نفهم مين الى هيشيل التكاليف يعنى دة عيب صناعه ولا ايه المهندس يقولنا معرفش لازم نفك يا فندم بغض النظر عن الاضرار اكشف على العربيه عشان تقولنا السبب ايه يقول معرفش لازم نفك يا سيدى يهديك يرضيك مفيش معندوش الا لازم افك !!!
المهم وبعد جدال طوييييل جدا مع مهندس تانى وصلنا الى انه مش هيعرف يقولنا برضه ايه المشكله وان اكيد لمبه الحرارة نورت والى سايق مشفهاش وموقفش وان الكتالوج بيقول ان لما اللمبه تنور لازم تقف وكدة تبقى غلطته صاحب العربيه ! علما بان صاحبها بيحلف ميت يمين ان مفيش لمض نورت ولا اى حاجه واصلا فين سبب المشكله يقول ملناش دعوة مدام نورت لازم يقف. وفى الاخر قال انا هكشف على صباع الحرارة لو لقيته شغال يبقى اللمبه نوت والتكلفه مش علينا بغض النظر عن السبب.وامبارح التوكيل اتصل وقال ان الصباع شغال والتكلفه هتكون 35000 جنيه والموتور فى مشاكل كتير.والغريب ان لما صاحب العربيه سال طيب المشكله فين وايه السبب لسخونه العربيه قال برضه معرفش!!!!
برجاء الافادة هو كدة عادى ولا التوكيل بيلبس المشكله لصاحب العربيه و الراجل يقدر يعمل ايه بالظبط علما بانو لو صلحها برة هتخرج من الضمان

**pepo2011** · 10-05-2015 12:25 PM

هههههه ياباشا هي دي توكيلات مصر عادي يعني والقرار ليك لو نفسك طويل هاتدخل في جدال ومحاضر وقضايا وممكن ماتاخدش حاجة عشان كده لازم تفهم الاول المشكلة فين
او تاخدها من الساهل وتعملها برة بربع التكلفة او تعملها عندهم وماتخرجش من الضمان

**احمد المصرى** · 10-05-2015 12:33 PM

ذى ما قال الاخ الفاضل لو هتعملها بره مش هتتكلف كل دا بس علشان تكون حضرتك عارف لو العربيه مفهاش مايه خالص الحراره مش هترتفع لان صباع الحراره لازم يقيس درجه المياه لو مفيش مياه خالص غالبا مش هيحس باى اختلاف والله اعلم

المشكله ان حصل تسريب للمياه لاى سبب واله اعلم

صلح العربيه عند ميكانيكى محترم وريح بالك

**Omar Sarray** · 10-05-2015 08:06 PM

نصيحه منى اعملها بره توكيل أى حد تعرفه كويس

**Abo_Mazen** · 10-05-2015 09:24 PM

المشاركة الأصلية كتبت بواسطة احمد المصرى

ذى ما قال الاخ الفاضل لو هتعملها بره مش هتتكلف كل دا بس علشان تكون حضرتك عارف لو العربيه مفهاش مايه خالص الحراره مش هترتفع لان صباع الحراره لازم يقيس درجه المياه لو مفيش مياه خالص غالبا مش هيحس باى اختلاف والله اعلم

المشكله ان حصل تسريب للمياه لاى سبب واله اعلم

صلح العربيه عند ميكانيكى محترم وريح بالك

أنا لما قريت المشاركه كنت هقول الكلام ده و أتمنى من صاحب المشاركه إنه يقرى الكلام ده كويس قوي قوي قوي ..لإن أساس المشكلة في الحته دي ..الميه إتسربت بسرعة كبيره جدا لدرجة إن حساس الحرارة ملحقش يقرا فيه إيه ..عشان كده أنا متوقع إن فيه كوع كوتش فرقع أو خزنة ريداتير ضاربه ..ولو هو يقدر وهو في التوكيل يخلي المهندس يزود مياه ويشوف في تسريب ولا لأ ..أتوقع بنسبة كبيره جدا إنه هيلاقي المياه نازله من حته لإن أكيد هتنزل بكتره