قدامى لانوس 2 ومحتاج رايكم بأسرع وقت

**محمود فرنسا** · 11-05-2015 09:10 AM

السلام عليكم ورحمة الله وبركاتة
اعزائى اعضاء نايل موتورز وقسم دايو الكرام
اخوكم هيشتري عربية دايو لانوس ومحتاج رايكم قبل التسرع او الوقوع فى الخطأ
قدامى عربية بتاعة واحد صاحبي لانوس موديل 2002
بيقول انه عملها عمرة موتور بس انا بصيت ع الموتور لقيته جايب زيت مش عارف هل فعلاً هو بيقول الحقيقة ولا بيشتغلني لان الموتور بتاعه كان مفوت وكان هيغيرلها شورت بلوك بس قالى انه عملها عمره كاملة بس اما بصيت ع الموتور ولقيته جايب زيت شكيت ف كلامه ومش عارف هل لازم تتغسل عشان نعرف نكشف عليها ولا لا انا نويت والنية لله لو هكشف عليها هوديها بنزينة توتال اللى ف اول الهرم
حالة العربية العفشه كويسة الى حدا ما
الطارة فيها قطعه عايزه تتغير
البربريز اللى قدام فيه شرخ وعايز يتغير
المرايا اليمين فيها شرخ برضو وعايزه تتغير
الاكصدامين قدام وورا
ورفرفين
وفانوسين ورا
والكبوت مبيقفلش قالى انه عايز سمكري مع اني حاسس انها عايزه بتاع كوالين
وقالى انه راشش الصدر اللى ف وش العربية جزء صغير منه اللى قدام الشبكه تقريبا ومش عارف ده يعيب العربية اوى ولا ممكن تعدي
العربية لونها اسود
سحبها حلو بس بدال الدبرياج حاسسه تقيل شوية مش عارف ليه علاج ولا لا
العربية كاملة ازاز كهربه بس الفرش جلد مش عاجبني ولو اخدتها هحتاج اركبلها القماش بتاع الفبريكة مش عارف هينفع ولا لا وهيتكلف اد ايه
وطبعاً الرفارف والاكصدامات عايز اجيبهم اصلي
هو طالب 43
هل السعر مناسب ولا لا ولو غيرت الحاجات دي هتكلفني اد ايه مع رش العربية بالكامل بالمرة
واسف على الاطالة وفى انتظار اهتمامكم باسرع وقت
لانى لسه مقابله من شوية وهرجع اقابله تاني بليل عشان نكشف عليها
او اقولو انى مش هاخدها وربنا يوفقه ف بيعها

**graffittiii** · 11-05-2015 09:28 AM

ياباشا إنت بتهرج دا في مشاكل كتير أوي
_ الموتور كان مفوت وإنت مش عارف هو عمل فيه إيه ...
_ موضوع إنه راشش الصدر ده لازم حد يبص عليه كويس لتكون كانت عاملة حادثة جامدة ..
_ لسه هتغير إكصدامين ورفارف وفانوس ورا وزجاج أمامي ومرايه والكبوت مابيقفلش .

وبعد كل الحاجات دي طالب فيها 43 ؟

إنت إزاي بتفكر تشتري أصلا !!!!... إنت متأكد أن هو صاحبك ؟

**محمود فرنسا** · 11-05-2015 09:31 AM

المشكلة ان كل اللى على النت مغليين جداً فى الاسعار وحالات برضو مش اللى هي اقل حاجه بيتكلمو ف 50 مقفولة ومش ضامنها برضو دي ع الاقل بتاعة والدة صاحبي من الزيرو ومضمونة الى حداً ما

**eisaa100** · 11-05-2015 01:14 PM

ابعد هات حاجه نظيفه يا بلاش
كل يوم هتلاقى مشكلة تنكد عليك ولا صاحبى ولا صاحبك

**EgyArmy** · 11-05-2015 05:11 PM

فيه مثل بيقولك الى يصعب عليك يفقرك
بس انا عارف انك اتخنقت من التدوير و عايز تخلص
بس انت فى نفس الوقت تعبان فى الفلوس دى
ده اقل واجب هيتصرف على العربيه بالوضع ده 7 الاف جنيه
و برضه هتتعب لان عندنا ميكانيكيه عسل
و استحاله تاخدها زى الاول
اما لو مصمم و كلامنا كلنا مدخلش دماغك هاتها
و لما تزهق بيعهالى ب30 لان وقتها مش هتسوى اكتر من كدة

**محمود فرنسا** · 11-05-2015 05:44 PM

انا فكرت اغير رفرفين واكصدامين والمراية اليمين بس وامشى بيها كدة قولت هتتكلف لو جيبتهم اصليين هيعملو حوالي الفين جنية وباقى الشغل اللى فيها كنت هسيبه المهم الموتور والعفشه كويسين ده لو كشفت عليها ف بنزينة توتال وقالولي كدة يعني .. ايه رايكم

**محمود فرنسا** · 11-05-2015 08:19 PM

المشاركة الأصلية كتبت بواسطة egyarmy

فيه مثل بيقولك الى يصعب عليك يفقرك
بس انا عارف انك اتخنقت من التدوير و عايز تخلص
بس انت فى نفس الوقت تعبان فى الفلوس دى
ده اقل واجب هيتصرف على العربيه بالوضع ده 7 الاف جنيه
و برضه هتتعب لان عندنا ميكانيكيه عسل
و استحاله تاخدها زى الاول
اما لو مصمم و كلامنا كلنا مدخلش دماغك هاتها
و لما تزهق بيعهالى ب30 لان وقتها مش هتسوى اكتر من كدة

ليه مش هتجيبلي 30 مش المهم فيها ان دواخلها فبريكة ولا موضوع اللحام ع البارد اللى ف وش العربية من جوه هينزل سعرها ؟؟

**eisaa100** · 12-05-2015 10:44 AM

ما قلتلك ما تاخدهاشى !!!!!

**محمود فرنسا** · 12-05-2015 10:50 AM

المشاركة الأصلية كتبت بواسطة eisaa100

ما قلتلك ما تاخدهاشى !!!!!

المشكلة انى مش لاقى حالة نضيفة ولما بلاقى بيبقى اصحابها مأفوريين ف السعر جداً دي وصلت انهم بيطلبو 60 الف

**EgyArmy** · 12-05-2015 11:16 PM

لو زهقت من اللف و التدوير
مابالك لو تعرف انا بقالى كام سنه حالى واقف بسبب العربيات و مش عارف اجيب حاجه و بدور و مش حاسس بيأس لان كل عربيه شوفتها كان فيها مشكلة مالهاش حل