مبدأيا يا جماعه الكلام ده غير موجه لحد نهائي وهو رأيي الشخصي ويحتمل الخطأ قبل الصواب ولكن هى شويه حاجات الواحد متضايق انه بيشوفها فى مصر ونفسي تتغير
وقطعا الكلام كله موجه للناس مش للحكومه لانى مؤمن ان لو اعتمدنا على الحكومه "اى حكومه " علشان تغير حالنا او المفاهيم اللى احنا مؤمنين بيها يبقى عمرنا محنتغير علشان كده انا بتكلم عن المجتمع علشان اللى يقدر يصلح حاجه يعملها لعلنا نتقدم خطوه من غير مساعده حد لان لو القطاع الحكومى بقى بيحقق مكاسب والقطاع الخاص زود استثماراته والتجار غيروا سياساتهم اظن مش حيبقى للحكومه حجه انها تقوم بدورها بشكل جاد .
*اولا :الساده موظفين القطاع الحكومى
-انا عارف ان فى جزء كبير منهم مش قادر يعيش بمرتبه المحدود اللى بتقدمهوله الدوله ولكن لى رجاء عندكم بلاش تطالب برفع مرتبك وزياده الحوافز وتوزيعات ارباح وانت عارف ان شركتك بتخسر او مكاسبها غير منطقيه "قليله عن مثيلاتها فى السوق" لانك لازم تكون عارف انك لما حتطالب الحكومه بده وبشكل ما تستجيب ليك اداره شركتك الفلوس اللى انت حتاخدها دى الدوله حتطلعها منك تانى برفع اسعار او ضرايب او غيره ولو كان تفكير الدوله رفع 10% حتخليها25% علشان تخليك تسكت
فالاولى شوف شركتك او مصنعك بيخسر ليه وطالب باصلاحات وخليك مصر عليها لحد متتحقق ولما شركتك "الحكوميه" تحقق ارباح طالب بزياده المرتب وتوزيعات للارباح لان منطقيا المفترض المصانع والشركات الحكوميه تكون اداه مسانده للدوله لزياده الدخل القومى ومصدر من مصادر ايرادات الدوله ولكن الوضع الحالى جميع الشركات والمصانع الحكوميه اصبحت عبء على الدوله بشكل كامل .
فمش طالب من موظف الحكومه انه يقبل بالمرتب الهزيل ولكن اعرف ان المفروض المرتب يكون نظير عمل ولو كل واحد شاف شغله مش حتكون عبء بالعكس حتكون اداه مساعده .
-اما موظفين القطاع الخدمى فى الحكومه فرجاء من الحكومه تفعيل قرار المعاش المبكر بكامل الاستحقاقات عند سن 55 عام لان بصراحه القطاع ده مأنتخ بسبب تخمه الموظفين فيه فاظن لو تم تخفيض عدد العاملين قهرا الموجود حيضطر يشوف شغله وتقصيره حيكون واضح وحنقدر نطبق عليه لائحه الجزاءات ولكن كتره الموظفين مخليه العقاب غير مفعل لان الجريمه بلا مسؤل
وفى نفس الوقت تقليل الجيل الكبير فى السن "اللى هو شخصيا مستنى المعاش" حيقابله دخول جيل جديد بكم اقل وطاقه اعلى وتكلفه اقل .
-اما بالنسبه للساده العاملين فى القطاع الحكومى والشبه الحكومى واللى بيتقاضوا مرتبات كبيره جدا ارحمونا وبلاش كمان تطالبوا بزياده "كما الحال فى مصر للطيران" لانكم اثبتوا انكم مش محتاجينها ورجاء مراعاه ان شركاتكم بتحقق خسائر فمش حيبقى موت وخراب ديار وكمان يا ريت تراعوا شعور الموظف معاكم اللى بياخد 1000 جنيه فى الشهر لانه غالبا بيكون ضغطه عالى لما يسمع اللى بتعملوه .
ثانيا : الساده العاملين بالقطاع الخاص
-حضرتك صاحب الشغل ده ضحى بفلوس كتير جدا وجازف بيها ودخل السوق علشان يكسب فلما يحقق ارباح مهوله ويطلع جزء صغير يوزعه على العاملين فده حقه ولو وزع جزء اكبر فهو يشكر لان العلاقه بينكم يحدها انه بيدى ليك مرتب انت قبلت بيه "غالبا لان مفيش غيره" وغالبا بيكون المرتب اقل من مجهودك بس الفرق ده بيعتبر ربحه الشخصى فلما يحقق ربح بلاش تظن انه المفترض يوزعه على العاملين معاه بالتساوى لان الربح ده هو نظير مجازفته واذا حبيت تكسب زيه لما تحوش شويه فلوس فكر بدل متجيب عربيه او تتجوز انك تشغلهم فى السوق وتخاطر انك تخسرهم لو وافقت يبقى انت اصلا المفروض متشتغلش فى المكان ده انت المفروض تكون صاحب شغل ولو خفت او لقيت العربيه احلى يبقى ارضى باللى انت بتاخده وعيش بيه عن قناعه ان ده هو حقك .
ثالثا "الساده التجار
-انا عارف انك لازم تكسب وتحقق ربح بس خللى ربحك فى النسب المعقوله علشان ربنا يباركلك فيه واتمنى ان التجار الكبار يحاولوا يتجهوا للتصنيع جنب التجاره لعلهم يعملوا طفره فى القطاع ده خاصه مع اللى حاصل من تضييق على السلع المستورده حاليا وارتفاع اسعارها فاظن ده وقت البدء فى القطاع ده .
اتمنى محدش يزعل من كلامى
تحياتى .
المفضلات