ربنا هو اللى بيسترها معانا (تهور سائقى الموتوسيكلات الصينى)

السلام عليكم ورحمة الله وبركاته
موقف حصل معايا مرتين ولولا ستر الله ماعرفش كان ممكن ايه اللى حصل
ماشى فى سيرك شارع التسعين فى أقصى اليمين وبينى وبين الرصيف مسافة نصف متر
فجأة أسمع سارينة عربية نقل ورايا
لا إراديا كسرت يمين من غير تفكير لقيت السارينة زادت وبجنون
ابص فى المرايا الداخلية والمراية الشمال مش شايف عربيات نقل ...... كلها عربيات صغيرة وماشيين فى أمان الله
أمال الصوت ده جاى منين؟
أتاريه موتوسيكل صينى جاى من اليمين وبيزمر لى عشان أوسع له ويعدى من الحتة الضيقة اللى بينى وبين الرصيف
لو كنت كنت كسرت يمين زيادة شوية كان حصل مصيبة وربنا ستر وكسرت شمال على آخر لحظة
تانى مرة على أوتوستراد المعادى لقيت موتوسيكل مارق من يمينى ومافيش بينى وبين الرصيف متر
بتوع الموتوسيكلات وسائقى التاكسى والمكروباص متخصصين فى التزنيق والتجاوز من الناحية اليمين
بقيت مش عارف أسوق ازاى
أبص قدامى وللا أبص فى المرايات
نصيحة خلوا بالكم من الناحية اليمين باستمرار
ربنا يحفظكم من كل سوء

الحمد لله

منهم لله
والله احيانا كتير كلنا في العربيه بنتخض جامد

لا لا متقلقش هو ده الطبيعى فى شوارع مصر , المفروض الموتوسيكلات دى تتفتش فى اللجان ولو فى اى كلكسات غير مصرح بها الموتوسيكل يتصادر وصاحبه يتسجن..

,طبعا موضوع السارينه دا مستفز و غلط بس من وجهه نظر اخري بلاحظ ان الملاكي بيتفزلك و يحضن اوى اوى جمب الرصيف طيب الموتوسيكل يمشي مضطر وسط الطريق و الا ايه علي فكرة عندى ملاكي و بوسع للموتوسبكلات و عندي موتوسبكل برضوا

بلد العجائب

هم مستفزّين جداً خصوصا عى كوبري اكتوبر,
بس لازم يمشوا على اليمين ملهاش حل تاني.

اقتباس:

---

المشاركة الأصلية كتبت بواسطة adorehearts

لا لا متقلقش هو ده الطبيعى فى شوارع مصر , المفروض الموتوسيكلات دى تتفتش فى اللجان ولو فى اى كلكسات غير مصرح بها الموتوسيكل يتصادر وصاحبه يتسجن..

---

والسماعات اللى بيحطوها

اللى بستغربه ان سائق الموتوسيكل بتبقى فيه زحمه والدنيا واقفه وهوه كأنه على راسه ريشه ومش عاوز يقف زى بقية خلق الله تلاقيه عمال يدخل يمين فى شمال وكأن وراه الديوان. واللى يشوف طريقه انهم مستعجلين دايماً يحس ان المواطنين عندنا بيقدورا قيمة الوقت اوى.
واللى عمل كده ان الموتوسيكل دلوقتى بقى بتمن موبايل فانتشر بطريقه فظيعه والاسوأ منه التريسيكل بحس ان التريسيكل هوه اللى سايق وان اللى سايقه مش عارف يسيطر عليه

اقتباس:

---

المشاركة الأصلية كتبت بواسطة amr011111

اللى بستغربه ان سائق الموتوسيكل بتبقى فيه زحمه والدنيا واقفه وهوه كأنه على راسه ريشه ومش عاوز يقف زى بقية خلق الله تلاقيه عمال يدخل يمين فى شمال وكأن وراه الديوان. واللى يشوف طريقه انهم مستعجلين دايماً يحس ان المواطنين عندنا بيقدورا قيمة الوقت اوى.
واللى عمل كده ان الموتوسيكل دلوقتى بقى بتمن موبايل فانتشر بطريقه فظيعه والاسوأ منه التريسيكل بحس ان التريسيكل هوه اللى سايق وان اللى سايقه مش عارف يسيطر عليه

---

ياباشا ما هو بيبقى مستعجل عشان هو مأجر الموتوسيكل ده بالساعة ..والساعة دي واقفه عليه بقد كده ..مش عارف بعشرة جنيه ولا عشرين تقريبا ..وبعدين هي جات على الموتوسيكلات ..؟؟..بص ..في تلات مصايب ماشيين في شوارع مصر ..التكاتك ..العربيات السوزوكي الفان ..الموتوسكلات الصيني ..وبعدين هو إحنا عندنا شوارع أصلا ..؟؟؟؟