هــربــت مـن المــدرســه كــام مــرة !!!

**meza** · 13-11-2008 06:15 AM

إتعلمت أهرب من المدرسة من أول تانية ثانوى ... أيوه بجد عمرى ما هربت قبل كده خالص نوهائى.

بسبب ضغط الدروس و كده .. كان ده البرنامج بتاعى:

أصحى الساعة 9 أو 9:30 أوصل المدرسة على 10 .. أخد غيابى و لو كان إتاخد خلاص أروح أجرى على المسئولة عن الغياب و أقولها كنت فى الحمام ساعتها :D
بعد الغياب أروح على باب الإدارة جنب مكتب المديرة على طول .. و أعمل نفسى مستنى حد ... أول ما البواب يقوم .. هوب على الباب أفتح الترباس و أخرج بمنتهى الهدوء و أشد الباب ورايا.
غالباً الطريقة اللى فوق كانت بتنجح لكن لو طولت و البواب نام فى مكانه بروح على سور قصير كده و أجيب ديسك و بيكون معايا كام واحد من أصحابى و أنط لجوه مدرسة جنبينا (تصوروا) و منها على بره.
بعد الخروج موفقاً الحمد لله .. أجرى على السايبر .. أقضيها medal of honor (متخصص shotgun) و generals و need for speed و war craft بس كانت فى أخر سنة تالتة.

أرجع البيت أنام ساعة زمن و أصحى أخلص كل الواجب المطلوب.
و بالليل بقى الدروس ... و غالباً برجع ميت أنام لتانى يوم.

بعد أخر يوم من تالتة ثانوى .. عمرى ما دخلت سايبر تانى ... عشان كده نفسى أرجع ثانوية .. أيام العززز بصحيح

**waled369** · 13-11-2008 07:52 AM

أولا ده موضوع ظريف جدا و بيفكرنا بالذي مضى .

بما أني كنت من القيادات الطلابية البارزة فالهروب ده يعتبر شئ عادي جدا ( قدوة للطلاب ) يعني حاميها حراميها .

طبعا لما كنت أنط من ع السور ( أكتر وسيلة هروب ) أو يفتحوا لي البوابة ( ثقة من عم شاهين بواب المدرسة الله يرحمه ) كان فيه ملعب كورة و نطلع نلعب كورة لغاية م اليوم الدراسي يخلص و نروح عادي جدا و لا كأن حاجة حصلت .

مرة عرف مدير المدرسة و طبعا كالعادة بينادي على الطلاب ( الفشلة اللي أنا طبعا كنت منهم ) اللي هربوا أمس و يطلعنا في طابور الصباح و طبعا يسمعنا كلمتين ملهومش لازمة و أنا ع الأخص باعتبار أني المفروض أكون قدوة ( هيهات طبعا ).

مرتين على مدار حياتي التعليمية البائسة أخدت ( رفد ) م المدرسة و الحمد لله عدوا على خير طبعا كل الأحداث دي في ثانوي .

أما الاعدادي برضه كان فيه هروب كتير بس مش زي الثانوي طبعا .

**Jato.33** · 13-11-2008 09:09 AM

أنا كنت بهرب
ودية حاجة من أفضل الحاجات إلي عملتها في حياتي
مكنتش بروح أصلاً
كل سبت وتلات عشان أطول الأيام (7 حصص)
وبروح السينما جمب المدرسة 4 أفلام وان شوت
ولما إتطورت شوية كنت بنزل وسط البلد بصراحة بتبقى روعة بدري الصبح وأفطر في أخر ساعة وأخش حفلة 10 أو 10.30 في أي سينما في وسط البلد
طيب والغياب !!!
كان في واحد زميلي في الفصل قاعد جمبي يعرف واحدة تقريباً قريبته في المعاونين كانت بتدخله يفتح الدفتر بتاع الغياب ويشيل إسمه بنفسه وينزل الأيام من عليه وكنت بعزمه على السينما عشان يشطبلي غيابي أنا كمان وكانت أيام فلة يا سلام حاجة عز والله

**sh21s** · 13-11-2008 10:03 AM

بصراحة مكنتش ناوى أرد.
شكلى هيبقى إيه و مفيش غيرى مكنش بيهرب من المدرسة ؟!!!

كنت بحب المدرسة و المذاكرة و بستغرب جدا من الطلبة اللى واقفة بره فى الشارع مش عايزه تدخل المدرسة و الطلبة اللى بتهرب.
كان لى كام زميل واخدين نفس الفيروس ( فيروس المدرسة) فاكر فى يوم الفصل كله مشى و احنا قاعدين المدرس جيه قالنا قاعدين ليه امشوا و مع ذلك مكنتش بهرب ، بس ممكن أروح بدرى من البوابة الرئيسية للمدرسة؛ أيام .

**drhaytham** · 13-11-2008 10:59 AM

مره واحدة فقط في رابعة ابتدائي
السيد الوالد عرف === وعينيكوا ماتشوف الا النور
ودي كانت اول واخر مرة:k37:

**elassar2010** · 13-11-2008 11:05 AM

بصراحة موضوع شيق جدا
انا مكنتش بدخل المدرسة فى ثانوية عامة غير ممكن اثبت نفسى فى الحصة الاولى وزوغ بس طبعا كنت بثبت نفسى الساعة عشرة كنت باخد الغياب واعدلة ولو معرفتش كنا شلة نقطع الغياب وبالتالى المدرسة هتحضر الفصل كلة
فة تالتة ثانوى انا كنت اشهر واحد فى المدرسة كنت ادخل المدرسة الساعة 11الصبح اسلم على صحابى وامشى لدرجة انى مكنتش اعرف انى فى اهنى فصل المدرسين كانو يتحيلوا انى احضر وانا اقولهم لالالالالالالالالالا كلا البتة
وكل يوم واحد صاحبى يقولى شالو اسمك من قائمة الفصل وانا ولا فى دماغى وليا صحابى راحو اشتروا جواب من التامين الصحى 50جنية اة والله بحالهم علشان يعذروا فى 15يوم يعنى اليوم بكام؟؟هههه مش مشكلة
وفى الاخر كالعادة الوزير رجع كل الى اتفصلوا علشان الغياب حرصا على مصلحة الطلبة ههههههه
يعنى امتحنت عادى ولا رحت تامين صحى ولا دفعت فلوس ولا صحيت بدرى
كانت ايام جامدة

**ehabradwan** · 13-11-2008 11:15 AM

انا زوغت مرة واحدة بس
وماحبتش التزويغ بصراحة

**mesaharaty** · 13-11-2008 11:27 AM

بالنسبة لموضوع الهروب ده ما كانش بيجى على بال الواحد ابدا ، كنا فى غاية الإلتزام
مافيش غير هى بس مرة فى تالتة ثانوى نطيت من على السور وكنا فى أواخر العام الدراسى والعملية كانت مهرجلة شوية ونطيت من سور عالى جدا لدرجة إنى بعد ما تسلقته بقيت مش عارف أنزل إزاى ولا أرجع تانى من مطرح ماطلعت (إحتست جدا)
وفاكر اليوم ده من عشرين سنة لحد دلوقتى بكل تفاصيله لأنه كان جميل جدا ومشمس ورحنا اتمشينا فى وسط البلد ودخلنا المتحف المصرى وفضلنا نكلم السواح ونتصاحب عليهم وكان كله ضحك .
أيااااااااااااااااااااااا ااااااام

**Ayman_Abdullah** · 13-11-2008 11:52 AM

بص ياسيدى

انا كنت بهرب كتير بس مش دى المشكلة ز المشكلة انى مره كنت ناطط من على السور و قاعد قدام المدرسة مستنى باقى العصابة ** و هنا كانت المفاجأة ***
ببص جنبى لقيت والدى العزيز:k35::k35:
و سألنى السؤال الشهير اللى هو طلعت لك الفصل ملقيتكش ليه؟
الرد: اصل الحصص خلصت و قولت أنط من الصور عشان أروح بدرى أزاكر
و من ساعتها وهو ماسكهالى و اعتبر ان الحكاية دى سبب أى فشل فى حياتى