هو ايه اللى بيحصل بالظبط فى اسعار العربيات ؟

**Hosam_Optrawy** · 13-11-2008 01:51 AM

السلام عليكم ورحمة الله وبركاته

انا بقالى فتره مكنتش متابع اسعار العربيات اوى يمكن من اول رمضان
قلت اشترى مجله واعرف اخر اسعار العربيات بقت ايه
وكانت لى هذه الملاحظات

اولا لقيت ان فى شاهين 2009 سعر ال 1400 68 الف وال 1600 73 الف ونص
هو مش كان المفروض مفيش شاهين خلاص اخرها 2008 ؟ مع العلم ان مازال موجود 128 موديل 2008 سعرها 43 الف

ثانيا برضه لقيت نوبيرا 2009 سعرها 78 الف
مش برضه النوبيرا كان المفروض اخرها 2008 ؟

ثالثا ببص على الهيونداى
لقيت ان الاكسنت رخصت 2000 جنيه بقت مانيوال 79 واوتوماتيك 85 قلت كويس
لقيت برضه الالنترا المانيوال رخصت 8000 جنيه بقت 96 والاوتوماتيك رخصت 6000 بقت ب 104 قلت حلو اوى
اللى اتفاجئت بيها ال i30 لقيتها غليت 3000 بقت بتبدأ ب 112 مانيوال اول فئه وتنتهى الاوتوماتيك الفل اوبشنز بفتحة سقف وحوارات ب 139 الف !!!! مش فاهمها دى

رابعا اتفاجئت ايضا بسعر اللانسر 1600البومه ال 2009 غلى تانى 4000 جنيه
مانيوال 106 اوتوماتيك 114 اوتوماتيك سبورت 126 اوتوماتيك سوبر اكشن 129

خامسا الهوندا سيفيك 2009 ب 150 والفل اوبشنز ب 176

سادسا المازدا3 برضه غليت 5000 جنيه بقت الاوتوماتيك اول فئه ب 130 الف

سابعا لقيت عربيه جديده من رينو اسمها سيمبول لسه معرفش شكلها ايه بس تقريبا دى الل هتحل محل الكليو وسعرها مانيوال 90 واوتوماتيك 100

باقى اغلب اعربيات اسعارها زى ماهى او زادت الف او الفين بالكتير او لسه موديل 2009 منزلش

الملاحظه هنا فى ان الزيادات الكبيره فى الاسعار كلها ماركات يابانى

مازدا - هوندا - ميتسوبيشى

هتقولو ان ده بسبب الين

طب اشمعنى دايهاتسو غلت 1000 او 2000 بس فى كل موديلاتها

وليه سوزوكى مغلتش ولا مليم ؟؟؟ ولا دى مش يابانى

برضه مش فاهم ليه الاكسنت ولالنترا والفيرنا يرخصوا والباقى يفضل زى ما هو وال i30 هى اللى تغلى

ياريت تشاركونى الاراء ولو كنت باقول كلام غلط حد يصححلى

**د-احمد عبد اللطيف** · 13-11-2008 02:15 AM

الموضوع دة ممكن تلاقي له تفسير منطقي في اي بلد غير مصر

يعني لو تحسب الحكاية بالدولار يبقي لازم المستورد يزيد بنفس نسبة زيادة الدولار

ولو الحكاية ان السوق نايم يبقى لازم الاسعار تنزل ولو بسيط لتشجيع البيع
انما في مصر بلد العجايب
واحد يغلى الف يقوم التاني يقول اشمعنا انا يعني هي عربيتي اللي وقعت من قعر القفة
ودة كلة ينحصر في ان السوق في مصر ليس له اصول
الناس تحب حاجة ترفعها في السما ممكن تكون عادية جدا في كل الدنيا
مثلا اللانسر في مصر من احسن السيارات مبيعا وهى بالفعل سيارة ممتازة
ولكن مبيعات التويوتا والهوندا في العالم كلة تفوق اللانسر بس مصر تختلف
يعني باختصار الموضوع ارتجالي واي دراسات تتم هي دراسات فردية تعتمد على مبيعات كل شركة و قدرتها على المنافسة و نظرتها للسوق
يعني هل الشركة تريد الحصول على حصة مؤقتة من السوق (معظم الشركات الصينية) ومش مهم اللي يحصل بعد كدة
ام هي شركة تريد المنافسة والاستمرار (دايهاتسو وبروتون على سبيل المثال)
ام هي شركة على الاستعداد للتضحية ببعض الارباح مؤقتا في سبيل البقاء الطويل و السيطرة على السوق (غبور هيونداي, و ابو الفتوح)
ام هي شركة ذات اسم كبير وتريد ان تتواجد في مصر (تويوتا وهوندا مثلا)
ام هي شركة مملوكة لحوت كبير وهنا كل الموازين تختل على حسب الحوت عايز ايه

**ToYoTa** · 13-11-2008 02:27 AM

المشاركة الأصلية كتبت بواسطة hanboly

الملاحظه هنا فى ان الزيادات الكبيره فى الاسعار كلها ماركات يابانى

مازدا - هوندا - ميتسوبيشى - تويوتا

هتقولو ان ده بسبب الين

طب اشمعنى دايهاتسو غلت 1000 او 2000 بس فى كل موديلاتها

وليه سوزوكى مغلتش ولا مليم ؟؟؟ ولا دى مش يابانى

طبعا لان مازدا - هوندا - ميتسوبيشى - تويوتا عربيات مطلوبة وليها سمعة حلوة اوي في مصر بالاضافة ان الوكلاء بيلعبو علي نقطة ارتفاع الين
وبصراحة لو زادت 10000 كمان برده هتتباع وماحدش هيقول لا

لان الواحد من صغره عنده كلمة made in japan دي زي الفولاذ :k34:
والمثل بيقول لو فاتك الياباني مش هيرجع تاني

**د.محمود صلاح** · 13-11-2008 11:11 AM

الالنترا رخصت عشان شالوا منها حاجات مثل فرامل مانعة الانغلاق

**Dr. Elsaadani** · 13-11-2008 01:04 PM

الموضوع ده بكل اختصار احسن حاجة ان الواحد ما يفكرش فيه

مصر ام الدنيا وليها نظامها

**Hosam_Optrawy** · 15-11-2008 02:46 AM

يعنى الحكايه ماشيه عشوائى

**Hosam_Optrawy** · 16-11-2008 12:19 AM

معلش نسيت اضيف للقائمه اللى فوق ان طبعا الشارك غليت برضه 4000 زى البوما
والهيونداى سوناتا غليت 5000
وبالنسبه لموضوع النوبيرا 2009 سمعت معلومه ان اخرها شهر 12