الموضوع: مطلوب استشارة لألغاء توكيل

كل الكلام اللي فوق ده صح طبعا..
بس دلوقتي الأمور اتطورت شوية عن زمان..
حضرتك دلوقتي هاتدخل الشهر العقاري تروح ع الموظف تديله اسمك وبطاقتك..
بيفتح عنده ع الكمبيوتر يطلع كل التوكيلات اللي حضرتك عاملها لكل الناس..
هايسألك بقا الطرف التاني مين ويبدأ في الإجراءات..
معادش فيه بحث يدوي في الارشيف زي زمان :)
روح وان شاء الله سهلة وبسيطة..

####ملحوظة هامة جدا جدا####
أي توكيل عموما ممكن يتلغي بوجود أحد الطرفين فقط (يعني ممكن انت تلغيه او ممكن هو يروح يتنازل عنه)
إلا في حالة (توكيل عام شامل رسمي) ده لا يجوز إلغاؤه إلا بحضور الطرفين مع بعض مهما كانت الظروف..
وعشان التوكيل ده بالذات حساس فالتوكيل بيسقط من تلقاء نفسه بوفاة أحد الطرفين أو فقدانه للأهلية القانونية بأي شكل من الأشكال.


معلومات إضافية للي حابب يستفيد بقا..
لو انت عامل توكيل لأي حد ورجعت بعد فترة طلبته منه واداهولك فدي مش نهاية القصة.. لازم برضه تلغيه..
لأنه ممكن يروح الشهر العقاري يدفع 60 جنيه ويطلع بدل فاقد بكل سهولة..
الخلاصة.. لو اللي معاه التوكيل راجل مش كويس عنده ألف طريقة وطريقة يسرقك بيها..
ممكن يطلع بدل فاقد.. ممكن مايستلمش اعلان الإلغاء.. ممكن يوكل حد غيره يتعامل بالتوكيل.. ممكن يقوم بعمليات بيع يكتبها بتاريخ قديم قبل الإلغاء ولو بيوم واحد وهاتعتبر صحيحة غصب عنك حتى لو رفعت عليه قضية تزوير لأن الطب الشرعي بيقدر يحدد الفترات الزمنية للكتابة بالشهور وفي بعض الحالات القليلة ممكن بالأسابيع انما مستحيل بالأيام..

فانت من الأول أحسنت في اختيار وكيلك والراجل لم يقصر معاك في شيء..
الغي التوكيل في الشهر العقاري من غير ما تسأله تاني ع النسخة اللي معاه..
ماتخليش الموضوع ده يعمل حساسية مابينكم بأي شكل من الأشكال لأنه لو عايز يسرقك كان سرقك من زمان :)

وأخيرا.. أفضل طريقة لإلغاء توكيل هي حضور الطرفين مع بعض أمام مكتب الشهر العقاري لإثبات الإلغاء في الحال..
أما الطريقة العادية للإلغاء فلا يعتد بها إلا بعد استلام الطرف الثاني لإعلان الإلغاء..