مازالت وستزال .. الواسطه هي الحل
السلام عليكم
-----
روحت الاسبوع اللى فات اجيب شهاده مخالفات
وكنت رايح كأني رايح امتحان كمنى مبحبش اروح المحكمه ولا اقسام البوليس ((اماكن قهريه تحس فيها بأفاعي السلطه وقرف الموظفين))
طلعت الدور السابع (لا وجود لاى اسانسير) في غرفه الملاكي
اداني ورقه وقالي فيه مخالفه ((طيب مخالفه ايه )) قالي ممنوع اقولك !!! ((ممنوع ليه ايه البلد العبيطه دي))
المهم استنيت لحد الساعه 10 ونص لحد ما وكيل النيابه ما جيه (( بالاستقبال الملكي الغريب))
وقعدت تقريبا لحد 11 وربع لحد ما طلعتلي ورقة بيضه قديمه (هي في الاساس دهر لورقه مطبوع عليها ) مكتوب عليها بالجاف 300 + 5 وبس
بقول للراجل اللى ع الباب ايه ده بتاعت ايه اعرف بس مخالفه ايه .. يقولي تلاقيها سرعه واهى كانت 500 ونزلها ل 300 جنيه وهى اصلا مكتوب + 5 وهو بيقنعني ان دي 500 مشطوب عليها !!
اهو اى بتنجان وخلاص
المهم مشيت ومدفعتش بعد ما صممت ادخل لوكيل النيابه بعد ما قولتله من حقي كمواطن اعرف دي مخالفه ايه وع اساسها ادفع .. قالي تعالاله بكره الساعه 1 الظهر
----------------------
تاني يوم ..
روحت الساعه 1 الظهر كان وكيل نيابه تاني .. دخلت بالعافيه قالي من غير ما يطلب الملف ولا يشوف اى ورق او اى دفتر مخالفات .. دي تلاقيها سرعه وهو ده الحد الادنى .. ومش هينفع انزل اكتر من كده
((والمصحف عاجبني اوى موضوع تلاقيها دي ))
طبعا مدفعتش مهو لانا لهما بقي ..
--------------------------
يوميها بليل كلمت واحد جاري وكيل نيابه واداني كارت (( الكارت السحري بقي اللى يصنع المعجزات حتى في خزانه الدوله))
روحت بعدها بيوم بالكارت .. وطالع الدور السابع بعد ما حفظت السلالم كلها
واذ بي الاقي اكتر يوم زحمه وناس بتقطع بعضها وورق عمال يمر ادام عنيا بخمس الاف جنيه والفين وحاجات ترعب والكل بيدفع
وانا بقول لنفسي ادفع وخلاص بقي ولا استني اعرف حقي واخده !!
المهم بعد تلت ساعه تقريبا من الصراعات الداخليه جوايا شويه اتحمس وشويه انسحب ..
المهم لقيت عسكري عجوز كده ادام باب وكيل النيابه .. اديته الكارت بهدوء ..
واذ بالمفاجااة التي لم اتوقعها ابدا ..
انا مفكر انه هيدخل الكارت لوكيل النيابه ويقولي استني او ادخل او كده ..
لقيت بتاع اربع خمس موظفين ع الباب .. بيرحبوا بيا جدا جدا جدا .. واتفضل يا باشا .. وحاجه غريبه كده
المهم دخلت سلمت ع وكيل النيابه .. وتدخل جوه تحس انك كنت في عربيه قطر حورس وفجأة دخلت عربيه مكيفه درجه اولي .. ((ايه الهدوء ده ))
والناس اللى قاعده جوة وسايط كلها نظارات شمس وماركات وحركات .. شغل ايام مبارك وسنينه
قعدت ربع ساعه (( كنت زهقان اوى من القعده)) وبعد كده نده عليا وقالي اتفضل شهاده المخالفات اهى خالصه !!!
قولتله كان عليا 300 جنيه قالي خلاص دي كانت تعطيل الطريق العام .. وشيلتها ..
طيب الخمسه جنيه رسوم .. قالي لا خلاص
سبحان الله !!
طيب تعطيل المرور العام ازاى يعني .. العربيه عطلت مني اخدت مخالفه !!
طيب انا عندي واسطه الناس الغلابه هتدفع !!
الناس المستريحه اللى معاهم فلوس برائة والناس الغلابه تدفع !!
منين وكيل النيابه قالي ده الحد الادني مش هاعرف اشيلك حاجه وده عشان واسطه شالي كل حاجه حتي الخمسه جنيه ..
صدقوني انا اضطريت اعمل كده واعتمد ع الواسطه عشان اخد حقي ومدفعش حاجه انا مرتكبتهاش ,..,
بس البلد زي مهي للاسف !@!