هل كل السيارات اللانوس منخفضه؟؟؟

**symasyma** · 28-07-2007 06:14 AM

السلام عليكم ورحمة الله وبركاته
دى أول مشاركه ليا فى الموقع التحفه الجميل ده ، وربنا يوفق كل القائمين على ادارته ويبارك فى كل الاعضاء.
لو ممكن سؤال واتمنى الاجابه عليه.
انا معايا لانوس s موديل 2004 وعامله 15000 كيلو متر، والمشكله لو ركب فيها فردين فى الخلف وطلعت على مطب من بتوع الايام دى العربيه بتحك من تحت.
رحت التوكيل واشتكيت المهندس قاللى انا عليتهالك شويه. وفعلا العربيه عليت شويه لكن المشكله لسه موجوده. هل ده سببه المساعدين الخلفيين ، ولو همه السبب هل لو غيرتهم هل ده هوه الحل واجيبهم ماركة ايه ومنين واركبهم عند مين.
معلش اصل اخوكم جديد فى المواضيع دى,
وشكرا

**sokasoon** · 28-07-2007 08:25 AM

والله نفس الموضوع بيحصل معايا باردو

لو ركبت ثلاثة ورا وواحد قدام وجيت على

مطب كبير وحتى وانا مهدى العربية بتحك فيه

بس معتقدش المشكلة فى المساعدين ويارب يطلع فيهم علشان يكون فى حل

**OsKaR** · 28-07-2007 09:23 AM

انت ممكن تروح ورشه و تخليه يعليلك العربيه بقطع جلد مقوى يركبهملك فوق المساعدين و تروح المشكلة بس انا مش عارف التوكيل بيعمل الحاجات ديه ولا لا

**matrix_rashed_8** · 28-07-2007 11:09 AM

لا اوعى تعلى العربيه بكاوتشات تعليه
لان ده بيضيع ثبات العربيه و بيبوظ العفشه

**Sherif Khalifa** · 28-07-2007 01:29 PM

تعلية العربية غلط كبييييييييييييييييييييييي ييييييييييييييييييييييييي ييييييييييييييييييييييييي يييييييييييييير

**hazem_khidr** · 28-07-2007 04:15 PM

اللانوس كله بيحك في المطبات .
لو المشكله عندك بزياده جرب انك تضغط علي الجوانب اللي ورا بايدك كذا مره لو لقيت ان ضهر العربيه بيطلع و ينزل معاك بسهوله يبقي غير المساعدين انما لو لقيت الموضوع دا بيحصل بتقل يبقي المساعدين كويسين.
لو حتغير مساعدين شوف ماركه K.Y.B الياباني لو في منهم للانوس اشتريهم حيبقوا كويسين عن تجربه.
لو لما تاخد مطب من اياهم حاول تاخده بالعرض او بميل و بكده العربيه مش حتحك معاك.
انما تعليه العربيه دا غلط جدا بيضيع الثبات و بيخلي منظر العربيه وحش

**Sherif Khalifa** · 28-07-2007 04:17 PM

فى KYB خلفى الاتنين ب 200 جم

المساعدين دى حلوة بس عيبها انها مش مريحة فى الضرق المكسرة
بس بتدى سبات كويس جدا
انا مركبهم عندى

**Abdallah** · 28-07-2007 07:09 PM

انا اخر مرة سألت عليهم من اقل من شهر كانوا بـ 275, انت متأكد من السعر دة يا شريف؟

**Sherif Khalifa** · 28-07-2007 07:11 PM

دا سعر الامامى
الخلفى بى 200

**symasyma** · 29-07-2007 12:46 AM

والله يا جماعه الواحد مش عارف يشكركم ازاى كل الرود دى فى نفس اليوم.
ربنا يبارك فيكم كلكم.
أنا هجرب انى اضغط على العربيه من ورا واشوف ايه اللى هيحصل وبعدين انا خلال اسبوعين رايح التوكيل اعمل الصيانه هشوفهم هايقولوا ايه برضه واقولكم.