الموضوع: البديل لأويل سيل عمود كرنك الداتشا من الانواع الاخرى

الله ينور يا حازم بس ممكن تشرحلنا اويل سيل عمود الكرنك ده بنعرف منين انه بايظ بيهرب زيت مثلا ومكانه فين بالظبط ،، بنتعبك معانا يا كبير

وعندي استفسار تاني عايز اخود رايك فيه ،، عندي مشكله في الفرامل كل شويه الفرامل توطي ،، اخود هوا ترجع تعلا تاني بس اسبوعين تلاته كده وترجع تاني وزيت الباكم مظبوط على المقاس تفتكر من ايه ؟؟

اخى الفاضل محسن ...
كل عام انت وكل الاخوه على المنتدى بخير وسلامه ويجعل لهم فى كل مشوار سلامه وامان..
المهم وانت سيد العارفين بان هناك مشكله بسيطه دايما معظمنا بيواجهها وهى الرشح من ناحية الطانبوره اللى بيجرى عليها سير الديناموودى لها سببين:
الاول جوان الكارتيره بتاعة الزيت ( حوض الزيت ) ودى مشكلتها تتعلق فى عدم العزل الجيد لمنطقة عمود الكرانك نظراً لوجود قطعه منفصله من الكاوتش بتبات على الجوان الفللين الخاص بالكارتيره وده لازم يتم لصقه الاول على صاج الحوض وباحكام بالالفونيه وتداخلها مع جوان الفللين قبل التجميع مع البلوكه لضمان تمام العزل....
والثانى هو الاويل سيل بتاع الكرنك برضه من ناحية الطنبوره وده مشكلته انه لما بيتغير فى الغالب مابيباتش باحكام او بيدخل بيضاوى داخل المنيم بتاعه فطبعاً وطبيعى هايسرب زيت...
اما فيما يخص اخد الهوا كل اسبوعين على حد قولك يا عم محسن فهناك حاله من اربعه لاما خرطوم مشقوق اما فى الامام او الخلف بعد الضفدعه او المشترك الخلفى ايا ما كان عندك فى دايرة فرامل حضرتك
او لاكور مهوى فى احد مناطق التجميع او الاتصال بدائرة الفرامل فممكن الميكانيكى بتاع حضرتك يعيد نظر على الدائره من اول لاواكير العجل الخلفى ويبحث عن نشع او تسريب للباكم ماسوره ماسوره وصولا للاكور التجميع مع الماستر الرئيسى...
والحاله التالته ان سعادتك ممكن يكون هناك تأكل فى جلد المساتر بتاع العجل فبيهرب زيت باكم مع كل ضغطه فرامل وياخد هوا مكان الزيت المهرب... وطبعا هاتقولى اى ماستر ؟ لما الميكانيكى يشيك على الدايره خليه بالمره يبص لو فيه نشع على الطنابير الخلفيه من الاسفل او الجنط فيه زفاره من الداخل ولامم تراب ممزوج بزيت
والحاله الاخيره هى جلد الماستر الرئيسى و بالأخص الاويل سيل العكس اللى بيتركب على البستم المواحه لزغاد السيرفو فده مفروض دوره عزل دايرة الزيت داخل الماستر وعدم تسربه الى خارج الدايره وده علامة بوظانه انك تلاقى هناك نشع من اسفل الماستر الرئيسى فى منطقة اتصاله مع السيرفو
واسف على الاطاله ....والله اعلم

والله يا يا بشمهندس حازم - ربنا يخليك لينا ةيجازيك عنا خير
انا عندي نفس المشكله وماشي بيها من سنة ونص ومبقتش ادور في الموضوع لان بتوع الفرامل تعبوني.