ميسوبيشى شارك هاى لاين 2015 ام كارينز هاى لاين 2015

يا جماعة من فضلكم عايز اعرف اختياركم بين سيارتين ...لو انت امامك سيارة ميتسوبيشى شارك 2015 هاى لاين اللى عامله 170 الف جنيه ...و الكارينز الهاى لاين سبع مقاعد اللى عامله 220 الف جنية ......سيبك منالسعر لكل منهم ...ايهم تفضل و هتختار مين فيهم ...و ليه؟ .. الاسرة و الاولاد عندى عاجبهم شكل الميتسوبيشى عشان شبابى اكتر من الكارينز - و انا راجل قديم و موضة قديمة و عايز سيارة عائلية و عملية لينا كأسرة مع جد و جدة الاولاد يعنى تسعنا كلنا ..بالرغم من ان الجد عنده تويوتا ياريس – لكن كنت حابب نتجمع كلنا فى مكان واحد مع بعض .......و دخلوا الاولاد معايا فى مقارنة على اساس ان المتسوبيشى يابانى كاملة ...لكن الكيا كورى ...و اعادة البيع للميتسوبيشى افضل و اسرع من الكيارينز ....و الانتشار و قطع الغيار عند البقالين للميتسوبيشى على عكس الكيا الشكل الجديد ......
المهم .....لو انت مكانى ....هتختار ايه ...و سيبك من اللى تناسب وضعى العائلى و الكلام ده ...و كمان سيبك من التحيز لماركة معينة ...محتاج اعرف رأيكم بشكل موضوعى ....يعنى عايزك تقارن لى بين السيارتين ...مميزات و عيوب كل منهم ؟.......و عشان ايه رأيك ده .....ارجو منكم رأى السادة الاعضاء الكرام اللى حابب يشاركنا فى الموضوع اكون شاكر جدا لكم عشان عايز استفيد من ارائكم جميعا .....و كمان سمعت ان الميتسوبيشى الجديدة هيغيروا شكلها فى الموديلات القادمة ....مش عارف الكلام ده مدى صحته ايه ؟.....ياريت يا شباب اللى يفضل سيارة من الاثنين دول يقول لى ليه اختارها و ربنا يكرمكم جميعا ......بس متتأخروش عليه و الله عشان فاضل 25 يوم على رجوعى مصر و اشترى فورا بمجرد نزولى ...الف شكر ليكم جميعا

انا عن نفسي افضل الشارك عن الكارينز اعتقد الكارينز شكلها مش حلو و احس انها اصغر من الشكل القديم وغالية زيادة عن اللزوم. اما الشارك احلى فى كل حاجة شكل و صناعةو سعر

كارينز في رايي كتقفيل وخامات وصالون وعزل الصوت خصوصا لو هاي لاين مستوي تاني
وجرب اتفرج علي الكارينز والشارك في معرض واحكم بنفسك
بالنسبة لسعر الاعادة البيع العربيتين زي بعض منتشرين جدا

الكارينز مش صغيرة و بتبيع زيها زي الشارك. الشارك بردو قطع غيارها مش رخيصة نهائي. حضرتك بتقارن بين عربيتين في فئتين مختلفتين. و في الحالة ديه كل واحد هيحكم طبقا ل احتياجاته الشخصية و ده اللي لازم سيادتك تعمله. عارف لو بتقارن بين سيراتو و شارك يبقي ماشي.

أنا عامل نظام الvoting عندي في البيت و الموضوع ده مريح جداً ... و أنا باشتري ال508 اتفرجت علي ال3008 و كانت عجباني برضه خصوصاً إن ال2 نفس الموتور ... أنا و مراتي عملنا voting لل3008 و الأولاد (3) عملوا voting لل508 و طبعاً رأي الأغلبية بيحكم بس قبلها قعدنا كلنا و شوفنا مواصفات العربيتين و اتناقشنا و روحت عند أباظة كان عنده الاتنين و قعدنا في الاتنين و ارتحنا أكتر في ال508 ف اشتريتها بغض النظر إن كل فرد في العائلة معاه عربيته الخاصة (مش منظرة ولا كتر فلوس لكن لأن كل واحد بيروح مكان بعيد غير التاني و أنا مش فاضي أوصل أو أجيب chauffeur لأني كمان مش بحب حد يسوق عربيتي) بس قالولي يوم مانتجمع مش هيبقي كل يوم ف هات ال508 أحسن و قد كان :)
من الآخر خدهم و اقعدوا في الاتنين و اللي يرتاحلها أكبر عدد من حضراتكم يبقي اشتريها مع العلم إن الكارينز كسحب و ثبات مش أقل من الشارك بس عندي ليك نصيحة صغيرة ... لو عندك قدرة إنك توصل المبلغ ل 240000 و تجيب 508 أول فئة يبقي انت كدة ضربت 100 عصفور بحجر لأن العربية واسعة و في نفس الوقت ككماليات و قوة موتور و ثبات أحسن من الكارينز و الشارك 100 مرة و العربية هتحس إنها فعلاً قيمة مقابل سعر و لو برضه عايز حاجة عائلية 7 seats ممكن تفكر في سيتروين C4 Grand Picasso و ديه أنا متأكد إن كلكم هتتفقوا عليها و كمان سعرها 225000 يعني في حدود الميزانية و فيها كل ما تتخيل و ممكن تشوف ليها reviews علي النت و تقرر و ربنا يوفقك إن شاء الله

شارك ......................

انا شخصيا جبت الشارك علشان حابب العربية شكلا وموضوعا، ومن رأيي أن دا عامل مهم جدا في شراء أي عربية، وبما أن السعر مش فارق معاك روح اتفرج على العربيتين واقعد جواهم واشتري العربية اللي شداك اكتر ومرتاح نفسيا ليها.
وبالنسبة للعيوب والمميزات حتلاقي كل حاجة عن العربيتين في المنتدى هنا.
وبالتوفيق أن شاء الله

شخصيا هاختار الكارينز علشان عائليه
لكن لو مش هاحتاج7مقاعد هاختار الشارك

شكرا لحضرتك اخى المحترم M.Elwan ...و الحقيقة انا كنت معتقد ان الكارينز لسه لم تنتشر بالشكل المقارب للشارك فى الشارع المصر و عشان كده كنت بقول ان قطع الغيار و اعادة البيع فى صالح الشارك - لكن انا منزلتش مصر من 15 شهر و اكيد فيه امور اختلفت - و طالما حضرتك افادتنى بالمعلومة الجديدة دى بالنسبة للانتشار و اعادة البيع للكارينز اكيد طبعا ده هيرفع التصويت للكارينز ....ربنا يكرمك شكرا ليك

شكرا لحضرتك اخى الفاضل svneleven - معاك حق فى الفئتين المختلفين ...و شكرا انك وضحت لى ان قطع الغيار فى الشارك مش رخيصة او على الاقل متقاربة للكارينز ....شكرا لحضرتك

شكرا لحضرتك و للنصيحة الغالية اللى فعلا يعتبر حل مثالى لأرضاء جميع الاسرة - ربنا يبارك فى حضرتك و الف مبروك على السيارة الجديدة 508 - فى الحقيقة طبعا البيجو من اجمل و اشيك السيارات و الفرنساويين مشهورين بالذوق سواء فى البيجو او الستروين و من زمان - و انا سألت على الجراند بيكاسو c4 عند عز العرب و طلع فيها فئتين الفئة الاولى ليست سبع كراسي و دى ثمنها زى ما حضرتك قولت 225 الف لكن السبع كراسي ثمنها 258 الف - و بكده ممكن تكون مستبعده لأن فرق السعر بينها و بين الكارينز اللى كمان فيها نفس المواصفات و الاوبشن حوالى زيادة 40 الف ...مبلغ على الفاضى بدون فائدة - و كمان البيجو ال 508 فيها ثلاث فئات سعر أول فئة اتوماتيك STANDARD ،،،،،،،،،، هو 241000 جنيه مصري.

سعر فئة الفل أوبشنز ،،،،،،،،،، هو 271000 جنيه مصري.

سعر فئة هاي لاين ،،،،،،،،،،،، هو 297000 جنيه مصري - يعنى معدية جامد الهاى لاين
و فى النهاية اشكر حضرتك على مشاركتك الكريمة و ربنا يحفظكم

شكرا لمشاركة حضرتك و فعلا كلامك مضبوط 100% ....انا عملت كده هنا و فى الحقيقة الاثنين عاجبنى جدا و لكن كل سيارة و ليها مزايا مختلفة - لكن طبعا الواحد بيجيب سيارة تناسب جميع افراد الاسرة - لكن لو سيارة خاصة بى انا شخصيا و لوحدى طبعا الشارك ....لكن العائلة هى من تفرض اختيارات و بالتالى اقع فى الحيرة اللى انا فيها دى .......عشان كده سألتكم ....و كنت متخوف اجيب الكارينز و تكون لسه مش مرغوبة فى السوق المصرى زى الشكل القديم منها على حد علمى ...لكن بمشاركاتكم بإذن الله سوف استفيد كثيرا و جزاكم الله كل الخير .شكرا لحضرتك مرة اخرى ....

شكرا ليك اخى الفاضل - ما انا اخترت الكارينز عشان عائلية لكن كنت متخوف من عدم انتشارها و اعادة البيع ليها - حضرتك عارف الامر ميسلمش ممكن الظروف تجبر الواحد على البيع فلازم الواحد يضع ذلك فى الاعتبار و كمان انا كنت قلقان من قطع الغيار و الحمد لله الاعضاء وضحوا لى الصورة - و كمان فيه ناس قالوا انها واطية لو انت معاك اسرة ممكن تحك فى المطبات كتير و طبعا دى انا سايبها لوقتها لأن الواحد مش عارف هيمشى فين ؟ .....المهم عندى هو انى اعرف شعبية السيارتين فى السوق المصرى لأنى كنت اعرف ان الشكل القديم من الكارينز مليانه الشوارع بيه لكن الشكل الجديد مش عارف ظروفه و انتشاره ايه و هل حاليا بدء ينتشر و يلاقى شعبية و طلب من الناس ولا لسه مش منتشر و بعض الناس لا تفضلها حتى الآن - ده اللى حابب اعرفه منكم لأن انتم المتعايشين و انا بعيد عن البلد - شكرا لحضرتك

شكرا لمشاركتكم الكريمة و طبعا الشارك سيارة محترمة و جميلة و شبابية و عملية و كمان شكلها حلو ....لكن النهاردة رحت جلست فيها انا و اسرتى على الكنبة الخلفية فى المعرض هنا - و فيها العمود اللى فى الأرض اللى فاصل الجنب اليمين عن الشمال بيخلى اللى راكب فى الوسط مضطر لوضع قدم فى الجهة اليمنى و الاخرى فى الجهة اليسرى و طبعا غير مريح للراكب فى الوسط - لذلك هى سيارة ممتازة لأربع اشخاص مش اكتر - غير كده هى سيارة ممتازة و لكن اعتقد انها لا تناسب عائلة - شكرا ليكم كثيرا

الف مبروك عليك الكارينز

ههههههه شكرا ليك اخى acs - و الله لسه فى حيرة حتى الآن لكن طبعا ربنا اللى كاتبه فى اخر لحظة ممكن الواحد يكون مرتب شئ و يتغير على اخر لحظة سبحان الله - شكرا ليك اخى acs

في نقطة عايز اوضحها بالنسبة للكارينز
انها فعلا 7 راكب بس للاسف علي حساب الشنطة
يعني لو مسافر ومعاك العائلة كلها مش هيكون في مكان يشيل شنطهم
وربنا يوفقك في الاختيار

أخى الكريم أنا أمتك كرينز 2011

الكارينز أمتلاكها غير تجربتها
عربية عائلية فى المقام الأول
واسعة سحبها جميل وعربية بتتحمل الطرق بتاعتنا
أه عفشها ناشفة شوية لكن عمرها طويل
مشاكلها محدودة
ليها مكان فى السوق المصرى وقطع الغير متوفرة فى التوكيل وبرة
وفى الصدمات العربية بتتحمل

شكرا اخى AhmedNaeem ... اه طبعا مفهوم موضوع الشنطة فى حالة السبع كراسي و طبعا فى روف راك و ممكن استغلاله فى حوامل لتحميل الامتعة لو فيه احتياج لذلك لكن طبعا السفر ده بيكون فى اوقات بسيطة خلال السنة و ليس نمط حياه .....شكرا ليك اخى الكريم

شكرا ليك اخى الكريم lancer06 ...و ده هيخلينا اسألك و طبعا انا عارف ان الموديلات للشكل القديم للكارينز كانت ناجحة جدا فى الشارع و المستهلك المصرى الذى وجد فيها الوسع العائلى و الاعتمادية و القوة و توفر قطع الغيار بأسعار معقولة و كمان اعادة بيع ممتازة - لكن سؤالى هو عن الشكل الجديد ؟ هل فعلا يحظى بنفس امكانيات و كفائة الشكل القديم من حيث الاعتمادية و الاقبال من المستهلك و السوق المصرى يستوعبها بكثرة حاليا ام مازالت قليلة فى الشارع المصرى ؟ ...و حول موضوع الانتشار ايضا حول موضوع اسعار قطع الغيار و متانة السيارة فى مواجهة المطبات و الشوارع الغير ممهدة فى مصر ...هل لا تناسب هذه الشوارع ؟..و هل هذا الشكل الجديد اقل فى الارتفاع بنسبة كبيرة عن الشكل القديم مما يجعلها تحك فى المطبات اكثر من الشكل القديم ......ارجو الافادة ....و شكرا ليك اخى الكريم - و اخر سؤال .....اسم حضرتك لانسر ..هل هذا معناه تفضيل اللانسر على الكارينز من وجهة نظرك ؟ :E_braces[1]:

اقتباس:

---

المشاركة الأصلية كتبت بواسطة mffg

شكرا ليك اخى الكريم lancer06 ...و ده هيخلينا اسألك و طبعا انا عارف ان الموديلات للشكل القديم للكارينز كانت ناجحة جدا فى الشارع و المستهلك المصرى الذى وجد فيها الوسع العائلى و الاعتمادية و القوة و توفر قطع الغيار بأسعار معقولة و كمان اعادة بيع ممتازة - لكن سؤالى هو عن الشكل الجديد ؟ هل فعلا يحظى بنفس امكانيات و كفائة الشكل القديم من حيث الاعتمادية و الاقبال من المستهلك و السوق المصرى يستوعبها بكثرة حاليا ام مازالت قليلة فى الشارع المصرى ؟ ...و حول موضوع الانتشار ايضا حول موضوع اسعار قطع الغيار و متانة السيارة فى مواجهة المطبات و الشوارع الغير ممهدة فى مصر ...هل لا تناسب هذه الشوارع ؟..و هل هذا الشكل الجديد اقل فى الارتفاع بنسبة كبيرة عن الشكل القديم مما يجعلها تحك فى المطبات اكثر من الشكل القديم ......ارجو الافادة ....و شكرا ليك اخى الكريم - و اخر سؤال .....اسم حضرتك لانسر ..هل هذا معناه تفضيل اللانسر على الكارينز من وجهة نظرك ؟ :E_braces[1]:

---

السلام عليكم ورحمة الله
مرحبا أخى الكريم
الشكل القديم بدأ من 2009 وأنتهى فى 2013 يعنى بقالة حوالى خمس سنين
الشكل الجديد بدايتة 2014
يعنى لسة مش مر علية كتير
فدة يبينلك موضوع الأنتشار
بالنسبة للمطبات السيارة اكثر ارتفاعا من الشكل القديم
والموتور أقوى عزم من سابق
بالنسبة للداخل نفس الراحة مع مقصورة تعطيك أحساس بالوسع
والمظهر الخارجى تم تغيرة لشكل شبابى لأن القديم كان عجوز شوية :E_braces[1]:
أسعار قطع الغيار للشكل الجديد معرفش عنها حاجة بصراحة لكن عندنا فى مصر بيتم تقدير ثم القطع على حسب ثمن العربية للأسف ( يعنى لو العربية غالية )
بالنسبة للأسم فأنا أمتلك كارينز ولكن سبب تسجيلى بالمنتدى انى كنت بدور على حل لمشكلة بلانسر بومة
----
نقطة حابب أوضحها لحضرتك لو هتشترى العربية من عندك هتكون 2000 سى سى
انما لو اشتريتها من مصر فهتكون 1600 سى سى
ومينفعش تشتريها من عندك 1600 لان فى وكيل هنا فى مصر

والأقبال فى الشراء عندنا بيكون لموتور 1600
ليا واحد قريبى فى الكويت كان حابب يشترى كيا سبورتج خليجى من الكويت ويشحنها ويرخصها فى مصر
التوكيل هناك قال طالما فى وكيل فى مصر يبقى يشتريها منة
أنما لو هياخدها من الكويت هتكون 2000 سى سى
والله أعلم
لكن متخافش من 1600 فيها لأنة 124 حصان
ومتخافش من موضوع الشنطة انها صغيرة لأن فى أمكانية طى المقعدين الزيادة فتصبح بنفس وسع الشكل القديم
أتمنى أكون أفدتك ولو بجزء صغير

مع كامل تمنياتى بالتوفيق

الف شكر اخى الكريم lancer06 - طبعاً استفدت كتير من كلام حضرتك و ربنا يكرمك - فعلا زى ما حضرتك وضحت ان السيارة هنا الكارينز عندى فى ابوظبى موجودة فقط 2000 cc ..و كذلك السبورتاج - , و معلومات جديدة استفدتها من حضرتك مثل ارتفاع الشكل الجديد اعلى من الشكل القديم و كمان بالنسبة للراحة فى الجلوس للشكل الجديد و ده موضوع مهم و انا كنت اعرف ان الشكل القديم واسع من الداخل ماشاء الله و كنت بقول لنفسي ياريت الشكل الجديد يكون واسع و مريح زى الشكل القديم و الحمد لله - لا سيما ان الشكل الجديد ممكن يكون اقل فى ارتفاع المقصورة و السقف عن الشكل القديم - و طبعا ده كمان عامل بيعطى احساس بالوسع اكثر من الشكل الجديد - لكن طالما حضرتك شايف ان الكارينز الجديدة نجحت فى مصر و ليها ناس بتفضلها و ليها وجود فى السوق المصرى يبقى تمام - طيب اسأل حضرتك ايه رأيك فى الفئة الهاى لاين بالنسبة للسقف البانوراما - هل هذا يعتبر عيب و ليس ميزة فى مصر على اساس احتمالية الكسر متاحة من العوامل الخارجية مثل اسطح العمارات او ما شابه ...ولا الموضوع عادى و لا داعى للخوف ...و على فكرة طبعا انا افضل البانوراما لأنها فى الشتاء جميلة مع الشموسة الجميلة فى مصر - انت شايف لا داعى للخوف و اتوكل على الله فى الهاى لاين و خلاص - لأن بصراحة الفئات الاقل بتقل فى الاوبشن و انا محتاج الاوبشن الموجود - شكرا لحضرتك و جزاك الله الف خير

السلام عليكم ورحمة الله وبركاتة
موضوع الكماليات يرجع لحضرتك طبعا
السقف البانوراما أضافة رائعة للسيارات الحديثة ولا شك أن علية عامل مهم فى شراء او بيع السيارة
لو عاوز تأمن عربيتك أكتر يبقى يكون للعربية جراج
ومتقلقش من حاجة اللى ربنا كاتبة هيكون وربنا يسترها معاك بإذن الله
ربنا يوفقك بإذن الله

الف شكر ليك و تعبت حضرتك معايا و شكرا على ذوقك و جزاك الله كل خير و ربنا يحفظك من كل سوء

2016 اخر موديل من الشارك…
كارينز برضه في اخر سنة او سنتين