كل يوم الواحد بيتعلم حاجة جديدة فى السواقة وبيتعلم حاجات جديدة من الشارع من مواقف اتعرض لها ..
-
مثلا أول ما اتعلمت السوقة كنت بسوق بسرعة وحاسس ان الكل فى سباق ولازم أسبق الكل ..مع الوقت الأعصاب بقت هادية
-
دى بعض المواقف اللى اتعلمتها وانا سايق مع الوقت :::::::::::::::
1-
خارج من شارع جانبى الى شارع رئيسى وماشى بسرعة 30 كم فجأة ظهرت عربية ماشية صاروخ على أقصى اليمين ولولا ستر ربنا فرملت فى اخر لحظة لان العربية التانية ماكنش حيقدر يفادينى لانه على يمينه عربية
واتعلمت درسين من الموقف ده انى أخرج من الشارع الجانبى بالراحة ولما أكون ماشى فى سريع عمرى ما أمشى بسرعة كبيرة وواخد أقصى اليمين
طالما فى تقاطعات ..
---
2-
وأنا بلف على الكورنيش كان أمامى عربية بتلف الملف وانا ماشى لازق فيه .. معرفش يجيب اللفة من مرة واحدة وفجأة لقيته مدى مارشيدير وراجع
لحد ما خبط فيا .. للاسف ملحقتش حتى أجيب مرشيدير ..
اتعلمت طبعا انى عمرى ما ألزق فى اللى أمامى وهو بيلف وأسيب مساحة كبيرة لحد ما يلف هو
-----
3-
على الطريق السريع والنقل واخد شمال ومطنش .. فجأة قررت أعديه من الشمال
كسر عليا ومهما أديت كلاكس مفيش لحد ما فرملت بأقصى قوة وربنا ستر ..
طبعا كان على يمينه عربية صغيرة مش باينه واضطر يكسر .. عمرى ما بعدى النقل من غير ما أتأكد ان يمينه فاضى وأشوف الطريق
----
4-أول ما اتعلمت السواقة كنت بدى مارشيدير على طول وأرجع وبعدين أبدا أبص معتمد على المرايا ... لحد ما فى مرة كنت راكن ومفيش حد ورايا ولمحت عمود وانا ببص ورايا فى اخر لحظة ..
-
طبعا بعد كده بقيت أبص الأول فى المرايا وبعدين أبص براسى أشوف من الزجاج الخلفى قبل ما اتحرك
--
5-
كنت زمان بنقل الفتيس المانوال وانا دايس الدبرياج مش لاخره فاكر ان دى شطارة ومحافظة على عمر الدبرياج
-طبعا ده مش صح والصح هو انى ادوس على دواسة الدبرياج للاخر علشان تروس الفتيس وانا بنقل متخربش
---
6-
ساعات كنت بقف على منزل ( منحدر ) ولما أجى أطلع كنت باعتمد انى أنزل فرامل اليد وألحق أدوس بنزين وأنا برجع بضهرى علشان أطلع من الركنة .. لكن أول ما كنت بسي فرامل اليد كانت العربية بتندفع بسرعة للامام ( مش عارف ده كان عيب فى العربية ولا فى سواقتى )
دلوقتى بنزل فرامل اليد وانا رجلى على الفرامل وأسيب وأدوس بنزين .. لقيت ان العربية بتندفع للامام بس مسافة صغيرة
----------------------
----------------------
دول اللى فى دماغى يارب الموضوع يكون مفيد .. والكل يفيدنا بتجربته وخبرته فى السواقة ... صحيح الواحد علشان يتعلم صح لازم يمر بالمواقف دى وهو سايق .. لكن أكيد برضه ممكن نستفاد من تجارب الاعضاء ..
المفضلات