أساسًا محدش يقدر يقول إنها مش شريفة ومش عفيفة .
ياجماعة مفيش بينة حتى لو كنت معتقد يقينًا إنها لم تسلم منه ..!
الحجات دي مش ممكن نتكلم فيها بالظنون
إحنا آخرنا نقول إن الشكل دا من العلاقات خطأ ومحرم وطريق للزنا ونبين لها موقف الشرع لكن مانتهمهاش بحاجة
بصوا عشان نتكلم كلام منصف .. إحنا مش مختلفين إن فيه صورة خاطئة بتجمعهم على الأقل اللي صرحت بنفسها بيها
ولكن هيا متكلمتش عن ديانته الأخ أحمد سألها عن ديانته لأسباب قانونية فأعتقد إن ردها كان إنه قانونًا مفيش خانة للديانة ودا يفرق عن معتقده
لإن معظم دول الغرب وأوروبا مابيحطوش للديانة بند..كما أعتقد
هل عدم وجود خانة للديانة يدل على إن حامل هذه الأوراق الرسمية ملحد ؟
لاء مش ضروري .. دا ممكن يعني إن الدولة مش مهتمة تعرف إنتا إيه ديانتك المهم إنك مواطن وبس .. أفتكر دا عندهم خاضع لفلسفة فكرية
فالديانة مش من ضمن المعلومات اللي بتدونها الدولة عن مواطنيها .. لأسباب كتير مش موضوعنا
ولكن هيا أقرت إنه مكنش مسلم وقالها إنه اسلم ... بس فاضل الإشهار كإجراء قانوني ..
رغم إنه فيه شبهة يكون الصحفي دا بيعتبر المسألة ماهي إلا إجرائات قانونية عشان يقدر يتزوجها وبيقولها كلمتين عشان يرضيها
رغم إن الموضوع بيخلص في دقايق في أي مكتب معتمد لإشهار الإسلام .. والموضوع فيه لعب كبير
ورغم إن كونه صحفي وقالها أنا أعرف عن الإسلام أكتر منك ( الجملة دي بالمناسبة متدلش على إنه يقصد إنه يعرف حجات إيجابية )
ولكن ببساطة ممكن يكون ظننا مش في محله وهيشهر إسلامه عن قناعة بالدين الإسلامي بجد
على أي حال .. كونه ملحد أو أي حاجة طوال فترة حبهم لبعض دا مش سبب لرفض إسلامه ومنعهم من الزواج !
لإنه قبل الزواج أساسًا مسلم ولا ملحد مش هتفرق في نظر الشرع المشكلة فقط في الإرتباط بزواج هنا هوا قال إنه مسلم
رغم كل الشبهات دي محدش يقدر يقوله لما يجي يشهر اسلامه ... مش مقبولة منك
ولا حتى هيا هتتحمل مسؤولية موقفه دا لو أظهرلها إنه مسلم .. وزره وحده دا
فطالما الراجل أبدى إستعداده إنه يشهر اسلامه .. الموضوع كدا إنتهى ببساطة
ومحدش يقدر يقولها دا كافر لإنه وقتها هيبقى بيكفر مسلم لا بينة على كفره
بل بيكفر ملايين المسلمين اللي دخلوا للإسلام لزواجهم من نساء مسلمات .. والموضوع دا بيحصل يوميًا في مصر
حتى كونه مأبداش الإستعداد دا إلا لما لقيه هيبقى عائق قانوني للزواج منها
دا كله هيتوقف عند إشهار اسلامه كدا نقولها مبروك من سكات محدش يقدر يغالطهم أساسًا
عمومًا
طالما إنه مش هيتم الزواج إلا بإشهار اسلامه .. يبقى الجدل كله انتهى .. قال عن نفسه مسلم يبقى مسلم
والماضي مش قضيتنا يتوبوا لربنا لو غلطوا والناس ملهاش دعوة .. واللي ستره ربنا بستره ننصحه مش ننتتبع عورته .
.. أخت رانيا .. أخ ديفوس .. ( مبروك ) .. ربنا يخليكم لبعض ... انتهينا ..
ويا أخت رانيا أنا مكنتش عايزك تحلفي ولا قلت أساسًا إنك كدابة
أنا مش من أتباع العقلية دي.. بتاعة قريتنا بتاعتنا وأي حد هيدخل علينا لازم نعرف عرفنا منين وجلنا إزاي
ولو اتكلم يبقوا خايفين على عقول أبناء القرية البسيطة اللي ميعرفوش حاجة في الدنيا
أنا فاهم شوية .. يعني عارف إن دا نت ... محركات بحث .. ملايين النتائج .. آلاف الزوار ..
ملايين العضويات وملايين المشاكل في عالم الإنترنت يوميًا
ملايين المصادر لكل المعلومات .. كم معلومات من كل الحضارات والثقافات مرعب
فحكاية عضوية جديدة ... غسيل مخ ... الكلام دا - مع إحترامي ليه - .. مش هتلاقيه من ضمن مصطلحاتي خالص
وباقي كلامك أنا وضحت موقفي من شكل العلاقة وتبريرك مش هيغيره
- الشرع بيحرم خلوتكم حتى وهوا في الحالة اللي وصفتيها .. آه ممكن يفكر يزني وهوا تعبان ومابفكرش في الأكل والشرب .. دي حقيقة -
وكويس إنك قبلتي النصيحة .. أنا الحقيقة معرفش ظروفك إيه فمش هقدر أفتي بس ماتشوفيلك شغلانة تانية غير حكاية الغطس دي
مابتخافيش من القروش يارانيا .. بتكلم بجد .. درجة المخاطر فيها عالية
ربنا يوفقكم ومبروك مقدمًا