معايا من 50000 ل 55000 وعايز اجيب بيهم عربية حالتها كويسة

انا معايا حوالي 50000 وممكن يزيدوا شوية يبقوا 55000 بالكتير اوي عايز اجيب بيهم عربية حالتها كويسة في ناس نصحتني بالفيرنا بس بيني وبينكوا مش مرتاح لها رغم انها عربية اقتصادية جدا قطع غيارها رخيصة وموفرة في البنزين لكن واطية علي الارض وبتحك في المطبات وصالونها ضيق وفكرت في النوبيرا وبرضه الناس قالتلي فيها مشاكل كتير وبتحرق بنزين وسعرها بينزل جامد لما اجي ابيعها جامد فانا محتار عايز عربية قطع غيارها رخيصة وموفرة في البنزين وعائلية ويكون موديلها قريب من 2007 وانت طالع ولو في عربيات تانية كويسة غير دول قلولي عليها هل في حاجة بالسعر ده وياريت لو حد معاه نوبيرا يكلمني عن اهم عيوبها علشان لو بسيطة نتوكل علي الله ونجيبها انا مستني الرد من خبراء المنتدي



تم تعديل العنوان ليتناسب مع المحتوى
م.ع 7

النوبيرا جميلة و بياعة عادي خالص و ممكن رينو كليو 2007 من 45 الف ل 50 الف لو حالة نضيفة عربية مريحة و جرايه و عالية عن الارض و حمالة أسيه. المهم توقع حاجة نضيفة.

اللانوس او الفيرنا او النوبيرا

غريبة حكاية إن النوبيرا سعر إعادة بيعها واقع ..!!!!!!!!!....

النوبيرا يها بعض العيوب زيها زى اى عربية اعرف عيوبها واعرف ازاى تتعامل معاها تستريح .وغير كدة النوبيرا محترمة جدا كمالياتها معقولة وثباتها جيد وموتورها قوى وواسعة وتكيفها جيد والعيوب الى قابلتنى هى :
1 - صوت الموتور على وده عيب فى كل ال gm عموما فمثلا انا كنت باتكلم مع واح معاه كروز من الزيرو قالى بعد 50000 كم صوتها عالى فا متشغلش بالك
2- مقصات النوبيرا جلبها بتبوظ بسرعة فالافضل انك تغير المقص كله حسب امكانياتك اى نوع هيبقى افضل من تغيير الجلب بس او الاستيراد
3 - استهلاك البنزين عالى وغياب فى الدوارة ودى حلها تغيير الرشاشات برشاشات هيونداى او بى ام او اى نوع والموضوع ده قتل بحثا على المنتدى
غير كده العربية جميلة ومفيهاش مشاكل ولو هتجيب هات المنوال ونصيحة فى اى سيارة لما تغير قطعة غيار على قد ما تقدر هات قطع غيار جديدة اصلية حتى لو غالية لانك هتريح بالك كتير من الصنايعية والفتايين .
وربنا يوفقك

طيب ايه رايكوا في مرسيدس 200 موديل 84 القديمة هل هي افضل ولا اجيب عربية كوري موديلها قريب احسن

اقتباس:

---

المشاركة الأصلية كتبت بواسطة theman

طيب ايه رايكوا في مرسيدس 200 موديل 84 القديمة هل هي افضل ولا اجيب عربية كوري موديلها قريب احسن

---

باشا كده المقارنة بعيييييدة جدا
مفيش عناصر مقارنة اساسا اعتقد حضرتك محتاج تعيد نظر في قرارك وتحدد متطلباتك الاول المرسيدس جميلة ثبات وسرعة وقيمة وشياكة وتحمل ووسع لكن طبعا عمر افتراضي بعيد جدا شقيانة بقالها كتير يبقي لازم لو فكرت فيها تجيبها لقطة ازاز كهربا تكيف شغال سليمة مش متهانة هاتلاقيها غالية لو نضيفة العربية دي منها بيعمل 28000 ومنها ب 55000

رينو لوجان 2010

لو مفيش عندك عقده الصيني
اسبرانزا 516

اقتباس:

---

المشاركة الأصلية كتبت بواسطة pepo2011

باشا كده المقارنة بعيييييدة جدا
مفيش عناصر مقارنة اساسا اعتقد حضرتك محتاج تعيد نظر في قرارك وتحدد متطلباتك الاول المرسيدس جميلة ثبات وسرعة وقيمة وشياكة وتحمل ووسع لكن طبعا عمر افتراضي بعيد جدا شقيانة بقالها كتير يبقي لازم لو فكرت فيها تجيبها لقطة ازاز كهربا تكيف شغال سليمة مش متهانة هاتلاقيها غالية لو نضيفة العربية دي منها بيعمل 28000 ومنها ب 55000

---

انا بفكر في حاجة في رينج 50 او 55 موديل 84 انا بسال لو قدامي حاجة حالتها كويسة الي حدا ما وقدامي عربية كوري موديلها قريب بنفس السعر انهي افضل انا اهم متطلباتي قطع غيار رخيصة ومتوفرة في كل حتة وموفرة في البنزين

اقتباس:

---

المشاركة الأصلية كتبت بواسطة theman

انا بفكر في حاجة في رينج 50 او 55 موديل 84 انا بسال لو قدامي حاجة حالتها كويسة الي حدا ما وقدامي عربية كوري موديلها قريب بنفس السعر انهي افضل انا اهم متطلباتي قطع غيار رخيصة ومتوفرة في كل حتة وموفرة في البنزين

---

ياباشا الموضوع نسبي بين الناس يعني حضرتك هاتلاقي واحد يقولك تركب عربية 84 ب 50000 في حين انك ممكن تركبها 2007 بنفس السعر
لكن المرسيدس حاجاتة مش رخيصة ومش موفر في البنزين دي مكنة 2000 او 2300 سي سي
المقارنة صعبة لكن لو انت بتفكر انك هاتركب صخرة زي المرسيدس وشياكة وامان وثبات وقطع غيار معمرة يبقي الوضع مختلف