موضوع هام .. جير ريشيو Gear Ratio فتيس الكروز والأسترا والتوب سبيد .. الشرح والاسباب

**shoooma** · 24-05-2015 11:17 AM

كلنا سمعنا عن الجير ريشيو فالفتيس الاوتوماتيك لكن محدش عارف الارقام بتاعت كل نقلة بتعبر عن ايه ولا هتفيدينا فى ايه،

النهاردة حبيت اشرح للناس هنا معلومه جديده عرفتها عن اداء الفتيس الاوتوماتيك هتعدل من اسلوب قيادتك للعربية وهتخليك تحافظ على فتيس عربيتك وتطلع منه اعلى اداء

على سبيل المثال فتيس الكروز وفتيس الاسترا الجديده نفس الكود 6T30 الفتيس اوتوماتيك 6 غيارات والجير ريشيو بتاعه زى منتوا شايفين

1st gear 4.449:1
2nd gear 2.908:1
3rd gear 1.893:1
4th gear 1.446:1
5th gear 1.000:1
6th gear 0.742:1
Final Drive (Reverse) -3.47:1

ايه الكلام الغريب ده ومعناة ايه !! والارقام دى وحدتها ايه بالظبط وبتدل على ايه وهتنفعنى فى ايه !!!

الجير ريشيو هندسيا يعنى النسبه بين السرعة الزاوية بين الـ Input اللى بيحرك الترس مع output الترس نفسه من السرعة الزاوية دى ،، ايه الهزيان ده ، طب انا واحد سايق عربية مالى ومال الهندسه والكلام ده ، عندك حق والله ، نقولها بلغة العربيات :) ، هى النسبه بين عدد لفات الموتور اللى هتعمل دوران كامل حول محور الفتيس ،،،،، برضو الكلام مكلكع ، طب اقولهالك بالعملى احسن.

يعنى ايه دوران حول المحور ؟؟؟ يعنى الكوبلن يلف لفه كاملة بمعنى ان العجلات الامامية المتصله بالكوبلن تلف لفه كاملة

بص يا سيدى فالنقلة الأولى فالنسب اللى مكتوبه فوق اللى هى بتاعه الفتيس بتاعنا مكتوب 1st gear 4.449:1 ، بمعنى ان فالنقلة الاولى عشان الفتيس يعمل دوران كامل حول المحور الموتور لازم يوصل ل4449 لفه فالدقيقة وده اجهاد عالى جدا عالموتور عشان كده دايما الناس بتقول الغيار الاول ده عشان تحرك بيه العربية مش للمشى ، تبص بقى عالغيار التانى هتلاقى 2nd gear 2.908:1 الفتيس علشان يعمل دوران كامل حول المحور محتاج 2908 لفه فالدقيقة من الموتور وده يعتبر نص الجهد المطلوب من الموتور فبالتالى بيقلل الاجهاد على الموتور وبيدى تسارع فى وقت اقل عشان كده الناس اللى بتشتكى انه وهو دىخلا على المطب هدى السرعه اوى وبعدين جه يدوس الار بى ام على اوى لكن العربيه مسحبتش السحبه اللى هو نفسه فيها وحاسس بالاحراج من سواق الفيرنا اللى نزل من عالمطب وطار من جنبه ، مهما قعدت تهرى فالفتيس وتقرص فيه انت فى وادى وهو فى وادى تانى ، لازم النسب دى تتحكم فيك وفى اداء الفتيس فخليك عاقل عشان لا تتعب فتيسك ولا تجهد موتورك ، وبلاش الFull Throttle كتير عشان دى افترا عالمكنه والفتيس ، نرجع تانى للنقلات ، المهم تلاقى قيم الجير ريشيو بتقل لحد ما توصل للنقلة الخامسة 5th gear 1.000:1 ، هنا بقى وصلنا لاهم نقلة بالنسبة لنا ، فى النقلة الخامسة عندنا حاله تعادل او تساوى بين مدخلات الفتيس ومخرجاته ، يعنى عدد لفات الموتور متساوى مع عدد لفات محور دوران الفتيس اللى هو الكوبلن ، يمعنى انك لو ماشى 4000 ار بى ام ، هتلاقى العجله بتلف بنفس السرعه ، يعنى كامل خرج الموتور واصل للعجله وهى دى النقلة اللى المفروض تحرق فيها وانت مش خايف على اجهاد الموتور ، احرق زى منتا عايز ، بعد كده نيجى للنقلة الاخيرة اللى هى السادسة 6th gear 0.742:1 وهنا زى منتو شايفين محور دوران الفتيس بيلف بعدد لفات اكبر من عدد لفات الموتور يعنى الـ output للفتيس بقى اكبر من الـInput وده معناه ان النقلة دى overdrive gear

لكن عندنا فى الكروز والاسترا النقلة دى مش حرق اكتر من كونها توفير لاستهلاك الوقود فبنعتبرها Economy gear

وأخيرا ، كاوتش العربية وده يعتبر ثالت نوع من Gearing يعنى زيه زى تروس الفتيس ولكن بدل ما هو بيربط بين الموتور ومحور الدوران ، لا بيربط بين محور الدوران والأرض

يعنى مثلا عندى فالعربية مقاس الكاوتش 225/45R17 ده لو حسبنا الـMetric Dimensions للكاوتش هنلاقى circumference (محيط الدائرة) = 199.271 سم ، ده معناه ان مع كل دوران كامل حول المحور (اللى هو الكوبلن = يعنى دوران كامل للعجلة) العربية بتسحب لقدام مسافة حوالى 2 متر، عشان كده كل ما تركب كاوتش اصغركل ما العربية تسحب مسافة اقل.

فبالتالى الناس اللى مركبه جنوط اكبر من مقاس الاستاندرد بيحس ان العربية اسرع لكن شايف قدامه سرعه اقل ، يعنى تلاقيك بتسابق واحد تانى وهو بيجرى بسرعه 170 وانت تلاقيك قدامك 160 وماشيين جنب بعض ده بسبب ان معادله حساب السرعة اختلفت عندك بأختلاف محيط دائرة الكاوتش ، وبكده بمعرفة الجير ريشيو للفتيس ومقاس الكاوتش بقى ممكن بكل سهولة انك تحسب سرعة العربية فى كل نقلة مع كل عدد لفات موتور

وشكرا

نسألكم الدعاء

#هشام

**shoooma** · 24-05-2015 11:10 PM

بخصوص الموضوع اللى كثر الجدل فيه بين ملاك الكروز ، ليه الكروز 2010 بتجيب توب سبيد اعلى من الموديلات الحديثة، مع العلم ان فيه عربيات 2010 محتاجه صيانه عشان تبقى فى قوة الكروز 2010 الحقيقية،

بص يا سيدى ، كلنا عارفين يعنى ايه الجير ريشيو دلوقتى لاننا شرحناها فالموضوع اللى قبل ده ، وزى محنا شايفين برضه فالصورة الفرق بين الجير ريشيو بين القديم والجديد ، القيم كان 6t40 والجديد 6t30

الفتيس الجديد قيم الجير ريشيو بتاعته اقل من القديم وده بيديله تسارع احسن طبعا مع الموتور الجديد زياده 8 حصان فبتحس بتحسن لكن زى منتوا شايفين الفروق بين الجير ريشيو القديمه والجديده بسيطه وعدد الاحصنه برضه مش الرقم القوى اوى فالتحسن موجود فالسحب ولكن مش الملحوظ بالدرجه

طب ازاى بقى حصان اعلى وجير ريشيو اقل لكن فالاخر الـ2010 بتجرى اسرع منها فالتوب سبيد ، اقولك يا سيدى ،

عادة يكون عزم الدوران اكتر عند الار بى ام الأقل، بحيث كل ما تنقل العربية لنقلة اعلى ، بيحصل انخفاض ضئيل فى الار بى ام ، وده بيسمح للعربية أن يكون لها قوة الدفع الثابته والمستمرة لحد ما توصل للريد زون عند اعلى نقلة.
فبالتالى العربية بيضيع جزء من عزمها بسبب ان عدد اللفات اللى بتنتج دوران كامل حول محور الفتيس (اللى قلنا عليه الكوبلن = لفه كامله للعجله) ثابت فعشان توصل للتوب سبيد لازم هتدخل للريد زون قبل ما الموتور يطلع كامل قدرته الحصانية.

ده بالاضافة لان حجم التورك كونفرتر فالفتيس القديم اكبر من الفتيس الجديد فبينقل العزم احسن

عشان كده تلاقى الار بى ام عالسرعات العالية للموديل الجديد اعلى منه لموديل الــ2010

فبالتالى الجير ريشيو القليلة حلوة فالتسارع لكن وحشه فالسباق عالطرق المفتوحه يعنى حلوة فى دراج ريس ، مش فى الرود ريس

وشكرا،

#هشام