الموضوع: للكروز: الاسئلة الشائعة واجابتها وكل ماتحتاجة للكروز

المشاركة الأصلية كتبت بواسطة ashouhdy

البوست دة فية عصارة خبرات جروب كروز موتورز تيم عالفيسبوك,بينقسم لأجزاء لملاك الكروز و الاسترا j كيفية الاعتناء بالفتيس الاوتوماتيك وغيار الزيت بتاعة و جزء بة اهم الاسئلة الشائعة حول الكروز بخبرات الاعضاء واهم مراكز الخدمة المتجربة و مواصفات العربية موديل 2015
هذا البوست بة كل ما تحتاجة لتكون مالك ذو خبرة في الكروز وخاص وحصري بجروب كروز موتورز تيم cruzemotorsteam واعضاؤة وغير مسموح نهائي بالنسخ او النقل (موافقة لنقلة لنايل موتورز لتعم الفائدة).

اولا الجزء الخاص بالفتيس:

موضوع هام خاص بالفتيس
************************************************** *********
اهم حاجة في العربية زيت الفتيس لازم تحافظ على تغييرة وانة يفضل دايما بأعلي جودة ويفضل تغييرة كل 20 الف كيلو مثلا.
الطريقة دي لتغيير الزيت بنفسك في اي بنزينة للصيانة الوقائية ولو حسيت بأي نوع من القلق في مراكز متخصصة لتغيير الزيت بكل سهولة.
طريقة تغيير زيت الفتيس للكروز والاسترا j
* اعادة كتابة للبوست بطريقة مبسطة وسهلة و متوافقة مع كلة *
لازم يتغير كل 20الف كيلو بنوع محترم
==================================
بيتغير علي مرتين
ولازم يكون مواصفات الزيت (ديكسرون٦) ودة بيبقي مكتوب عالعلبة بتاعت الزيت.
والموبيل 330 اللي في البنزينات مش متوافق مع العربية.
الطريقة سهلة جدا ، في 3 طبات ( لو مش عارف فين اماكن الطبات اسأل في التعليق )
واحدة بنفضي منها وواحدة بنقيس منها واحدة بنعبي منها
دور العربية وسيبها تسخن وهات كل النقلات واقف على كل نقلة 3 ثواني وبعدين هات البارك
اقفلها
ارفعها بالتساوي يعني في البنزينة او من 2 كوريك قدام وورا
نفتح طبة التفريغ ونسيبها تنزل كل الزيت
بعدين اقفلها
زود 4 عبوات (4 لتر)
دور العربية و سيبها دايرة .. *مهم جدا جدا جدا جدا انك تدور العربية قبل اللى جي*
افتح طبة القياس ( اوعي تفتحها والعربية مقفولة ..مهم جدا تكون العربية دايرة)
لو طبة القياس لقيتها بتنقط زيت (بتنقط يعنى ما بين كل نقطة والتانية ثانية)
يبقي كدة تمام اقفل كلة وانت خلصت.
لو منزلتش حاجة يبقي
عبي زيت من فوق وافضل زود لحد ما طبة القياس تنقط زيت
اول ما تنقط وقف تعبئة زيت
اقفل طبة القياس وطبة التعبئة
العربيات لحد 2014 حتاخد 5 لتر الا ربع
من 2014 وطالع في حدود 4 لتر الى اربعة ونص
والاهم ان طبة القياس تنزل لان دة المقياس
تكرر العملية بعد 200 الي 300ك
بس خلاص
يكرر عملية تغيير الزيت كل 20الف كيلو
=================================
زيت موتورك 5w30 ودة اللزوجة المطلوبة للعربية.
لو العربية عاملة كيلوهات عالية 80 الف ك وطالع يفضل زيت لزوجة 5w40
الكمية مظبوطة ٤ لتر و نصف فقط بالفلتر او ٤ لتر وربع فقط بدون تغيير فلتر دة للموتور الجديد من اول موديلات 2013
الموتور القديم ما قبل 2013 بياخد 4 بالفلتر ...
لو عملت كل الكلام دة زيت فتيس و ماتور...بأذن الله تعالي انسي اي مشاكل او اعطال
العربية وحش عالطريق قوة وفرامل و ثبات ماشاء الله وتكييف رائع وعفشة قمة في النعومة مقارنة بكل فئاتها من سيراتو و فلوينس غير التقفيل و العزل اللي معدي الفئة دي بسنين ضوئية
المرسيدس السي كلاس الجديدة جابت مواتير و التوكيل شال ايدة وقالهم اخبطوا راسكم في الحيط و الفلوينس بعض مواتيرها بتجيب زيت وهي زيرو ... تقريبا كل الفولكس والجتا والسكودا اللي بفتيس dsg بتحيب فتيس في اول سنة ودة في كل العربيات تقريبا مش موديل وموديل.
الكمال لله .... اتبع التعليمات الصح وانت تعيش مبسوط ... عصر الاعتماد علي التوكيل في المعلومات انتهي في كل العالم ... انا مشترك في منتديات اجنبية وكلة بيسأل بعضة و التوكيل اخر حاجة بيرحوها.
************************************************** *****
تحديث 20 نوفمبر:
موضوع مجمع بكل المعلومات المتداولة على الجروب للفتيس
http://www.nilemotors.net/nile/449498-a.html
************************************************** ******
تحديث 9 ديسمبر 2014
حصر للزيوت المتوافقة مع مواصفات ديكسرون 6 بمصر:
اولا مواصفات ديكسرون6 الاساسية ان الزيت يكون لزوجة 6.4 عند درجة حرارة 100
و منحنى اللزوجة 154
و اى لزوجة اعلى تكسر رقم 7 يبقي دخلنا في الديكسرون3 الغير متوافق مع العربية.
حصر لأنواع الزيوت المتوافقة مع ديكسرون 6 في السوق المصري:
1-
زيت فالفولين ماكس لايف سعر العبوة الواحدة 90 جنية
لزوجة 6 عند درجة حرارة 100
منحنى اللزوجة 163
2-
زيت موبيل ديكسرون6 العلبة الزرقا
لزوجة 5.83 عند حرارة 100
منحنى اللزوجة 145
3-
زيت موتيول motul atf vi
لزوجة 6.1 على درجة حرارة 100
منحنى اللزوجة 152
4-
زيت ولووف البلجيكي اوفيشيال تيك atf dvi
سعر اللتر 90 جنية
لزوجة 6 عند حرارة 100
منحنى اللزوجة 151
كدة يبقي الاقرب والافضل لمواصفات ديكسرون6 الاساسية هو زيت موتيول atf vi
************************************************** *********
تحديث 25 فبراير 2015 اسهل طريقة لتغيير الزيت
1- دور الموتور و سيبها توصل لدرجة الحرارة الطبيعية
2- ارفعها من قدام و ورا لتكون مستوية
3- هات بتاعة مياة نستلة الكبيرة وعلم عند كل لتر بقلم الوان
4- او هات بتاعت زيت 5 لتر شفافة من الجمب اللى متعلمة
5- نزل الزيت في الجركن و سيبة يبرد خالص
6- شوف قد اية زيت وحط زيهم بالضبط
7- تكرر العملية بعد يومان
************************************************** ***********
مراكز الخدمة المتجربة :
تحديث 20 مايو 2015
حصر لمراكز الصيانة والعفشجية و الميكانيكية المتجربين من الاعضاء , ومنقول كلامهم بالنص كالتالي للي خرج من الضمان او حابب التعامل بعيد عن التوكيل:
1-
عبد الرحمن شغال في توكيل سموحة بالاسكندرية اللى بيعمل الصيانات
و دة رقمة ومعرفش ورشتة فين برة
01224534844
2-
محمد ... شغال في توكيل رابعه العدويه ... ورشته مدينة نصر الحي السادس
3-
محمد جابر
كهربائي و متخصص كروز في أسكندرية
راكبلي داي لايت بيعلى ويوطي ذى الفابريقة مع نور التابلوة
و ويلكوم لايتز تنور الفوجات مع السنتر
فاهم جدا ومحترف كروز ونضيف بهبل
مكانة قدام جنينة الشلالات في اسكندرية في الشارع اللى فية حلوانى مانا للجاتوة
01220061285
4-
asfour car clinic
الاسكندرية الكيلو ٢٣. مدخل عبد القادر طريق البتروكيماويات
١) عمرات و صيانة واصلاح جميع انواع الفتيسات الاتوماتيك
٢) حل مشاكل الفتيسات الاتوماتيك بالتعاون مع كبار التوكيلات في مصر وخارجها
٣) كشف واصلاح وبرمجة كنترول يونتس الفتيسات والبالف بودي
٤) كشف وصيانة تورك كونفرتور مع نظافة الكوليرا بالزيت الساخن المضغوط والهوا المضغوط
،٥) خدمه تغيير زيوت فرامل.باور. فتيس.موتور.
٦)إستشارات فنيه لكل ما يتعلق بالسيارة
٦)كشف كفاءة موتور اختبار التنفيس
01223252397
5-
مركز فالفولين للزيوت بأكتوبر
المحور المركزى مول اجياد بعد ميدان النجده الساحه الى بعد بنك فيصل
ناس فاهمين جدا وممتازين
01061015026
6-
مركز بيبو للكهرباء
ده عنوانه ؛ 6 أكتوبر. .الحى11. مجاورة 7 عمارة 19 عمومى سنتر البدوى. ....
وده رقمه ؛ 01100561713
عرض الجروب ؛ تنظيف رشاشات وegr و بوابة وتشك اب عالكهرباء وصيانه وقائية وتنضيف ب200 جنية
7-
الأسطي ياسر المخ
سمكري ايدة تتلف في حرير عالمي بجد بتعامل معاة من سنيين طويلة
الاسكندرية قبل مستشفي طلعت مصطفي قبل المطب طريق المطار وانت رايح على كارفور
قبل توكيل بيجو و بروتون في داخلة صغيرة
ثالث ورشة عالشمال
01001520261
8-
محمد العفشجي
اسكندرية الابراهيمية
تاني شارع يمين بعد الاشارجي العالي
01223654305
9-
مركز اوتو برو
حضر المقابلة معانا و كان راجل متميز بالعلم والذوق والاخلاق
شكر فية كثيرون من اللي تعاملوا معاة
بلوك12 شارع الجيزة متفرع من شارع9 ميدان المفارق مساكن الزلزال المقطم القاهرة
م. أشرف مكي
01153831609
10-
احسن عفشجى فى 6 اكتوبر ؛ بوجى فالحى السادس سنتر وادى الملوك
11-
المهندس طارق الميكانيكى الورشة اسمها اليابانى فى ميامى شارع اسكندر ابراهيم ناحية القطار كشف بالكمبيوتر ومتجرب وبيفهم فى السيارات الحديثة ورقمه ضاع ان شاء الله هجيبه
12-
جمال شبل.. عرب المعادي... بوهيجي وعنده سمكري تبعه .. امانه لا توصف باتعامل معاه من 10 سنين باسبيله العربيه وامشي بجد رقمه
بعد مكتبة المعادي يمين .. في مربع جوه مليان صنايعيه
01223341611
13-
اسطي هلال سمكرى...في الدقي في الشارع الجانبي اللي جنب جاد بتاع شارع التحرير....تليفونه 01220635637
يتبع
************************************************** ***********
تحديث 20 مايو 2015
مواصفات شيفورلية كروز 2015
‫#‏مواصفات_كروز‬ 2015 لو في حاجة ناقصة نضيفها.
موتور 1600 بقوة 116حصان و عزم 155نيوتن بيشتغل عادى جدا ببنزين92 حديث
فتيس 6 سرعات ستيبترونيك حديث مطور بكود 6t30 من اول 2014
4 ازاز كهربا بلمسة واحدة
اشارات بالمرايا
تصفيح بالكامل اسفل السيارة
فولو مي لايتس لما تنزل تضرب رعاش تفضل منورة لحد 2 دقيقة
فوج لايتس اصلي
اصوات تنبية عند ترك فرامل اليد مرفوعة والسير بالعربية
اصوات تنبية عند ترك الاشارة مضاءة فترة كبيرة
اصوات تنبية عند ترك اى انوار مضاءة ونزلت من العربية
صوت الانتظار بعد فترة جوة العربية والمفتاح متشال بيقلب صامت
سنترلوك بأنذار فابريقة مش راكب في التوكيل
ايمبوليزر الجيل الخامس احدث جيل
طارة مالتي فانكشن
حامل اكواب متحرك
كاسيت سي دى ام بي 3 ب aux
كاسيت العربية auto volume الصوت بيعلي و يوطي اوتوماتيك حسب الضوضاء
تحكم منفصل للاكواليزر واعدادت صوت الكاسيت للراديو والسي دي وال aux
أمكانية ضبط صوت الكاسيت العلو عند الفتح اوتوماتيك عشان لا تفاجأ بعلو الصوت
كاسيت العربية صوت قوى جدا بأربع سماعات 45وات في 4 سماعات
تحكم في اعدادت العربية من الكاسيت مثل الاشارات الانوار وصوت الكلاكس مع الغلق
فصل اوتوماتيك لكل كهربا العربية بعد 10 دقايق لضمان الحفاظ عالبطارية
تكييف بحساس الكنرونى لقياس مدى نسبة الاوكسجين بالكابينة
ازاز العربية حرارى 30% عزل حرارة
عفشة بتصميم رياضي
تصفيح للموتور كامل امامي
مرايات تحكم كهرباء بدون ضم
فتح الشنطة بالكامل فتحة كاملة من ريموت العربية
دركسيون تليسكوبي بيتحرك برة وجوة وفوق وتحت
كرسي السائق 6 اتجاهات وبيعلى ويوطي
كمبيوتر كامل بيتحكم في العربية يقرا اى اعطال وينبهك ليها
كمبيوتر رحلات
كمبيوتر لحساب استهلاك البنزين اللحظي ولكل 100ك متر
كمبيوتر يحسب الكيلومترات المتبقية بالبنزين اللي في العربية
دواسة البنزين كهربا مش على سلك واير
عزل مضاعف للعربية في الكابوت والشنطة والابواب على 2 كاوتش تخين و موكيت شمواة
عزل اسفل الابواب لمنع دخول المياة بكاوتش مخصوص
جنوط مقاس 16 بكاوتش عريض 205 على 60
مسامير الجنوط صلب مش زهر ذى الكورولا الجديدة
تصميم رياضي للعفشة من المساعدين والسوست الخلفية للثبات
ارتفاع العربية 16 سنتي عن الارض
ديسكات فرامل امامية وخلفية بقطر كبير
abs نظام مانع للانغلاق
ebd توزيع الكتروني للفرامل على كل فردة كاوتش على حدى
tc تراكشن كنترول لمنع انزلاق السيارة او الكاوتش
esp نظان اتزان الكترونى لمنع تعويم العربية عالملفات والغرز او الطرق الزلقة
brake assist معزز فرامل للطوارئ
2 airbags
مخدع امامي بدرج كبير متحرك
حامل اكواب في كل باب
2 مخرج كهرباء امامي وخلفي للركاب الخلفيين
شنطة العربية واسعة جدا ماشاء الله بحر وعريضة
الدرج الامامي بلمبة اضاءة وواسع جدا
اضاءة انوار السيارة والتابلوة عند فتح الباب
اضاءة انوار صالون السيارة عند فتح العربية من الريموت
غلق اوتوماتيك للسنتر عند الوصول لسرعة 10كيلومتر
************************************************** *******
أكثر الأسألة شيوعا faq :
سؤال: العربية بتفضل جايبة 5 مع الحرق ومش بتنقل 6 طول ما انا حارق او لو جايب مانيوال وعالسادس لما السرعة بتزيد عن 180 العربية بتنزل للخامس
.
.
.
اجابة: الترس السادس ترس ايكو للتوفير عزم قليل عشان يريح الموتور في الجري الهادى ويوفر بنزين لما العزم بتاع الموتور بيزيد عن قدرتة العربية بترجع للخامس الاقوى عزما واداء عشان تدي الاداء المطلوب
.
.
.
سؤال 2: العربية اخرها 190
أجابة: حقيقة ال 2014 وطالع اخرها فعلا 195
.
.
.
سؤال3: هل العربية كوري
اجابة: الشيفورلية كروز عربية أمريكي بتتقفل في كذا منطقة ذى استراليا كندا كوريا امريكا
واحنا بيجلنا التقفيل الكورى اللى بيروح للشرق الاوسط كلة واوروبا كلها
مكونات العربية اغلبيتها اوروبي وامريكي وبعض الاجزاء كوري طبقا لبلد التقفيل.
والعربية الدايو لاسيتي هى الكروز ولكن كانت شركة جنرال موتورز وقتها لم تأخذ حق وضع العلامة التجارية الخاصة بها على العربية وكانت بتنزل بعلامة المصنع الكورى الدايو لحد ما اشترتها كلها واصبح لها الحق وضع علامتها التجارية عليها
.
.
.
سؤال4: العربية فعلا ماتور و فتيس استرا او فتيس جديد
اجابة: الماتور فعلا من اول 2013 هو ماتور الاسترا الجديدة اللى بتنزل عندنا لحد النهاردة
الفتيس اتعدل 3 مرات عن 2010 لحد 2013 كان بأخر تعديل وكودة 6t40.
من اول 2014 فتيس مختلف في اجزاؤة مش مجرد تعديل بكود 6t30 ودة فعلا اللى نازل حاليا المفروض في الاسترا 2014 و 2015
طب هل العربية بتجيب فتيس ! اى عربية في الدنيا معرضة للاعطال المهم متابعة غيارات الزيت بدري بدري بالطريقة الصح ولكن من اول 2013 اصبحت نادرة الاعطال واحنا حاليا داخلين ع 2016
.
.
.
سؤال: الكروز الجديدة اعلي من القديمة؟
اجابة: فعلا الكروز من 2013 اعلى من ما قبل بحوالى 2 سنتى و نص نتيجة اختلاف اليايات , القديمة يايات ارفع فبتاخد ثقل العربية وتنزل بية لتحت على عكس الجديدة يايات اتخن مش بتهبط بثقل العربية
.
.
.
سؤال: تكلفة تغيير الفتيس في التوكيل كام ؟؟؟
أجابة: تكلفة تغيير الفتيس لموديلات 2010 (عدي على الضمان 3 سنين بفرض اننا في 2016) بالضبط 15الف جنية ... اما بالنسبة لا قدر الله موديلات حديثة حصل لها اى عطل كان من اول 2012 وخرجت من الضمان مثلا تكلفة التغيير 10% من ثمنة اى حواللى 6500ج بالضبط طبعا بضمان التوكيل لمدة عام
وللعلم هناك مراكز متخصصة لاصلاح الفتيس مذكورة في البوست المثبت
.
.
.
معلومة:
العربيه يا جماعه الخير سرعتها اخرها ٢٠٠ مع الحرق يعني للي بيحب يجري او يطلع فوق ال ٢٠٠ العربيه مش هتنفعو العربيه مريحه وفيها نسبه ثبات عاليه مقارنه بعربيات كتير من نفس الفئه سحب العربيه بالموتور والفتيس الجديد متجرب كذا مره من صفر ل ١٠٠ في ١٠ ثواني العربيه مش بتكسر سرعه ال ٢٠٠ وفي ناس اخرها معاهم ١٨٥ هيا العربيه كدا والعربيه كوري وموديل ٢٠١٦ الفيس ليفت برضو كوري
.
.
.
س ..وسائل الامان في الكروز
ج.. 2ايرباج
abs
ebd
تركشن كنترول tc
نظام الثبات الالكتروني esp
مفتاح مشفر
تحكم في فتح الابواب من زرار فتح اللوك في الريموت
.
.
.
س: العربية دي عفشتها اية؟
ج:
العفشه امامي ماكفرسون عباره عن سوسته في قلبها المساعد ومقصات اماميه الومنيوم وراكبه على سب فريم راكب على الشاسيه علشان يقلل الاهتزازات والضوضاء الباور ستيرنج زيت والعفشه الخلفيه تورشن بيم
.
.
.
س.نوع الكوتش
س.مقاس الكوتش
س.نوع الجنوط
ج.كومهو .او .هانكوك
ج.16-60-205
ج.جنوط اسبور ..الاستبن حديد نفس المقاس
.
.
.
سؤال انا اشتري كروز ليه
علشان جروبها يخليك مطمن طول الوقت smile emoticon
.
.
.
سؤال: العربية وانا مشغل التكييف ساعات بحس انها عايزة تبطل عالسرعات البطيئة
أجابة: تأكد من جودة البنزين اللي في العربية لانها حساسة للبنزين الردئ و التبطيلة دى لأن نسبة الحرق غير كافية لتدني رقم الاوكتان ,حط بنزين من محطات محترمة وكل 5الاف كيلو حط منظف دورة البنزين
.
.
.
سؤال : وانا بدور الصبح بحس ان الموتور بيترج او العربية بتترج
اجابة: الموتور الجديد فعلا في الcold start بيترج خفيف ودة في كل الكروز مع التدويرة .. لتقليل نسبة الرج دي انتظر اللمبات انها تطفي
.
.
.
معلومه عن البوجيهات before 2013 njk bkr6 heat range 6 size 16 mm iridum or platinum or v power
:2013-2015. Njk. Zfr6 heat range 6 size 16 iridum or platinum or copper size 16electrode gap 0.9 for both models
.
.
.
س : ما انواع وخواص السوائل في السياره .
ج: زيت الموتور يفضل استخدام زيت تخليقي بالكامل fully synthic 5w30 or 5w40 زيت الفتيس dexeon vi fully synthic مياه التبريد تحتوي على مضاد للتجمد جليكول الايثيلين بتركيز ٥٠ في الميه لون احمر مواصفات gl12+
.
.
.
س: هل ممكن تركيب اى كماليات في الكروز ام لا وهل التوكيل يعترض ام لا
ج: يمكن تركيب كماليات بكل سهولة شرط الخبرة في التركيب والتوكيل لا يعترض طالما العربية بخير ! مثال: اذا حدث عطل كهربي وكنت مركب زينون سيرمي اللوم عليك ويحملك السبب بسبب الزينون
.
.
.
س: احيانا مع التدوير بنسمع زنة كدة في التابلوة
ج: دة صوت بوابة التكييف بتعمل تيست و تفتح مع الدوارة دايما في كل الموديلات
.
.
.
س: هو موتور العربية كورى ؟ 2013 و طالع
ج: موتور العربية صناعة اوروبي و بلد المنشأ هنجارى - سويسرا وبالتحديد st.gotthard
وهو كودة بالتحديد 1.6l i4 fam1 generation3 lde
قوتة 116حصان صافي بنسبة انضغاط 10.8:1
.
.
.
س: هي كل موديلات الكروز نفس الموبينة بتاعت الكهربا ؟
ج:
موبينه العربيه لحد ٢٠١٢ عباره عن قطعه واحده وطالع منها اربع اسلاك لكل بوجيه سلك وفوق ٢٠١٣ عباره عن موبينه خاصه لكل بوجيه ودي طبعا اقوى وافضل القديمه
.
.
.
معلومة:
كوعه الثيرموستات عباره عن جزئ ميكانيكي بيفتخ لما الحراره تعلى والضغط يزيد دا في موديلات لحد ٢٠١٢ ومن اول ٢٠١٣ ثيرموستات كهربائي التحكم بالكامل
.
.
.
معلومة:
فلتر الزيت في موديلات لحد ٢٠١٢ فلتر حشو تقليدي بعلبه معدنيه اما من اول ٢٠١٣ عباره عن حشوه فقط
.
.
.
س: العربية دى بتاعت شد
ج: العربية بتجري وسريعة وتمام ولكن الاوتوماتيك واى فتيس اوتو مش بيحب الكيك داون الكتير عمال على بطال لأن الزيت بيشخن جامد والتورك كونفرتور بيتعب
.
.
.
معلومة:
فلتر هواء الموتور والتكييف مشترك بين كل موديلات الكروز والاوبل استرا وكذالك المقصات والمساعدين والسوست
.
.
.
معلومة:
زيت الباور لديه ماسوره تبريد في كل الموديلات وزيت المكنه في في موديلات من اول ٢٠١٣ له دوره تبريد
.
.
.
معلومة:
موديلات الكروز لحد ٢٠١٢ تعمل بنظام تقليدي للكامات بمعنى ان زوايا الفتح والغلق ثابته مسبقا على سير الكاتينه في المقابل موديلات من اول ٢٠١٣ تعمل بنظام الكامات متغيره التوقيت ودا افضل وبيدي عزم اكتر وبيقلل استهلاك البنزين vvt
.
.
.
س: هل يوجد فرق في العفشة بين الشكل القديم و الشكل الجديد؟
ج: اة في فرق ، يايات الشكل القديم تعتبر اقصر فالعربية بتكون اوطي ، و مساعدين الشكل القديم انشف من الشكل الجديد ولكنهم نفس البارت نامبر و بيركبوا علي بعض عادي جدا
.
.
.
س : أعراض تلف علبه البيئه ؟
ج: كذا حاجه بتعرفك ان علبه البيئه فيها مشكله منها حساس الاوكسوجين رقم ٢ في حاله تكسر الماده الفاعله في العلبه او انتهاء صلاحيتها وفي حال انسداد العلبه هتلاحظ ضعف سحب العربيه ومترضاش تجيب سرعات خالص ممكن متعديش ال ١٠٠ كيلو واحيانا نتش في الفتيس وتوصل لمرحله ان العربيه تطفي متشتغلش خالص.
.
.
.
س: هل الكــــروز استهلاكها عالى فى حرق البنزين
ج: الكروز حساسه جدا فى ضغطت رجلك على دواسة البنزين وموفره جدا فى طرق السفر الطويله بتوصل فعليا 7.5 لتر لكل 100 كيلو اما مابين داخل البلد فى الزحمه ومابين الطرق السريعه فمتوسط الاستهلاك 9.5 لكل 100 كيلو ده مش كلام نظرى ده استهلاك عربيتى من الزيرو والى الان (عربيتى كروز 2013 بالموتور الايكوتك الجديد) يعنى التانك بيوصل معايا الى 650 كيلو من اول تفويلة الزور الى حد ما لمبة تنبيه نفاذ الوقود ماتنور والتانك 60 لتر وهو الاكبر فى فئتها ولا منافس فى حجمه فى فئتها وبيريح بالك فى السفر وفيه كمان احتيطى مقدر ب 8 لترات بعد مالمبة البنزين تنور تمشيك الى اقرب بنزينه.
.
.
.
س: هل عزل الكروز جيد
ج: عزل الكروز من افضل مايمكن فى فئتها لباد فى كل زاويه ومكان ... قوايم ... سقف بلستيكات صغيره فى الاركان ... والارضيه سمك العزل فيها 3 سم تقريبا بفوم عازل تحت طبقة الموكيت والموكيت نفسه هو افضل خامه لمستها عن قرب فى فئتها بعد مقارنات كتير فى خلال رحلتى قبل الشراء
.
.
.
س : ماهى الملحقات مع السياره
ج: الملحقات هيا اريال وطفايه وولاعه (فى 2013 وماقبل فقط) و4 دواسات موكيت من افضل الخامات فى فئتها وقاطره تستخدم عند جر السياره فى اوقات الاعطال لاقدر الله وكتالوج وكتيب ضمان من منصور
.
.
.
س: هل من الافضل للفتيس اني اسيبه علي n. وابطل العربيه ولا الافضل. علي البارك
ج: يفضل طبعا على البارك فى الركنات ولكن لو على مرتفع او منخفض شد فرامل اليد كويس جدا وبعدين عشق والعكس لما تيجى تتحرك.
.
.
.
س: ازاي بقي اجيب بالفتيس السادس
ج: الفتيس بيجيب السادس بكل سهوله لو انت عودت العربيه على نمط القياده الاقتصادى يعنى رجلك تكون خفيفه جداااا انا الفتيس عندى بيتلكك يجيب السادس
.
.
.
س: ما هي مقاسات لمبات الكروز للفانوس الاصلي
ج: اللمبات الاصلية مقاسها h4 و الفوج h8
.
.
.
س: هل يمكن وضع لمبات ذات وات عالي 100 وات و 200وات بدل من اللمبات الاصلي
ج: لا يمكن و حتحرق الفيوز في صندوق الفيوزات
.
.
.
س: ما معني لمبة الاعطال البرتقالي مضاءة في التابلوة بشكل مستمر بدون فلاش
ج: معناها ان هناك عطل غير عاجل يتطلب وضعها لما تيجي فرصة علي جهاز الاعطال ولكن لو اللمبة بتنور و تطفي ذي الفلاش دة عطل خطير و يجب حمل العربية الي التوكيل
.
.
.
معلومة:
...العربية وهي علي الp او n لما تدوس بنزين مش بتعدي ال 3 rpm واعتقد ده حماية للموتور من الهاي ريفج
.
.
.
سؤال : مروحه السياره تعمل باقصى سرعه فقط دون تشغيل باقى السرعات وانخفاض فى منسوب مياه القربه بشكل مستمر دون ارتفاح مؤشر الحراره ؟
اجابه : عطل بالثرموستات ويجيب تغيره فورا
توابع اهمال العطل : شرخ فى قربه مياه وتشقق خارطيم التبريد والجيوان وكولر تبريد المياه
.
.
.
معلومة:
سنسور حرارة الجو مرتبط ارتباط مباشر مع التكييف ، اذا الحساس بتاع حرارة الجو الخارجية بايظ غالبا التكييف مش حيقوم ومكان الحساس قدام ورا الفوج الشمال.
.
.
.
سؤال : التكيف بيشتغل بس بيطلع بخار ومياه القريه ينتقص جامد بدون إي تسريب في حوض الموتور ?
اجابه : التسريب جاي من مواسير التدفئه داخل صالون السياره وفي الغالب هتلاحظ ظهور المياه في ارضيه الصالون
.
.
.
سؤال : عند تغير فلتر مكيف الهواء داخل السياره أو الكشف عليه نجد آثار مياه ?
اجابه: دي مياه المطر او الغسيل أو المساحات تراكمت نتيجه انسداد فتحه الصرف الخاص بيها في حوض المساحات وفتحه التكيف ومع ارتفاع المنسوب وحركه السياره قد تتسرب المياه إلى الفلتر
.
.
.
سؤأل : هل تركيب لمبات الزرقاء على لوحه النمر الخلفيه مضر وهل نفس الكلام ينطبق على اللمبات الليد ؟
اجابه : تركيب لمبات غير لمبات العربيه مضر جدا وبتسبب قفله وبتسيح الدوايه ... اما عن اللمبات الليد فهى غير مضره ولكن لا تعطى اشاره للكمبيوتر عند احتراق اللمبه وبالتالى لا يستطيع الكمبيوتر تنبهيك بوجود لمبه محروقه بسيارتك وذالك لان الاشارات تعتمد ع المقاومه وهنا المقاومه تختلف فيجب تركب اللمبات الاصليه وان اردت تغير الاضائه عليك بوضع لاصق فوق زجاجه اللمبه
.
.
.
سؤال : وانا ماشى بالعربيه ودايس ع الدواسه عادى من غير حرق احيانا بسمع صوت زنه جاى من الجمب اليمين فى التابلوه ؟
اجابه : الصوت ده جاى من عمه الهوا ضغط الهواء جواها شديد جدا وده بيكون نتيجه ان قاعده الهوا مش راكبه صح او القواعد بتاعتها الجلد مش مضبوطه او مقطومه فالباتالى الصوت بيرد فى العربيه من جوه
.
.
.
سؤال : لما باخد مطب عادى بسمع صوت طقه ودام مبتظهرش فى النقراو الطرق المتكسره ؟
اجابه : ده نتيجه تأكل مسامير الكليبر ومع الوقت وعدم الاستخدام السليم بيحصل بوش ويعمل الصوت ده
للمحافظه : تغير التيل فى مواعيده - تشحيم وتنظيف المسامير عند تغير التيل - الاستخدام السليم
.
.
.
معلومه : عند تغير التيل الخلفى برجاء مرعاه ان وضع البستم الخلفى يختلف عن وضع البستم الامامى
البستم الامامى يعمل عن طريق الكبس المباشر
البستم الخلفى عباره سن يقوم بدوران يمين وشمال حسب اتجاه الخروج وعند تغير تيل يجب استخدام الاداء الخاصه بيه
.
.
.
س: لما بفتح الباب مش بيجبلي في التابلوه ان في باب مفتوح
ج: اللمبة بتنور مع المفتاح و زرار المنيو لو مكتوب fill fuel مش حيجيب حاجة غيرها

مع تحيات اعضاء
جروب كروز موتورز تيم cruze motors team اقوى وافضل جروب لمالكي الكروز
معا لخدمة بعض

تقرير رائع شكرا على مجهود حضرتك فى سؤال كمان بالنسبة لو عايز اركب كماليات زياظه سنسور باركنج وتسجيل تاتش تنصحنى بايه ؟