الموضوع: تجربه افيو كوري 2009 كسر زيرو

بسم الله الرحم الرحيم
الاول كان معايا فيكترا بي 1996 1.6 بس حالتها كانت مش قد كدا عشان كدا محبتهاش لانها كانت اتهرت شغل مع ناس مبترحمش ودي غلطه كبيره ان واحد يجيب اوبل متهانه
المهم بعتها وقعدت مده من غير عربيه ولسه من كام يوم شاري افيو 2009 كوري سيلفر فريكه بالكامل عدا جزء لا يتعدي 10 سم فقط يعني حاجه لاتذكر والحاله العامه فعلا شاذه بحكم اني بعرف اتفرج واحكم وكمان راي كل الصنايعيه والاساتذه الي شافهوها وعداد 17000 كم وكسوه جدلد ودواسه جلد زمفيش خرابيش وكاوتشها الاصلي متغيرش لانها كانت مرفوعه ومفيش اي حاجه فيها اتغيرت ولا تيل ولا كاوتش ولا اي حاجه غير الكام صيانه الي قبل ال20000 كم المهم العربيه دي جبتها ب69000 ج
بفضل الله العربيه مريحاني جدا واستهلاكها في البنزين بسم الله ماشاء الله بتشمه
بروح بيها كل يوم من دفره مركز طنطا لمحافظه كفر الشيخ والتكييف شغال طول الطريق رايح جاي ومتوسط السرعه ع الدولي 120 والطريق حوالي 100كم رايح جاي بتاخد 8 لتر
وروحت القاهره من طنطا ولفيت هناك شويه ورجعت والتكييف شغال من الجراج للجراج العربيه عدت 220 كم واستهلكت 15 لتر (بالظبط اخدت شرطه-انا كنت مفول كانت اكتر من f يعني 4 او 5 لتر وكمان نزلت للشرطه الي تحتها بالظبط)
يعني لو حسبنا استهلاكها في السفر هنلاقيه 290 كم في الصفيحه في السفر الطوالي ومتوسط السرعه 100 كم/س
انا الي بحكي الكلام دا عن تجربه شخصيه بس حاسه غريب شويه ولا هوة دا فعلا استهلاكها في البنزين
الحاجه الاهم اني ركبت افيو 2010 بتاع صاحبي بس من منصور هنا بس فعلا فيه فرق واكبر فرق واضح في عزل العربيه وكل الي ركب معايا حس بدا حتي صاحب الافيو المصري
المهم التسارع حسه ضعيف شويه وخصوصا لغايه ال60 وبيبان اوي لو التكييف شغال
بس بصراحه محسبتوش
بس الي جربه بنفسه في حضراتكوا ياريت يقوله
الماكس مم اسبيد جبت بيها قبل ال180 بحاجه بسيطه كنت انا وسيراتو 2006 بنجرب العربيتين بس طبعا تجميع السيراتو افضل بكتير بس دا مش مقياس
ياريت الي جاب بيها ارقام غير كدا يقول للعلم بالشيء ليس الا
الغيار الي جربته وشديت بيها لغايه الريد زون هو التاني وصل قبل ال100 بحاجه لاتذكر
الاستهلاك جوا البلد محسبتوش لسه
في السفر مريحه جدا في الصالون عن الفيرنا والانوس وغيرهم كتير
عاليه عن الارض ومفيش اي احتكاك مع المطبات ايا كان عدد الافراد او الاوزان كام
الثبات كويس لغايه 140 لان الكاوتش والجنوط بتوعها الاصلي
العربيه بتبقي مرتاحه جدا وحاسسها عايزها تشكرني وهي ماشيه ع 120 ومشغل التكييف وراكب معايا 3 افراد بحس انها معموله ل المشي دا بالحموله دي والله اعلم
العربيه لما التكييف يبقي شغال بفضل اطلع من المطب علي الاول بس العربيه بتبقي مستريحه اكتر لو عملت كدا
لسه انا بقي داخل ع صيانه ال20000 لاني دلوقتي عملت 18500 ومش عارف ايه الي هغيره مع صيانه ال20 مع العلم ان العربيه لاغيرت تيل ولا سيور ولا اي حاجه غير زيت موتور وفلاتر بس
وان شاء الله اما اسافر بيها العين السخنه الاسبوع الجاي هجبلكوا تقرير كامل عنها
سلام عليكم