تحذير للمتجه الي حلوان عن طريق الأوتوستراد!
يا جماعة في مشكلة كبيرة و خطيرة جدا ظهرت في الأوتوستراد و قلت لازم أنبهكم عليها!
الإتجاه: حلوان-المعادي
المكان: منزل كوبري طره...قبل المطبات الجديدة اللي عند المعصرة
المشكلة: هبوط حاد في الأسفلت بعرض الطريق
أول امبارح راجع من الشغل الساعة 6:30 بالليل زي كل يوم و نفس الطريق....أفاجأ أمامي مباشرة بهذا الجزء الهابط...
هو عبارة عن شريط بعرض الطريق....سمكه حوالي 50-80 سم و عمقه من 10 ل 30 سم!! غالبا قبل الأسفلت كانوا معديين ماسورة و مردموش عليها صح ..و مع الأحمال هبط هذا الجزء هبوطا عميقا فجأة
دخلت فيه بسرعتي....و للأسف ده يعتبر أقوي مطب أكلته في حياتي بأي عربية....لدرجة ان لمبة الشيك نورت 3 ثواني و طفت تاني....الحمد لله مافيش خسائر في أي حاجة عندي...بس المكان شايفه النهاردة مليان زجاج مفتت و زلط صغير...مما يوحي انه كان يوجد العديد من الأحداث في هذا المكان!!
النهاردة أمام عيني...فيرنا عرضت في الطريق بسبب انه حاول يفادي المطب ده ...بس الحمد لله عرف يلمها و كمل طريقه...
خدوا بالكم يا جماعة بجد و انتم علي الكوبري إلزموا أقصي اليمين من الطريق...عشان المطب خفيف من علي اليمين....لكن الشمال ...قسم وسط!
ياريت حد من المسؤولين المتابعين للمنتدى ينظر في هذه المسألة الهامة و الخطيرة التي من الممكن ان تودي بحياة الكثير...مع ان إصلاحها لن يتكلف الكثير...
