نظام جديد للتراسل في السيارات
من فترة كنت نزلت لقيت واحد كاتبلي عالغطا بقلم جاف أزرق "إن الله خير حافظ" .. ببص تحتيه لقيت مكتوب بقلم إسود "و نعم بالله" ! ثم بقلم أزرق مرة أخري بس مختلف "لا إله إلا الله" .. انا حسيت إني بتفرج علي ال wall بتاعي علي فيس بوك مش علي غطا العربية خالص .. بس واضح إن الناس دي بتكتب و متابعة الموضوع مش كتبوا و مشيوا يعني واضح إن غطا عربيتي هو الملتقي اللي بيجمعهم .. فا كتبتلهم تحت رسائلهم .. و نعم بالله و لكن انا مغطيها عشان التراب و العصافير اللي عالشجرة .. بس محدش منهم رد عليا ! انا قعدت أدور يمكن ألاقي رسائل أخري لأن واضح إن غطا العربية بقي شات روم مشهور و انا معرفش ! و قلت دنا هلاقي رسائل زي "البامية عالسفرة ياسي محمد" و "فين البتنجان يا ولية" و حاجات كدة بس ملقتش .. بس اما حكيت لصحابي طلع في منهم حصلهم قبل كدة .. واحد صاحبي بيقولي انا مرة نزلت لقيت واحد راششلي كلمة "شعبان سيكا" بسبراي عالصاج .. و واحدة زميلتي بتقولي انا غطا عربيتي لقيت عليه مكتوب مرة "انا معجب بيكي بس مكسوف أكلمك كلميني إنتي نمرتي كذا كذا " فا واضح إن ده نظام للتخاطب و التعارف معمول بيه يعني ! حد يا جماعة حصلوا حاجة زي كدة ولا الضغط كله عالغطا بتاعي ؟ انا خايف السيرفر يقع.