لكل المحتارين يشتروا 508 أو لا بسبب بنزين 95 :) !!!
أحب أطمن كل اللي يرغبوا في اقتناء هذه الجميلة الفرنسية و أقولهم أنا عامل بالعربية 28000 كم و فضلت أمونها فترة مش قليلة (تقريباً 9000 كم) بنزين 92 عادي و بيمشيها زي الفل دون أدني مشكلة ... أنا في الفترة الحالية بأمونها 95 نظراً لأن الفرق في السعر بينهم شهرياً 400 جنيه و ده مبلغ مش كبير و مش أزمة بالنسبالي ... اللي بيفرق في العربية بين 92 و 95 هو ارتفاع صوت الموتور نسبياً بفرق يكاد يكون غير ملحوظ و عند الحرق فقط أما في السرعات العادية يحافظ علي هدوءه و بالنسبة للسحب يتحسن قليلاً مع ال95 لكن ب 92 أداء العربية مرضي جداً ... اللي يمونها 95 ياخد باله من حاجة مهمة العربية بتجري لوحدها يعني أنا أعتقد في الفترة اللي كنت بأمونها 92 كنت علي طريق العين السخنة و ماشي 120 و التفت أتكلم مع اللي جنبي لقيت العربية وصلت 180 و أنا مش واخد بالي و المشكلة إنك مش هتحس إنها بتجري لأن ثباتها ممتاز ... بالنسبة للناس اللي قرأت في الbrochure أو علي المواقع الأجنبية إن العربية بتاخد 95 و الbrochure المصري إنها بتاخد 92 ف أنا أحب أطمنهم إن ده مش نصب علشان الوكيل يبيع و خلاص لأن حصل فعلاً تعديل في العربية بيخليها compatible مع ال92 المصري و عموماً المثل بيقول "اسأل مجرب و لا تسأل طبيب" :)
في المجمل العربية مناسبة جداً لمصر و لشوارعها و أنا بأعتبرها أحسن عربية في فئتها نظراً لكثرة مميزاتها و انعدام مشاكلها بعكس أختها الانسيجنيا التي ظهر فيها مشاكل مؤخراً و في 2 أعضاء محترمين نقلوا تجربتهم مع مشاكل الانسيجنيا كاملة ممكن تتطلعوا عليها في قسم أوبل و صدقوني أنا رأيي ده بكل حيادية مش لأني من ملاك الPeugeot
نصيحة لكل الناس اللي بتمون 95 في مصر عموماً ... أحسن gas station ممكن تمون منها هي "إمارات مصر" و أنا مليش مصلحة في إني أعملها دعاية لكن عايز أساعد الأعضاء الكرام في المحافظة علي مواتير عربياتهم
كان في عضو فاضل متخوف من موضوع ال95 في ال508 و قرر إنه يجيب كورولا بدلاً منها لكن أنا مع كامل احترامي للكورولا أحب أقوله بلاش تحرم نفسك من إنك تستمتع بعربية زي ال508 و تنزل لفئة أقل خوفاً من حاجة و علي فكرة في نقطة مهمة جداً لازم الكل ياخد باله منها و هي إن العربيات ديه كلها أرزاق يعني ممكن تلاقي واحد معاه Mercedes S class و مغلباه بدليل إن واحد جاري معاه انسيجنيا من قبل ما أشتري أنا الPeugeot و أعتقد عمل بيها 32000 كم و ماظهرش معاه مشاكل و راضي جداً عن أداء العربية في حين إن الأعضاء الكرام هنا ظهر معاهم مشاكل
في النهاية أحب أختم كلامي و أقول ربنا يوفقكم جميعاً لما فيه الخير إن شاء الله و يا رب كل اللي نفسه في عربية يركبها ... تحياتي لكم جميعاً :)