سؤال عاجل بخصوص بطارية لادا 1500
السلام عليكم ،،،
إخوانى بالمنتدى انا اشتريت عربية مستعملة لادا 1500 موديل 1975 فى اول شهر 5 / 2015، وصاحبها كان شاري لها بطارية جديدة فى شهر 1 / 2015 ، ونوع البطارية (النسر الألمانية) ، جيت فى يوم أدور العربية مادارتش ، لما زقيتها بمعاونة الناس دارت ، اَجى ابطلها واجى اشغلها تانى تبطل ، ومتمشيش إلا لما تتزق ، المهم كل الناس قالولى ده المارش فيه حاجة ماعدا الكهربائى قاللى البطارية ضعيفة جدا لو لسة فى الضمان روح رجعها بتسرب ومبتخزنش ، صاحب العربية اللى انا شاريها منه كان مدينى الضمان بتاع البطارية ، المهم روحت مركز خدمة البطارية اللى فى الابراهيمية شارع أبى قير ، كشفوا على البطارية وقالولى فعلا البطارية فيها عيب والمية فيها قليلة جدا ، شكلك يا أستاذ كنت راكن العربية بقالك فترة ، وبصراحة انا بيتهيألى ان صاحب العربية فعلا ممكن مكنش بيمشى بالعربية كتير ، المهم مركز الخدمة قالولى حنغيرك المية وامشى بيها بكرة لو عملت معاك كده تانى تعالى واحنا نغيرهالك وحتدفع شهور استعمال 166 جنيه (عشان البطارية تعتبر خرجت من الضمان لانك مكنتش بتكشف عليها الكشف الدورى بتاعها اللى المفروض تكشفه عليها كل شهر) المهم قولت للفنى بتاع مركز الخدمة انا ماشى حخدها ولو عطلت حجيلك بكرة وتغيرهالى بس ببطارية جافة فقاللى لو عايزنى اغيرهالك بجافة حغيرعهالك وحتدفع فرق حوالى 210 جنيه بس نصيحة منى (والكلام للفنى اللى فى مركز الخدمة) بلاش بطارية جافة لان (مش متذكر الكلام تحديدا) الكتاوت عندك خارجى والدينامو مش عارف ماله فالبطارية الجافة حتتحرق منك خلال شهرين .
وأسئلتى هى :ـ
ـ 1 ـ ايه رأيكم لو البطارية اشتغلت كويس بعد ما المية بتاعتها اتغيررت ، اخليها ولا ابدلها بواحدة جديدة وادفع 166 جنيه شهور استعمال .
ـ 2 ـ ولا الأفضل انى اغير البطارية (لان فى ناس قالولى ان البطارية مادام عملت كده بيبقى فيها ربع ضرب) والفنى قاللى فعلا الكلام ده بيحصل بسبب ركنة البطارية لكن عندك محصلش واللى حصل بس ان المية نقصت .
ـ 3 ـ هل فعلا العربية بتاعتى مينفعش معاها بطارية جافة زى ما الفنى ده قال عشان موضوع الكتاوت الخارجى والدينامو والحاجات دى اللى الفنى قالها ، لان انا اول مرة اسمع ان فى عربيات مينفعش معاها البطاريات الجافة ، انا كنت فاكر انها تنفع مع كل العربيات .
واّسف على انى طولت عليكم
وشكرا جزيلا مقدما
