رحلتى من الهوندا سيتى الى النيو لوجان
بداية الكلام ... الحمد لله
ندخل بقى فى الموضوع على طول طبعا الناس مستغربة من هوندا لرينو ايه اللى جاب القلعة جمب البحر و الكلام دا. انا الحمد لله كان معايا هوندا سيتى 2006 من الزيرو هى كانت 1500 اتوماتيك 110 حصان بس لظروف شخصية كنت مضطر ابيعها ... المهم بدأت رحلتى بأنى ادور على مستعمل فى حدود 35 ل 40 الف و الحمد لله ربنا موفقنيش انى الاقى مستعمل و بدأت فكرة انى اجيب زيرو قسط و كان الكلام ما بين اللوجان و ال i10 مش الجراند بس كانت مش متوفرة ساعتها و طبعا عمرى ما كنت هركب فيرنا او لانوس لأنى جربتهم و كفاية على قد التجربة فا كانوا مستبعدين. و استقريت على النيو لوجان اول فئة فى شهر واحد و استلا فورى بأوفر 2000 فا كانت ب 84500.
المهم انا دلوقتى بقالى 6 شهور معايا العربية و عامل حوالى 14 الف كيلو فا فترة كافية انى اقول رأى بحيادية و نفس الوقت غصب عنى هقارنها بالسيتى القديمة.
نبدأ بالشكل الخارجى فا هى احسن من السيتى بكتير فى الشكل عموما من بره. بالنسبة للصاج فا تقريبا نفس المتانة.
نخلص العربية من الخارج و ندخل للداخل فا اقدر اقول تابلوه اللوجان و السيتى مقاربين من حيث الشكل لكن من حيث الخامات السيتى احسن طبعا بس برده اللوجان حلو بالنسبة للفئة اللى هى محصورة فيها.
العدادات بالنسبالى السيتى كانت احلى بمراحل طبعا كاشكل و اضائة.
نيجى لأهم نقطة و دى بالنسبة لناس كتير مهمة و انا مش فارقة اوى بالنسبة ليا.
الموتور و هنا نتوقف كثيرا كثيرا كثيرا
انا هكتب الفرق بين الموتورين فنيا و اترك لكم الباقى
السيتى : VTEC Engine 1.5L 16v with 110 HP 145N.W
اللوجان:Renault 1.6L 8V with 90 HP 128 NW
مش هقول غير هوندا فى النقطة دى
نيجى لحاجة مهمة بقى العفشة: بصراحة عفشة اللوجان تحفة تحفة مش ناشفة ولا ناعمة و مريحة جدا بالنسبالى و اريح من الهوندا بحاجة بسيطو و دا لأن الهوندا كانت جنوط سبور و بروفايل اقل
التكييف: لو تكييف الهوندا هديلوا 9 من 10 اللوجان هديلوا 7 من 10 بصراحة معقول و كويس يعنى مثلا لو كنت بشغلوا فى الهوندا على 2 فى اللوجان بشغلوا على 3 . بس نقطة اخيرة فى موضوع التكييف فا هو بيأثر فى سحب اللوجان بطريقة ملحوظة نوعا ما
التقفيل و الخامات : نديلوا 6.5 او 7 من عشرة و دا طبعا احسن من اى تقفيل مصرى لأن اى تقفيل مصرى مديلوش اكتر من 4 من 10
استهلاك البنزين هنا تتفوق اللوجان يعنى انا ال 40 لتر بيعملوا معايا من 550 ل 650 كيلو فى الهوندا كان من 350 ل 450
الخلاصة انا شايف انى دفعت فلوس فى ماركة محترمة و شكل حديث و عربية انا متوقع انها تكون اعتمادية موفرة فى البنزين و ناعمة و لو فى اى حد عندوا استفسار انا فى الخدمة ان شاء الله و اقدر اساعد باللى اقدر عليه
