السلام عليكم
لو سمحتم كنت عايز اروح العنوان ده 125 ش طومنباي حدائق الزيتون القاهره
والمفروض اكون هناك قبل10 ص
انا من الزقازيق يا تري هروح ازاي اسهل طريق؟؟؟
وهل اروح بالعربية الطريق كويس وفيه مكان نركن فيه امان ولا اروح مواصلات افضل؟
ولو هروح مواصلات هروح ازاي؟
وشكرا جزيلا لكم
طومان باي زحمه بس عادي لو عايز تروح بالعربيه
وممكن اقرب مكان للمترو محطة مترو سرايا القبه وتنزل تاخد تاكسي خمس دقايق
ولو جاي من العربيه ادخل من جسر السويس وتمشي لحد كوبري التجنيد وتنزل من تحته ومن هناك تسال ازاي ادخل طومان باي
بالتوفيق
الافضل تروح بالمواصلات
هتنزل محطة رمسيس, وتاخد المترو لمحطة سراي القبة (اتجاه المرج)
و تنزل تتمشى 5 دقائق هتبقى في ميدان طومان باي
وتاخد الشارع من أوله تشوف انت رايح فين.
لو معاك ناس كبيرة وشايف ان المشي 5 او 10 دقائق كتير ممكن تركب تاكسي من جنب محطة المترو هيوصلك وهتدفع 5 جنيه .
شكرا جزيلا لكم ياشباب ورزقكم الله محبة الناس
وكل عام وانتم بخير بمناسبة شهر رمضان الكريم
ان شاء الله يا جماعه هروح مواصلات
بس في مشوارين طرأوا برضو وهم في العناوين الاتية
32ش أبو حازم ناصية فيصل محطه مدكور بين العشرين والطالبية في المنتصف بالضبط أمام قطونيل بجوار رايا جيزة
والمشوار التاني هنزل التوفيقية عند محل سوزوكي اشتري شوية حاجات للعربية بالمرة طالما انا في القاهره
ان شاء الله اول مشوار هيكون طومنباي وبعد كده اروح انهي بعده؟؟
وطريقة الذهاب ايه؟؟
ولما ارجع ارجع ازاي موقف العاشر او موقف عبود عشان اركب مواصلات الزقازيق
وشكلا ليكم مقدما
بعد طومان باي ... انزل التوفيقيه خلص طلبك و بعدين اطلع عل الهرم ..........
الله يعينك
شكرا يا باشا علي ردكاقتباس:
المشاركة الأصلية كتبت بواسطة wawamoha
بس هروح التوفيقية ازاي هركب مواصلات ولا مترو هركب ايه وهنزل فين لان اخوك غريب في بلدة :crying1:ميعرفش حاجه في القاهره
والهرم برضو هركبلة ايه
واخيرا الرجوع لموقف الزقازيق او محطة القطار هيكون ازاي
بص يا سيدي .....
انت كده كده هاتكون في طومان باي جنب المترو - بعد ماتخلص مشوارك - تركب المترو برضه و ترح اتجاه رمسيس ..
هاتنزل هناك و تتمشى 5 د برضه هاتلاقي نفسك في التوفيقيه ....
خلص مشوارك ... في التوفيقيه و اطلع تاني ميدان رمسيس تحت الكوبري هتلاقي يا اما عربيات الهرم او ميدان الجيزه .... اركب عل طول ماتنتظرش .... و انزل ميدان الجيزه هاتلاقي قدامك حلين :
يا اما ش فيصل يا اما ش الهرم
انا اعتقد - اعتقد - و الله اعلم ان العنوان ده في ش الهرم - اسال برضه هناك قبل ماتركب قولهم محطه مدكور عند رايه...
بعد ماتخلص مشوارك في الهرم - ممكن تقف في اتجاه ميدان الجيزه تلاقي عربيات عبود او رمسيس - اي واحده منهم هاترجعك عبود
مش متاكد في عربيات لموقف العاشر هناك و لا لا - بس القاعده الذهبيه اسال اكتر من مره برضه ..
ربنا معاك
انت الافضل تنزل عبود مش موقف العاشر. ولو قدرت تركب الديزل وتنزل رمسيس هيبقى افضل بكتير جدا جدا جدا.
1 - لو ركبت عبود, بتقول للسواق نزلني عند المؤسسة عشان المترو. وتركب المترو (اتجاه الجيزة) وتنزل محطة مترو الشهداء.
2 - وانت على رصيف المترو هتلاقي يافطة مكتوب عليها (اتجاه المرج) هتدخل منها هتلاقي نفسك طلعت لفوق على رصيف اتجاه المرج. تاخد المترو وتنزل (سرايا القبة)
3 - في سرايا القبة هتتمشى او تاخد تاكسي لحد طومان باي. وانت راجع هترجع للمترو تاني سواء مشي او تاكسي وتركب (اتجاه حلوان)
4 - هتنزل محطة (جمال عبدالناصر). وتتمشى دقيقتين في شارع رمسيس هتلاقي سوق التوفيقية من أوله. لو سوزوكي اللي انا اعرفه (عند ابو غالي بتاع السمك) يبقى في اول السوق يعني مش هتمشي كتير ان شاء الله.
5 - هترجع للمترو وتركب (اتجاه المرج) محطتين بس وهتنزل (محطة الشهداء).
6 - هتلاقي يافطة مكتوب عليها (اتجاه الجيزة) هتنزل السلم لرصيف الجيزة. وتركب المترو لحد محطة (الجامعة).
7 - هتنزل وتركب من بره (جمب كوبري الجامعة) عربيات الطوابق فيصل. وتقول للميكروباص انك عاوز محطة مدكور. انا مش متأكد بالظبط لو كانت عربية الطوابق هتوديك ولا لأ. لكن هتلاقي برضه في نفس الموقف عربيات الطالبية. واحد فيهم هيوصلك ان شاء الله فانت تسأل في الموقف اللي جمب كوبري الجامعة بره المترو.
8 - ترجع تاني للمترو, وتركب (اتجاه شبرا) وحسب طريقك بقا, لو هتركب الديزل تنزل (محطة الشهداء) لو هتركب ميركوباص من موقف عبود تنزل (المظلات) وتركب اي حاجة من بره المحطة هتوديك موقف عبود.
لو اتلخبط في اي مرحلة اسأل الأمن اللي على المكنة بتاعت المترو. اغلبهم بيبقوا عارفين المواقف القريبة من المحطة وهيدلوك ان شاء الله. ربنا معاك. الموضوع بسيط ان شاء الله والمترو بينجز في المشاوير اللي زي دي.
الف شكر ليكم يا شباب علي المساعده
شكرا جزيلا
تم بحمد الله وبفضل توجيهاتكم إنهاء كل المشاوير وكنت في بيتنا الساعة5بالظبط
حقيقي حقيقي المترو ده إخترااااااااااااع
شكرا لكل من ساهم في هذا العمل العظيم
شاكر مجهودكم وربنا يقدركم علي فعل الخير دائما