الموضوع: تغير الردياتير ( الطقم الكبير ) ابيزا 98

السلام عليكم

اسف على الغياب والمشاركة فى احلى واجمل منتدى واجدع اصحاب .

الحمد لله اخيرا رحمت العربية والردياتير اللى خلاص جاب جاز وغيرته بالجديد , وموضوع الجديد دة فكرت فيه كتير جديد ولا استيراد وكان فى تجربة سابقة من سنتين لما غيرت طقم التبريد بالكامل استيراد ودة كان فى الموضوع دة
http://www.nilemotors.net/Nile/345790-98.html

المهم توكلت على الله وجبت الردياتير جديد وذللك للاسباب الاتية

1- الردياتير عندنا بيبقى على جوانات ( اويل سيل ) وللاسف بيبقى علبة الردياتير متبرشمة يعنى مش بتتفك علشان تغير الجوان لو ضرب او افقع بالبلدى ... يبقى الجوان لو باظ ترمى الردياتير وتجيب غيرة

وده خلانى افكر لو الردياتير استيراد هيبقى الردياتير دة محلول من العربية وعلى ما وصل مصر وقعد عن التاجر كام شهر كل دة والردياتير ( على فرض انه سليم ) مفهوش مياة يعنى الجوانات الداخلية نشفت ومجرد ما تركبة وتحط له مياه انت وحظك بقى

2- الردياتير الاستيراد بـــ 450 الى 500 جم وعلى التجربة
الردياتير الجديد بــ 350 جم وجديد ( اى نعم صينى ) بس على الاقل موضوع الجوانات دى افضل

الحمد لله لقيت الردياتير الجديد عن الشيخ اشرف وبصراحة لو مكنش الكبير وكان الوسط او الردياتير الصغير مكنتش جبتة علشان مش عاوز اعمل شنيشة ولعب علشان يركب على قواعد الطقم القديم

( طقم التبريد فى الابيزا يوجد منه 3 مقاسات ايون 3 مقاسات )
طقم صغير ودة بمروحة واحدة وفى ردياتير وسط وغالبا دة نازل فى 94 وبردوا بمروحة واحدة وفى الطقم الكبير ابو مروحتين وكل مروحة بماتور منفصل

المهم الشيخ اشرف فك وركب من غير اى لعب علشان دة نفس الردياتير اللى راكب فيها من بلدها ونفس اماكن مسامير المراواح يعنى الحمد لله الامور كانت بفضل لله ممتازة

وجارى التجربة وربنا يستر طريقى وطريقكم

وتحياتى



دى صور الردياتير القديم





ودة بقى الردياتير الجديد