فلوانس / كورولا /أسترا .. بعد طول البحث .. أخيرا قررت

بدون مقدمات طويله انا هدخل فى الموضوع علطول ..
مبدأيا المنتدى هنا منتدى عبقرى .. وده لسببين .. ان فى ناس هنا بتفهم بجد فى العربيات وده مهم .. والسبب التانى الاهم ان الناس محترمه جدا ومحدش بيبخل بمعلومه او مساعده .. وده اللى ساعدنى أخد قرارى اللى هقوله حالا :3mla:
من 3 شهور بالضبط قررت أغير عربيتى .. انا حاليا معايا أكسنت أر بى .. عمليه واعتماديه وواسعه و بتجرى .. لكن مشكلتها حاجه واحده بس خلتنى مش طايق اركبها اكتر من كده .. العفشه
هى مش مشكلتها الحقيقه هى مشكلة شوارعنا الجميله زى مانتو عارفين
عشان مطولش عليكما انا حطيت criteria واضحه لاختيار عربيتى الجديده .. أول حاجه فيها كانت العفشه طبعاااااااااااااا .. عايز عربيه مريحه فى الحفر والمطبات الجميله بتاعتنا .. تانى حاجه تكون حاجه غير الكورى لانى زهقت من التنطيط وعدم الثبات .. العربيه مش ثابته خالص وعرفت ان الالنترا والسيراتوا كمان كده
تالت حاجه العربيه يبقى فيها عوامل أمان لأنى زمان كنت لوحدى لكن دلوقتى معايا عيلة ربنا يحفظهم .. والاكسنت كانت فاضيه مفيهاش حتى اير باج واحده
رابعا واخيرا كنت عايز ادلع نفسى شويه .. عايز شوية اوبشنز .. زى ماقلتلكوا الاكسنت كانت فاضيه تماما يدوبك موتور وفتيس ودركسيون بس :E_braces[1]:

وتوكلت على الله وبدأت رحلة البحث الطويل المرهق .. وبعد بحث ومقارنه استقريت على 3 عربيات واستبعدت الباقى للاسباب التاليه:
استبعدت المازدا عشان موتور وفتيس قديم وأداء مش أد كده
اللانسر شارك عشان صالون فقير شويه من جوه وهتغير شكل السنه الجايه كمان
السيفيك عشان سعرها مبالغ فيه بصراحه .. لو حطيت 10 الاف على سعرها هركب حاجه زى بيجو 508 اللى هى فئه اعلى فى كل حاجه
الامبريزا عشان شكلها مش داخل دماغى حسيتها مش شبابى خالص
الفوكس عشان ضيقه جدااااا .. عربيه وهميه فى كل حاجه لكن لو ركبتها 5 دقايق هتتخنق من المساحه الضيقه سواء ورا او قدام
السكودا عشان مش بحبها مع احترامى لكل اللى راكبينها
وطبعا استبعدت اى حاجه هاتش باك عشان عايز حاجه عائليه

المهم انى فى الاخر حصرت المقارنه فى 3 عربيات .. فلوانس / كورولا / استرا

مجربتش ولا واحده فيهم لان للاسف موضوع التيست درايف ده فى مصر طلع من المستحيلات السبعه .. أو التمانيه مش فاكر .. مش اى توكيل بيعمل تيست درايف ومش على اى عربيه

لكن قريت كتير عنهم .. وبعد كل ده وصلت لقرارى الاتى .. هجيب كورولا باذن الله

مبدأيا عايز اقول ان الفلوانس عربيه جميله فعلا .. صالونها اكتر صالون شدنى فعلا وحسيت انى راكب عربيه فخمه .. قريت كل حاجه عنها ومساهمات الاعضاء والملاك اللى واضح انهم بيحبوها جدا ومبسوطين بيها جدا .. لكن اللى قفلنى منها حاجتين :
موضوع نقص الزيت .. انا عارف انه حالات فرديه وكانت فى موديلات 2014 لكن برضه محدش ضامن الظروف .. مش متخيل انى ادفع 170 الف فى عربيه ولا قدر الله اغير موتورها بعد شهر ..
موضوع الفتيس ال CVT وطريقة سواقته الغريبه .. قريت كذا حد من الاعضاء المحترمين بيشرح طريقة السواقه والتعامل معاه وحسيت انى هتعامل مع اختراع مش مع فتيس اتوماتيك عادى .. لازم ادوس وبعدين اشيل رجلى وادوس تانى وحوارات .. ليه كل ده .. انا حد بيحب الجري ومعرفش هرتاح مع حاجه زى كده ولا لأ

الاسترا برضه عربيه محترمه لكن برضه بعدت عنها لسببين :
السبب الاول مصر كلها عارفاه طبعا وهو باختصار .. منصور
السبب التانى انها ضيقه شويه من ورا .. وانا عايز حاجه اوسع من الاكسنت

وبالتالى توكلت على الله وعزمت على الكورولا .. تصميمها مش أوى بس فى نفس الوقت مش وحش .. أوبشنز هايله لأول مره فى تاريخ تويوتا :E_braces[1]: .. تسارع وأداء ممتاز .. أمان وESP .. واسعه واعتماديه
يعيبها حاجه واحده فقط ان عفشتها متوسطه .. مش ناشفه ومش ناعمه .. وربنا يستر ومتتعبنيش بأه زى الاكسنت .. ياريت لو حد جربها يقولى رأيه تحديدا فى موضوع العفشه ده .. هل هى متعبه .. يعنى بتنزل منها مرهق ولا مريحه؟

طولت عليكما صح ؟:E_braces[1]: لكن طمعان تدونى رأيكوا فى اللى قلته واختياراتى ولو حد عنده رأى تانى هبقى مبسوط لو سمعته .. شكررررررررراااا

أنا نفسى مريت بالتجربة دى و برضه كان اختيارى الكورولا بس احد الاعضاء الزملاء اشار الى البيجو 508 و على انها فئة اعلى ومن حيث السع مش كتير يعنى البيجو508 الاساسى ب 240 الف و الكورولا الهاىلاين ب 217 الف مع العلم ان موتور الكورولا الموتور العادى 16 صباب ( و ده اللى برتحله) و البيجو تربو و غالبا عمره هيكون اقصر من العادى ...

اقتباس:

---

المشاركة الأصلية كتبت بواسطة ali ashraf

أنا نفسى مريت بالتجربة دى و برضه كان اختيارى الكورولا بس احد الاعضاء الزملاء اشار الى البيجو 508 و على انها فئة اعلى ومن حيث السع مش كتير يعنى البيجو508 الاساسى ب 240 الف و الكورولا الهاىلاين ب 217 الف مع العلم ان موتور الكورولا الموتور العادى 16 صباب ( و ده اللى برتحله) و البيجو تربو و غالبا عمره هيكون اقصر من العادى ...

---

ال 508 جميله طبعا واللى جابوها ماشيين ببنزين 92 عادى ومفيش مشاكل .. لكن للاسف انا ميزانيتى اقل من كده شويه .. عايز حاجه متعديش ال 200 الف .. اشكرك على مرورك الكريم

بالتوفيق ان شاء الله ومبروك مقدما

الفتيس في الكورولا cvt زى الفلوونس

الف مبروك .. تعالي علي جروب الفيس بقي :d .. العفشة في الاول بتكون ناشفة شوية بس مع الوقت هتنعم وخصوصا لما تعدي الـ10 تلاف كم

الكورولا فتيس cvt برضه زي الفلوانس ... الفلوانس شنطتها أكبر من الكورولا بفرق بسيط جداً ... الكورولا الكنبة الخلفية أوسع من الفلوانس و لو رجعت كرسي السائق للآخر و واحد طويل قعد وراه ركبه مش هتلمس الكرسي لكن كرسي السائق نفسه أضيق من الفلوانس و العكس صحيح في الفلوانس و الراحة أثناء السفر و المسافات الطويلة في صالح الفلوانس إذا كنت السائق و في صالح الكورولا إذا كنت الراكب الخلفي ... التوكيلين محترمين و العربيتين اعتمادية كويسة ... نعومة العفشة في صالح الفلوانس بفرق ملحوظ و الثبات ممتاز في الاتنين ... سحب الاتنين معقول و لكن طلعتهم هم الاتنين بطيئة ... استهلاك البنزين كويس في الاتنين و أعتقد في صالح الكورولا بفرق مش كبير ... لو عايز عفشة ناعمة تريحك هات فلوانس و لو عايز تريح اللي معاك هات كورولا ... الاتنين أمانهم كويس و الفرامل كويسة ... ربنا يوفقك لما فيه الخير إن شاء الله :)

اقتباس:

---

المشاركة الأصلية كتبت بواسطة ENG.MaRk

الكورولا فتيس cvt برضه زي الفلوانس ... الفلوانس شنطتها أكبر من الكورولا بفرق بسيط جداً ... الكورولا الكنبة الخلفية أوسع من الفلوانس و لو رجعت كرسي السائق للآخر و واحد طويل قعد وراه ركبه مش هتلمس الكرسي لكن كرسي السائق نفسه أضيق من الفلوانس و العكس صحيح في الفلوانس و الراحة أثناء السفر و المسافات الطويلة في صالح الفلوانس إذا كنت السائق و في صالح الكورولا إذا كنت الراكب الخلفي ... التوكيلين محترمين و العربيتين اعتمادية كويسة ... نعومة العفشة في صالح الفلوانس بفرق ملحوظ و الثبات ممتاز في الاتنين ... سحب الاتنين معقول و لكن طلعتهم هم الاتنين بطيئة ... استهلاك البنزين كويس في الاتنين و أعتقد في صالح الكورولا بفرق مش كبير ... لو عايز عفشة ناعمة تريحك هات فلوانس و لو عايز تريح اللي معاك هات كورولا ... الاتنين أمانهم كويس و الفرامل كويسة ... ربنا يوفقك لما فيه الخير إن شاء الله :)

---

مهندس مارك اهلا بك طب كلمنا عن الDurability and long distance travel و ياريت تحط فى المقارنة معشوقاتك ال 508 و اكون لك من الشاكريين

مبروووووووووووك مقدما..التويوتا والفلوانس من افضل السيارات في الفئه دي

اقتباس:

---

المشاركة الأصلية كتبت بواسطة ali ashraf

مهندس مارك اهلا بك طب كلمنا عن الDurability and long distance travel و ياريت تحط فى المقارنة معشوقاتك ال 508 و اكون لك من الشاكريين

---

أهلاً بيك يا فندم ... الDurability and long distance travel في صالح الفلوانس و لكن الكورولا مش وحشة برضه و مع ذلك عفشتها ناشفة (رأيي الشخصي) ... ال508 لو دخلت المقارنة هتبقي unfair لأن أقل فئة فيها تتفوق علي أعلي فئة في الفلوانس و الكورولا في كل النقاط من نعومة العفشة للوسع الداخلي لحجم الشنطة للراحة أثناء القيادة حتي لو 500 كم هتنزل مرتاح ... قوة الموتور و التكييف و السحب و الثبات في صالح البيجو طبعاً و ده بسبب الlong wheelbase ... ممكن تتمون 92 عادي بدون قلق و إن كان الrecommended هو ال95 ... البيجو أول فئة حتي لو أغلي كقيمة مقابل سعر أحسن من الكورولا و الفلوانس ... توكيل تويوتا أحسنهم و لكن رينو برضه محترم و بالنسبة لتوكيل بيجو في الشكاوي ضعيف لكن في الصيانات الدورية تمام و بالنسبة لل508 مش هتحتاج التوكيل غير في الصيانات الدورية لأن العربية الحمد لله بدون مشاكل fatal

اقتباس:

---

المشاركة الأصلية كتبت بواسطة hosam_optrawy

بالتوفيق ان شاء الله ومبروك مقدما

الفتيس في الكورولا cvt زى الفلوونس

---

الله يبارك فيك .. وموضوع الفتيس ده محير فعلا .. مادام فى الكورولا زى الفلوانس cvt يبقى اشمعن الفلوانس محيرة الناس فى سواقتها كده؟
ياريت حد يجاوبنا على السؤال ده

اقتباس:

---

المشاركة الأصلية كتبت بواسطة zangry

الف مبروك .. تعالي علي جروب الفيس بقي :d .. العفشة في الاول بتكون ناشفة شوية بس مع الوقت هتنعم وخصوصا لما تعدي الـ10 تلاف كم

---

الله يبارك فيك يابوب .. ماتبعتلى لينك الجروب ده بالمره عشان اعرف الاقيكوا :)
ميرسى جدا لذوقك

اقتباس:

---

المشاركة الأصلية كتبت بواسطة eng.mark

الكورولا فتيس cvt برضه زي الفلوانس ... الفلوانس شنطتها أكبر من الكورولا بفرق بسيط جداً ... الكورولا الكنبة الخلفية أوسع من الفلوانس و لو رجعت كرسي السائق للآخر و واحد طويل قعد وراه ركبه مش هتلمس الكرسي لكن كرسي السائق نفسه أضيق من الفلوانس و العكس صحيح في الفلوانس و الراحة أثناء السفر و المسافات الطويلة في صالح الفلوانس إذا كنت السائق و في صالح الكورولا إذا كنت الراكب الخلفي ... التوكيلين محترمين و العربيتين اعتمادية كويسة ... نعومة العفشة في صالح الفلوانس بفرق ملحوظ و الثبات ممتاز في الاتنين ... سحب الاتنين معقول و لكن طلعتهم هم الاتنين بطيئة ... استهلاك البنزين كويس في الاتنين و أعتقد في صالح الكورولا بفرق مش كبير ... لو عايز عفشة ناعمة تريحك هات فلوانس و لو عايز تريح اللي معاك هات كورولا ... الاتنين أمانهم كويس و الفرامل كويسة ... ربنا يوفقك لما فيه الخير إن شاء الله :)

---

اه انا عارف ان الفتيس واحد بس ليه الفلوانس تحديدا الناس بتحتار فى سواقتها ياريت لو حضرتك فاهم تفهمنى :) .. ومتفق معاك فى الشنطه والراحه فى السفر والتوكيلات والعفشه والثبات والبنزين والامان .. بس اعتقد طلعة الكورولا مش بطيئه .. وده على لسان كذا حد من ملاكها محدش اشتكى من النقطه دى خالص بالعكس مبسوطين
أشكرك على رأيك المحترم وذوقك

اقتباس:

---

المشاركة الأصلية كتبت بواسطة mmsobhi

مبروووووووووووك مقدما..التويوتا والفلوانس من افضل السيارات في الفئه دي

---

الله يبارك فيك ميرسى لذوقك .. ربنا يبارك للجميع ويحفظهم

اقتباس:

---

المشاركة الأصلية كتبت بواسطة eng.mark

أهلاً بيك يا فندم ... الdurability and long distance travel في صالح الفلوانس و لكن الكورولا مش وحشة برضه و مع ذلك عفشتها ناشفة (رأيي الشخصي) ... ال508 لو دخلت المقارنة هتبقي unfair لأن أقل فئة فيها تتفوق علي أعلي فئة في الفلوانس و الكورولا في كل النقاط من نعومة العفشة للوسع الداخلي لحجم الشنطة للراحة أثناء القيادة حتي لو 500 كم هتنزل مرتاح ... قوة الموتور و التكييف و السحب و الثبات في صالح البيجو طبعاً و ده بسبب الlong wheelbase ... ممكن تتمون 92 عادي بدون قلق و إن كان الrecommended هو ال95 ... البيجو أول فئة حتي لو أغلي كقيمة مقابل سعر أحسن من الكورولا و الفلوانس ... توكيل تويوتا أحسنهم و لكن رينو برضه محترم و بالنسبة لتوكيل بيجو في الشكاوي ضعيف لكن في الصيانات الدورية تمام و بالنسبة لل508 مش هتحتاج التوكيل غير في الصيانات الدورية لأن العربية الحمد لله بدون مشاكل fatal

---

م مارك متفق معاك يافندم .. وفى رأيى ال508 فئه تانيه مختلفه مينفعش نقارنها بالكورولا والفلوانس .. ال 508 تتقارن بالكامرى والهوندا اكورد وهيونداي سوناتا وكيا اوبتيما ..
وعلى فكره احد اسباب اختيارى للكورولا ان توكيلها فى كايرو فيستفال سيتى فى القاهره الجديده .. يعنى جنبى فى التجمع .. كنت بضرب مشاوير جامده لغبور العبور حاجه تزهق

اقتباس:

---

المشاركة الأصلية كتبت بواسطة karimelnagar

اه انا عارف ان الفتيس واحد بس ليه الفلوانس تحديدا الناس بتحتار فى سواقتها ياريت لو حضرتك فاهم تفهمنى :) .. ومتفق معاك فى الشنطه والراحه فى السفر والتوكيلات والعفشه والثبات والبنزين والامان .. بس اعتقد طلعة الكورولا مش بطيئه .. وده على لسان كذا حد من ملاكها محدش اشتكى من النقطه دى خالص بالعكس مبسوطين
أشكرك على رأيك المحترم وذوقك

---

أنا نسيت أذكر إن طلعة الكورولا بالنسبة للبيجو بطيئة لكن هي كويسة مقارنة بالعربيات اللي في فئتها ... موضوع فتيس الفلوانس مش عامل حيرة لأي حد و أنا أول مرة أسمع الموضوع ده و ملاكها من معارفي بيشكروا فيها ككل عموماً هأتأكد من الموضوع بنفسي و لو عرفت حاجة هأبلغ حضرتك علي طول و أعتقد اللي يقدر يفيدك في الموضوع ده هو أ/هاني سعد منسق قسم رينو :)

اقتباس:

---

المشاركة الأصلية كتبت بواسطة eng.mark

أنا نسيت أذكر إن طلعة الكورولا بالنسبة للبيجو بطيئة لكن هي كويسة مقارنة بالعربيات اللي في فئتها ... موضوع فتيس الفلوانس مش عامل حيرة لأي حد و أنا أول مرة أسمع الموضوع ده و ملاكها من معارفي بيشكروا فيها ككل عموماً هأتأكد من الموضوع بنفسي و لو عرفت حاجة هأبلغ حضرتك علي طول و أعتقد اللي يقدر يفيدك في الموضوع ده هو أ/هاني سعد منسق قسم رينو :)

---

آه هى طلعتها اكيد اقل من البيجو لأن البيجو فئة اكبر .. بس طلعتها افضل من الفلوانس ده على لسان الى جربوا العربيتين انا لسه مجربتش حاجه طبعا :) .. محدش يكسب فيا ثواب من ملاك الفلوانس او الكورولا ويخلينى اركب معاه ناخد لفه؟ :)
موضوع الفتيس كذا حد اتكلم عنه واعتقد ا هانى سعد نفسه بذل مجهود كبير فى شرحه لعدد من الناس .. ياريت لو متابع كلامنا ده يقول حاجه

اقتباس:

---

المشاركة الأصلية كتبت بواسطة karimelnagar

آه هى طلعتها اكيد اقل من البيجو لأن البيجو فئة اكبر .. بس طلعتها افضل من الفلوانس ده على لسان الى جربوا العربيتين انا لسه مجربتش حاجه طبعا :) .. محدش يكسب فيا ثواب من ملاك الفلوانس او الكورولا ويخلينى اركب معاه ناخد لفه؟ :)
موضوع الفتيس كذا حد اتكلم عنه واعتقد ا هانى سعد نفسه بذل مجهود كبير فى شرحه لعدد من الناس .. ياريت لو متابع كلامنا ده يقول حاجه

---

لو على الطلعه فقط ... فالنيسان صنى الشكل القديم ٢٠٠٧ اوتو فتيس ٤ سرعات طلعتها اقوى من الفلوانس و الكورولا المجهزين بال cvt :)
لكن بعد كده مفيش اى وجه للمقارنه بينها و ال cvt فى التجميع و التسارع ... لصالح الفلوانس و الكورولا طبعا ...
الطلعه فى الفلوانس مقبوله جدا و مش بطيئه ... يعنى الطلعه تعتبر قويه لكن اى فتيس اوتو ٤ سرعات طلعته اقوى منها .. ده كل الموضوع ... و بعد كده فى التسارع و التجميع الافضليه لل cvt ...
الكورولا اقوى شويه لان موتورها ١٢٢ حصان .. مقابل الفلوانس ١١٥ ... لكن عزم الفلوانس اعلى شويه ....
كل الى اشترو الفلوانس الجديده كان بمقدورهم شراء الكورولا ... و العكس صحيح ...
ال ٥٠٨ دى فئه اعلى و افضل فى كل شئ .. و الى ميزانيته تقدر عليها ... يخلص فيها بدون اى تردد :)
اخيرا نصيحتى لك ... هات للى ترتاح لها اجمالا ..
تحياتى ...

اقتباس:

---

المشاركة الأصلية كتبت بواسطة batman372

لو على الطلعه فقط ... فالنيسان صنى الشكل القديم ٢٠٠٧ اوتو فتيس ٤ سرعات طلعتها اقوى من الفلوانس و الكورولا المجهزين بال cvt :)
لكن بعد كده مفيش اى وجه للمقارنه بينها و ال cvt فى التجميع و التسارع ... لصالح الفلوانس و الكورولا طبعا ...
الطلعه فى الفلوانس مقبوله جدا و مش بطيئه ... يعنى الطلعه تعتبر قويه لكن اى فتيس اوتو ٤ سرعات طلعته اقوى منها .. ده كل الموضوع ... و بعد كده فى التسارع و التجميع الافضليه لل cvt ...
الكورولا اقوى شويه لان موتورها ١٢٢ حصان .. مقابل الفلوانس ١١٥ ... لكن عزم الفلوانس اعلى شويه ....
كل الى اشترو الفلوانس الجديده كان بمقدورهم شراء الكورولا ... و العكس صحيح ...
ال ٥٠٨ دى فئه اعلى و افضل فى كل شئ .. و الى ميزانيته تقدر عليها ... يخلص فيها بدون اى تردد :)
اخيرا نصيحتى لك ... هات للى ترتاح لها اجمالا ..
تحياتى ...

---

صح كلامك .. اشكرك على مرورك الكريم

السيفيك أحسن منهم الإتنين في كل نقاط مقارنتك بس أوبشن أقل شوية والأوبشن اللي ناقص مش فظيع
السيفيك أحسن كمان من البيجو من وجهة نظري في متعة القيادة والراحة لأن البيجو معروف عنها إنها ناشفة في سواقتها وطبعا الإعتمادية في صالح السيفيك
بس طبعا خامات البيجو أفضل وأوبشن أكتر

لو معاك ثمن السيفيك ال vti متترددش لكن من حيث الميزانية الكورولا أفضل لأنها أكثر إعتمادية لكن بالنسبة للراحة مش عارف بصراحة

حاول تجرب العربيتين من ملاكها وأعتقد الفطيم هتلاقي عنده تيست درايف للسيفيك والكورولا..وإسأل على الفلونس في التوكيل عندهم تيست درايف ولا لأ بس روح بنفسك

اقتباس:

---

المشاركة الأصلية كتبت بواسطة ENG.MaRk

أهلاً بيك يا فندم ... الDurability and long distance travel في صالح الفلوانس و لكن الكورولا مش وحشة برضه و مع ذلك عفشتها ناشفة (رأيي الشخصي) ... ال508 لو دخلت المقارنة هتبقي unfair لأن أقل فئة فيها تتفوق علي أعلي فئة في الفلوانس و الكورولا في كل النقاط من نعومة العفشة للوسع الداخلي لحجم الشنطة للراحة أثناء القيادة حتي لو 500 كم هتنزل مرتاح ... قوة الموتور و التكييف و السحب و الثبات في صالح البيجو طبعاً و ده بسبب الlong wheelbase ... ممكن تتمون 92 عادي بدون قلق و إن كان الrecommended هو ال95 ... البيجو أول فئة حتي لو أغلي كقيمة مقابل سعر أحسن من الكورولا و الفلوانس ... توكيل تويوتا أحسنهم و لكن رينو برضه محترم و بالنسبة لتوكيل بيجو في الشكاوي ضعيف لكن في الصيانات الدورية تمام و بالنسبة لل508 مش هتحتاج التوكيل غير في الصيانات الدورية لأن العربية الحمد لله بدون مشاكل fatal

---

عاوز أعرف البيجو صناعة إيه في مصر؟ هي فرنساوي بس على القايم made in ?

اقتباس:

---

المشاركة الأصلية كتبت بواسطة karimelnagar

اه انا عارف ان الفتيس واحد بس ليه الفلوانس تحديدا الناس بتحتار فى سواقتها ياريت لو حضرتك فاهم تفهمنى :) .. ومتفق معاك فى الشنطه والراحه فى السفر والتوكيلات والعفشه والثبات والبنزين والامان .. بس اعتقد طلعة الكورولا مش بطيئه .. وده على لسان كذا حد من ملاكها محدش اشتكى من النقطه دى خالص بالعكس مبسوطين
أشكرك على رأيك المحترم وذوقك

---

ال CVT بيتحكم فيه كمبيوتر العربية وبالتالي كل شركة بتبرمج ال CVT بطريقتها
أنا جربت ال CVT في التيدا وكان وحش أوي فأعتقد هيكون قريب من الفلونس لأن رينو واخدة فتيس نيسان

تويوتا شغالة بالفتيس ال CVT بس مسمياه CVTi-s وملاك الكورولا بيقولوا إنه مريح بس أنا مجربتوش

الفكرة إن ال CVT بيحاول يقلل إستهلاك البنزين
هو سواقته سهلة جدا زي الأتوماتيك العادي مفيش إختراع زي الفتيس الإيزي ترونيك والفتيس بتاع الكورولا الجنوب أفريقي
بس اللي بيحب الجري بيحاول يتعامل معاه ويلتف حواليه عشان يحاول يطلع منه أداء رياضي عشان كدا ممكن تسمع كلام عن طريقة سواقته عشان تحس إنه رياضي

اقتباس:

---

المشاركة الأصلية كتبت بواسطة swimmer25

ال CVT بيتحكم فيه كمبيوتر العربية وبالتالي كل شركة بتبرمج ال CVT بطريقتها
أنا جربت ال CVT في التيدا وكان وحش أوي فأعتقد هيكون قريب من الفلونس لأن رينو واخدة فتيس نيسان

تويوتا شغالة بالفتيس ال CVT بس مسمياه CVTi-s وملاك الكورولا بيقولوا إنه مريح بس أنا مجربتوش

الفكرة إن ال CVT بيحاول يقلل إستهلاك البنزين
هو سواقته سهلة جدا زي الأتوماتيك العادي مفيش إختراع زي الفتيس الإيزي ترونيك والفتيس بتاع الكورولا الجنوب أفريقي
بس اللي بيحب الجري بيحاول يتعامل معاه ويلتف حواليه عشان يحاول يطلع منه أداء رياضي عشان كدا ممكن تسمع كلام عن طريقة سواقته عشان تحس إنه رياضي

---

اسمح لى التعقيب :)
اى جير اوتو عامه كارت الكمبيوتر هو الى بيتحكم فيه ...
و فعلا ال cvt بتاع التيدا رد فعله بطئ شويه ... و موجود فيها من ٢٠٠٩ ...
لكن cvt الفلوانس افضل منه بفرق ملحوظ ... يمكن لانه جيل احدث ٢٠١٤ ...
عن تجربه ال cvt للكورولا ادائه مثل الفلوانس لكن الموتور اقوى ب ٧ حصان و ده يفرق شويه
استهلاك البنزين فعلا ممتاز بشرط عدم الحرق
اتفق معك ان استخدام ال cvt سهله جدا و عادى زى اى جير اوتو ... و مع مرور الوقت حتعرف تتطلع منه الى انت عايزه :)
تقبل تحياتى ...

اقتباس:

---

المشاركة الأصلية كتبت بواسطة swimmer25

السيفيك أحسن منهم الإتنين في كل نقاط مقارنتك بس أوبشن أقل شوية والأوبشن اللي ناقص مش فظيع
السيفيك أحسن كمان من البيجو من وجهة نظري في متعة القيادة والراحة لأن البيجو معروف عنها إنها ناشفة في سواقتها وطبعا الإعتمادية في صالح السيفيك
بس طبعا خامات البيجو أفضل وأوبشن أكتر

لو معاك ثمن السيفيك ال vti متترددش لكن من حيث الميزانية الكورولا أفضل لأنها أكثر إعتمادية لكن بالنسبة للراحة مش عارف بصراحة

حاول تجرب العربيتين من ملاكها وأعتقد الفطيم هتلاقي عنده تيست درايف للسيفيك والكورولا..وإسأل على الفلونس في التوكيل عندهم تيست درايف ولا لأ بس روح بنفسك

---

بالضبط زى مانت قلت هى اوبشن اقل .. بس اقل كتير مش شويه .. يعنى أقل فئه فيها أغلى من الكورولا ب 18 الف ومفيهاش ESP ولا TRC ولا Follow Me light ولا مثبت سرعه ولا جنوط رياضيه .. وحاجات تانيه كتير انا مش فاكرها .. واعتقد معظمها حاجات مهمه مش مجرد كماليات .. مش عارف ليه الهوندا مبالغ فى سعرها كده .. يعنى لو بنفس سعر الكورولا انا هفكر ومش أكيد كمان .. لكن دى أغلى 18 الف ..
انا بحاول احجز تيست درايف مش عارف كل مااكلم رينو الاقى العربيه مش موجوده .. ومعرفش تويوتا ايجيبت عندهم تيست ولا لأ .. بس هكلمهم
اشكرك على ردك الكريم

اقتباس:

---

المشاركة الأصلية كتبت بواسطة swimmer25

ال cvt بيتحكم فيه كمبيوتر العربية وبالتالي كل شركة بتبرمج ال cvt بطريقتها
أنا جربت ال cvt في التيدا وكان وحش أوي فأعتقد هيكون قريب من الفلونس لأن رينو واخدة فتيس نيسان

تويوتا شغالة بالفتيس ال cvt بس مسمياه cvti-s وملاك الكورولا بيقولوا إنه مريح بس أنا مجربتوش

الفكرة إن ال cvt بيحاول يقلل إستهلاك البنزين
هو سواقته سهلة جدا زي الأتوماتيك العادي مفيش إختراع زي الفتيس الإيزي ترونيك والفتيس بتاع الكورولا الجنوب أفريقي
بس اللي بيحب الجري بيحاول يتعامل معاه ويلتف حواليه عشان يحاول يطلع منه أداء رياضي عشان كدا ممكن تسمع كلام عن طريقة سواقته عشان تحس إنه رياضي

---

الله ينور عليك .. اوجزت فأفدت .. اشكرك على المعلومه القيمه

اقتباس:

---

المشاركة الأصلية كتبت بواسطة batman372

اسمح لى التعقيب :)
اى جير اوتو عامه كارت الكمبيوتر هو الى بيتحكم فيه ...
و فعلا ال cvt بتاع التيدا رد فعله بطئ شويه ... و موجود فيها من ٢٠٠٩ ...
لكن cvt الفلوانس افضل منه بفرق ملحوظ ... يمكن لانه جيل احدث ٢٠١٤ ...
عن تجربه ال cvt للكورولا ادائه مثل الفلوانس لكن الموتور اقوى ب ٧ حصان و ده يفرق شويه
استهلاك البنزين فعلا ممتاز بشرط عدم الحرق
اتفق معك ان استخدام ال cvt سهله جدا و عادى زى اى جير اوتو ... و مع مرور الوقت حتعرف تتطلع منه الى انت عايزه :)
تقبل تحياتى ...

---

هى يمكن مسالة تعود بأه .. لأنى قريت كذا حد من ملاك الفلوانس بيسألوا فى الموضوع الفتيس ده .. الموضوع كده محتاج تيست درايف
اشكرك باتمان

اقتباس:

---

المشاركة الأصلية كتبت بواسطة karimelnagar

بالضبط زى مانت قلت هى اوبشن اقل .. بس اقل كتير مش شويه .. يعنى أقل فئه فيها أغلى من الكورولا ب 18 الف ومفيهاش esp ولا trc ولا follow me light ولا مثبت سرعه ولا جنوط رياضيه .. وحاجات تانيه كتير انا مش فاكرها .. واعتقد معظمها حاجات مهمه مش مجرد كماليات .. مش عارف ليه الهوندا مبالغ فى سعرها كده .. يعنى لو بنفس سعر الكورولا انا هفكر ومش أكيد كمان .. لكن دى أغلى 18 الف ..
انا بحاول احجز تيست درايف مش عارف كل مااكلم رينو الاقى العربيه مش موجوده .. ومعرفش تويوتا ايجيبت عندهم تيست ولا لأ .. بس هكلمهم
اشكرك على ردك الكريم

---

أول فئة فيها esp و trc ومثبت سرعة
وعشان تحس بالسيفيك لازم تجيب الأعلى وفيها جنوط وبلوتوث وتحكم في الصوت من الطارة وكاميرا خلفية وطارة جلد وفتحة سقف وتكييف أتوماتيك وشاشة بيانات

لو إنت بتبص فقط لكماليات يبقى متجبهاش لأن فيه عربيات فيها كماليات أكتر
لكن السيفيك بقى فروقها كتيرة عن أي عربية تانية وده اللي بيعمل فرق السعر

الأكثر ثباتا
الأكثر قوة في الموتور..مماثلة للكورولا ولكني أعتقد إن أداءها أعلى من الكورولا
الأكثر إعتمادية..مماثلة للكورولا
افضل عمر لقطع الغيار
أفضل توكيل
الأقل إستهلاكا للبنزين
الأكثر نعومة في العفشة
الأفضل في التحكم ومتعة القيادة..مماثلة للأوروبي

اقتباس:

---

المشاركة الأصلية كتبت بواسطة swimmer25

أول فئة فيها esp و trc ومثبت سرعة
وعشان تحس بالسيفيك لازم تجيب الأعلى وفيها جنوط وبلوتوث وتحكم في الصوت من الطارة وكاميرا خلفية وطارة جلد وفتحة سقف وتكييف أتوماتيك وشاشة بيانات

لو إنت بتبص فقط لكماليات يبقى متجبهاش لأن فيه عربيات فيها كماليات أكتر
لكن السيفيك بقى فروقها كتيرة عن أي عربية تانية وده اللي بيعمل فرق السعر

الأكثر ثباتا
الأكثر قوة في الموتور..مماثلة للكورولا ولكني أعتقد إن أداءها أعلى من الكورولا
الأكثر إعتمادية..مماثلة للكورولا
افضل عمر لقطع الغيار
أفضل توكيل
الأقل إستهلاكا للبنزين
الأكثر نعومة في العفشة
الأفضل في التحكم ومتعة القيادة..مماثلة للأوروبي

---

كل ده انا معاك فيه الافضليه للهوندا لكن مش بفارق كبير .. في حين ان الفرق فى السعر تقريبا 35 الف جنيه .. مبلغ مش بسيط طبعا
انا مش ببص للكماليات بس بالعكس انا اتكلمت عن حاجات اساسيه زى عوامل الامان .. لكن برضه اى حد يهمه شوية دلع فى العربيه ميحسش انها فقيره
عموما انا ميزانيتى مش عايزها تعدى ال 200 الف .. الهوندا عربيه جميله طبعا بس هتبقى غاليه بالنسبالى ..

أنا رأيي الفلوينس أفضل من الكورولا.. والله أعلم.

كلم رينو ابو رواش علشان التيست درايف