الموضوع: ناوي اسافر من الاقصر إلي العلمين (الساحل)، سؤال بخصوص الاحتياطات اللازمة - لانوس

بالاضافة الى ماسبق اتاكد من الاتى
1- حالة الكاوتش الاستبن
2- زجاجة اسبراى بتنفخ الكاوتش ولو مش متاحة هات منفاخ عجل عادى
3- حبل او حزام قطر
4- مياه خضراء

هو ده الاسبراى وسعره 45 جنيه
https://www.youtube.com/watch?v=MHejWvpibSQ

بلاش تاخد الطريق الصحراوي ..قضيها زراعي ..وواحده واحده كده مع نفسك

المشاركة الأصلية كتبت بواسطة msobhy

حضرتك انا كان معايا لانوس وكنت بسافر بيها مرسى مطروح كتير
الطبيعى بتاعى زمان انى كنت باخد ال 400 كيلو مره واحده من غير ما اريح
متوسط السرعه فى وصلة العالمين بين 150 الى 170
لغاية لما فى مره حاجه اسمها كوعة الميه انفجرت - مش الكوعه اللى فيه الترموستات - واحده كاوتش من تحت وطبعا كانت مأسااااااااااااه

نصيحتى ليك تعمل كالتالى
1- قبلها بيوم تظبط الكاوتش بتاعك على 30 لو هايبقى معاك حموله وعلى 29 لو مش هاتبقى محمل - متنساش الاستبن
2-اتأكد من مستوى الميه والعربيه بارده تماما
3- أتأكد ان الزيت مظبوط وانك لسه مغيره
4- اتوكل على الله وبلاش سفر بالليل - احسب المسافه بينك وبين الساحل واعمل حسابك ان متوسط سرعتك يكون بين 100 - 120 بالكتييييييير
5- كل ساعه ونص قياده تاخد راحه 15 دقيقه وتعمل كالتالى - بمنتهى الحرص والهدوء تفتح غطاء قربة الميه سنه بسيطه لغاية لما تسمع صوت هواء بينفس وتسيبه شويه لغاية لما يسكت - بعدها تفتح كمان سنه بسيطه هاتلاقى صوت الهواء رجع تانى وتستنى لغاية لما يسكت - افتح سنه كمان هاتلاقى صوت ميه - اقفل ساعتها الغطاء تانى بأحكام
6- تانك البنزين ميقلش عن التلت فى كل الاحوال
7- بلاش السفر بالليل مع انى كنت مدمن سفر بالليل - لكن نصيحه بلاش - صلى الفجر وتوكل على الله
8- خلى معاك عده بسيطه احتياطيه
9- اللانوس ما هيه الا 128 معدله - اوعى تقرص عليها لفترات طويله - فى مشوار زى ده بلاش حتى تحاول تفتح الموتور
10- ارجوك نام كويس قبل السفر وملكش دعوه بالناس اللى معاك - وحاول طول الطريق تهزر وتضحك ولما تقفوا علشان تريحوا اختاروا اماكن مزدحمه واوعى تقف فى مكان فاضى - لو معاك ناس جهزوا اكل وشرب وخلى الناس اللى معاك تستمتع بالمشوار - علشان يروحوا فايقين
11- لو كنتم اكتر من عربيهم - اياكم تتسابقوا - اياكم تجربوا عربيتكم - اياكم تلزقوا ورا بعض - اياكم تسيبوا بعض

ربنا يسترها عليك وتروح وترجع بألف سلامه

بصراحة مش عارف أشكرك ازاي يابو مروان، كفيت ووفيت بصراحة تسلم إيدك
وحاضر ان شاء الله هعمل كل اللي قولت عليه بس هي نقطة وحده اللي مزولاني بصراحة وهي نقطة فتح قربة الميه دي يعني هو لازم اعملها ؟ ولا ممكن اريح العربية كل ساعه ونص ربع ساعة من غير ما افتح القربة؟
وعندك حق انا كنت بحب سفر بليل جداً بس كنت لما بسافر لوحدي او مع صحابي، بس دول اهلي والموضوع مش محتاج هزار، فالنهار زي الفل :)

المشاركة الأصلية كتبت بواسطة ahmedsrs

بالاضافة الى ماسبق اتاكد من الاتى
1- حالة الكاوتش الاستبن
2- زجاجة اسبراى بتنفخ الكاوتش ولو مش متاحة هات منفاخ عجل عادى
3- حبل او حزام قطر
4- مياه خضراء

حلو موضوع الإسبراي دا عشان الطوارئ والحبل والمياه الخضرا بردوا فعلا :) تسلم ياغالي

المشاركة الأصلية كتبت بواسطة Abo_Mazen

بلاش تاخد الطريق الصحراوي ..قضيها زراعي ..وواحده واحده كده مع نفسك

انا لفت انتباهي ردك يابو مازن، انا كنت ناوي اخد الصحراوي بصراحه عشان المطبات اخر قرف في الطريق الزراعي، فإيه الفكرة في الطريق الزراعي؟ تقصد آمان اكتر شويه؟ ولا عشان يجبرني امشي بهدوء؟

انا كدا كدا ناوي امشي بهدوء ان شاء الله اذا اخدت الصحراوي

المشاركة الأصلية كتبت بواسطة hon

اولا توصل بالسلامة
ثانيا حضرتك بتعمل صيانة فى مواعدها ولا لا ؟ لان اغلب ملاك اللانوس مبيعملوش صيانة ويقولك دى بتعطل زى 128 ودا غلط طبعا عندك موضوع الاستاذ مصطفى ظريف الى طلع بالعربية اللانوس من العاشر من رمضان رحلة ومعاه اسرته للاقصر واسوان والعودة سالما الحمد لله و بس دا راجل فاهم العربية والصيانات صح انا شخصيا كنت بطلع مشوار مطروح 500 كيلو ومعايا 5 افراد وبالتكييف والله مرة واحدة بدون توقف وزى الفل بس انا ماشى مع جدول الصيانة مع التوكيل عشان متسمعش كلام حد يقولك امشى تاتا تاتا
عموما فى حاجات لازم تكون جيدة ودى ممكن توقف العربية تماما زى (طرمبة البنزين-موبينة - حالة السيور الكاوتش- حالة الكاوتش نفسه) وانا شايف لو حضرتك مش متاكد من حالة عربيتك يبقى بلاش مجازفة
- ويجب الا تزيد السرعة عن 120 حسب الطريق وعشان الرادارات وريح نفسك والعربية كل ساعتين سواقة
تحياتى

الله يسلمك ياغالي :)
وبخصوص الصيانة الحمدلله متابعها ولسه الأسبوع اللي فات العداد كان وصل ٦٠الف بالسيور الأصلية فمغير سير الكاتينه والدينمو والتكييف ومغير بلي عجل وعامل فحص عليها يعني الحمدلله الدنيا كويسه.

بس لسا عايز انزل اليوم او بكرا ان شاء الله اطمن ع الاطارات والاستيبن.
وتسلم علي نصايحك الغالية يا بطل :)

المشاركة الأصلية كتبت بواسطة Ayman Hussam

انا ليا سؤال في موضوع فتح غطاء القربة
مش كده خطر على العربية لاني كنت مسافر في تاكسي مره
وحصل مشكلة في التاكسي ف السواق قالي العربية خدت هواء
فهل المقصود ان الهواء دخل في دورة التبريد؟ ولا ممكن يقصد حاجه تاني؟

والله يا اخ ايمن انا الموضوع مش مزاولني عشان خطر. اكيد ابو مروان فاهم بيقول ايه، بس انا بتزاول من فتح القربة دي عشان دايما غضبانة وبتغلي فأنا خايف افتحها في وقت غير مناسب يعني فتتخشب عليا وتزعلني ههههههه

اهم حاجه اتاكد ان انت عامل يان سير الكاتينة و العربيه نفسها تكون حالتها حلوه و الكاوتش اهم حاجه يكون سليم و جديد
و تيل الفرامل مش خلصان
عشان للاسف فيه ناس لما بتبقى مش بتسافر بتهمل صيانات العربيه