حلول مبتكرة لزحام القاهرة
الشكوى عامة و القاهرة أصبحت مكان لا يطاق العيش فيه، انما أكتر مكان بنحس فيه بالزحمة هو الشوارع.. فالنهاردة و انا في ساعة صفا كده في المطبخ تفتق ذهني عن أفكار و اقتراحات أقل ما يقال عنها انها مطرقعة :Lighten:
ليه الحكومة ما تطبقش فكرة الأرقام الزوجية و الفردية بتاعة نمر العربيات دي على البني آدمين كمان؟ ماهي أصل الزحمة مش في الطرق بس، ده مترو الأنفاق كمان بأه الزحام فيه غير طبيعي.. طيب ما نرقم الناس و نخلي خروج الناس من بيوتها على حسب رقمه و يبقى بالاتفاق مع الشركات و المصالح الحكومية و المدارس و كل مكان ممكن يخرج له الناس بصفة يومية.. يعني اللي رقمه مثلا بيبدأ برقم زوجي ممنوع عليه الظهور في الشارع في اليوم ده و لو حتى عشان يجيب فطار عشان الزحمة تخف شوية من الشوارع.
طبعا الناس هاتمشي في الشارع طول الوقت و رقمها متعلق على صدرها زي المساجين كده بالظبط و تبقى عاملة زي نمر العربيات، يعني اللي ماشي من غير نمرة يتاخد منه غرامة فورية و اللي نمرته أول رقم فيها ممنوع عليه الخروج من بيته في اليوم ده يبقى ليه حساب عسير عشان ما يكررهاش تاني :unibrow:
طبعا ده برضه ينطبق على اللي بينزلوا القاهرة من سكان الأقاليم لمدة يوم واحد يقضوا مصلحة و يرجعوا، أول ما رجله تخطي عتبة القاهرة يحطوا له نمرة يمشي بيها، و ممكن كمان يخليها معاه و يتطبق عليه قانون القاهرة بتاع منع أرقام معينة من الخروج، يعني لو رقمه ممنوع عليه المشي في القاهرة في اليوم ده يبقى ما يخرجش من بلده أصلا و يخلي المشوار ده ليوم تاني.
فيه فكرة تانية و هي ان الحكومة توزع الأجازة الإسبوعية على أيام الإسبوع.. يعني مش كله يتكوم في الجمعة و السبت و باقي أيام الإسبوع تبقى الدنيا جحيم زي ما هو حاصل كده. المفروض انهم يجبروا الشركات القطاع الخاص كمان على ان شركات معينة تكون ليها أجازة يومين في الإسبوع غير الجمعة و السبت، طبعا يوم الجمعة هايدوا بريك لصلاة الجمعة. بكده يبقى فيه عدد معين من الشركات في البلد موظفينها مش بيخرجوا من بيتهم أصلا و بكده يخف الزحام عن الموريستان اللي اسمه القاهرة ده.
اما بأه المدارس و الجامعات فبرضه الطلبة مايروحوش كل يوم.. هو لازم يعني كل يوم مدارس؟ ده حتى الولاد بتزهق و بيتعبوا من الدراسة كل يوم كده، يخلوها 3 أيام في الإسبوع بس بدل 5 أيام و الباقي يذاكروه في البيت.. شوية مرونة يا جماعة بس عشان الدنيا تمشي :k46:
ايه رأيكوا في الأفكار دي؟ تهييس؟ ماشي.. تهييس تهييس.. أهو اي حاجة بدل الواحد ما يخبط دماغه في الحيط :banghead:
حد عنده أفكار من النوعية دي تاني؟ عايزين أفكار مبتكرة و غير تقليدية، أصل الحلول التقليدية مش نافعة.. ياللا ورونا الإبداع يا جماعة :smartass: