2 مرفق
تجربتي مع كيا شوما للفائدة
منذ ما يقارب عامين اشتريت كيا شوما أوتوماتيك مو 1998 معاقين، عربية محترمة بالفعل ثبات ونعومة ، خلال الفترة الماضية لم تحتج إلا الزيت والبنزين، منذ شهر سمعت صوت في الكبالن أثناء الملفات، قررت إني أغيرهم وكمان حافظة الكرنك الخلفية لإنها كانت بتنشع زيت، بتعامل مع ميكانيكي محترم، اديته العربية وسافرت القاهرة غير الكبالن وحافظة الكرنك وسير الكاتينة . . بعد استلامي العربية لقيت تنتيشة بسيطة اعتقدت إن العربية فاضية بنزين، بعد ما فولت لقيت التنتيشة موجودة وال rpm بيطلع وينزل خاصة لما تنقل على أي غيار ينزل للزيرو والعربية تصقف :_Alshmokh08[1]: ، رحت على كهربائي عنده جهاز كشف أعطال كشف طلعلي كود P0717 وده كود حساس سرعة التوربين بلا إشارة، رحت اشتريت حساس سرعة ( مكنتش أعرف إن حساس السرعة غير حساس سرعة التوربين ) وغيرته ، العربية بنفس الوضع !! :dumb:
ولما اكتشفت الفرق بين حساس السرعة وحساس سرعة التوربين ( وده مكانه تحت عمة الهوا ) رحت اشتريته استيراد وركبت ، برضة وضع العربية زي ما هو !! :_Alshmokh08[1]:
عندي صديق معاه نفس العربية، رحت عنده وجربت الحساسات على عربيته ، الحساسات شغالين زي الفل ومفيش أي مشكلة !! :tire:
رجعت للكهربائي قالي كده فيه مشكلة في الفتيس !! الميكانيكي قالي احتمال تكون فيه فيش اتلخبطت مني !! ملقتش غير فيشة حساس الأوكسجين والفيشة اللي جاية من ناحية الدينامو هم اللي بيركبوا على بعض، بدلتهم لقيت العربية انتظمت وزي الفل، والفتيس بينقل نقلاته في منتهى السلاسة ومفيش أي مشاكل غير مشكلة واحدة وهي إن الدينامو مبقاش يشحن البطارية !! :_Alshmokh08[1]:
نرجع الفيش لوضعها الصحيح ( زي ما شفته في عربية صديقي ) الفتيس يتلخبط في النقلات لكن الدينامو يشحن البطارية عادي !! :_Alshmokh08[1]:
رحت لواحد قالي تقسيمة سير الكاتينة غلط ( رغم إن العربية مضبوطة جدا على السلانسيه ) لكن فكينا وتأكدنا من التقسيمة صحيحة . . وبرضة الوضع كما هو . . . :crying1:
رحت لحد تاني ، قالي احتمال تكون شريحة كنترول الفتيس، جبت شريحة استيراد . . . نفس الحكاية
واحد تاني قال ممكن شريحة كنترول العربية . . جبت شريحة . . نفس الحكاية . . :crying1:
واحد تالت قال إن فيه صاجة بين الفتيس والموتور أكيد الميكانيكي وهو بيغير حافظة الكرنك قلبها، نزلنا الفنيس من المتور ملقناش غير ترس الفلام مفيش صاجة ولا حاجة!! وبرضة الوضع كما هو . . . :crying1:
حد رابع قال بلوف الفتيس فيها حاجة، فكينا كارتيرة الفتيس ونضفنا البلوف والمصفاة ( الفلتر ) وكله تمام وغيرنا الزيت بالمرة . . . وبرضة الوضع كما هو . . . :crying1:
قدت في الحكاية دي ما يقارب عشرين يوم بين الصنايعية والكهربائية وأجهزة كشف الأعطال . . . كشفنا على كل فيش العربية ، كشفنا على كل ضفيرة العربية وضفيرة الفتيس، كشفنا على الفتيس نفسه من ناحية المتور ومن ناحية الكارتيرة فقط، وخلاص وصلت بي الحلقوم . . . استنزاف مالي وعصبي وصحي ، في النهاية قررت إني أشحن العربية على القاهرة ونشوف أي حد يحل لنا المشكلة دي . . .
الميكانيكي اللي بشتغل معاه كان بيشتغل مع خاله اللي فاتح مركز في بورسعيد ، اتصل بيه وحكاله عن القصة من بدايتها . . الراجل سأل عن الحاجات اللي تم تغييرها في العربية ( كبالن - حافظة كرنك خليفة - سير كاتية - طقم بوجيهات - سير تكييف ) وبعد ما سمع صوت العربية وتقسيمتها على التليفون ، رد في منتهى البساطة . . . :3mla: إن المشكلة كلها في طقم البوجيهات اللي تم تغييره، قال يا ريت تجيبوا طقم بلاتنيوم وحتلاقوا العربية انتظمت . . :E_braces[1]:
بعد كل العذاب والفك والتركيب والكشوفات ، جبنا طقم بوجيهات بلاتنيوم لقينا العربية رجعت كما كانت وأفضل نقلات في منتهى السلاسة سحب بدون أي مشاكل وكأن شيئاً لم يكن !! :grin02:
الموضوع ده صرف معايا ما يقارب من 2000 جنيه مصاريف بين الصنايعية والكهربائية وشراء حساسات وخلافه وفي النهاية لقينا الحل في طقم بوجيهات بلاتنيوم !! :crying1:
حبيت أحكيلكم تجربتي المريرة للفائدة ولاتخاذ الحيطة من البوجيهات المضروبة المنتشرة في السوق :_Alshmokh08[1]:
مرفق صورة لحساس سرعة التوربين وصورة لحساس السرعة